Pathien Lekhabu Inthieng Chongtung Thar 1 Korinth 16

Iempu-champuingei ranga chôiruol

1 Atûn chu, Judea rama Pathien mingei ranga chôiruol chungroi nin miziek anghan. Galatia koiindangngei kôma ki ril anghan nangni khom lei tho ngêt sa roi. 2 Masikin ko hong tika chôiruol rusuong anâng loina rangin, Pathienni tinna nin sisika nin sum suo ngei renga hah khâi ngêt ungla, male lei dar roi. 3 Ko hong suole, nin neinunpêkngei chôia Jerusalema se ranga nin thangpu ngei hah mêlinrietna lekhangei min chôiin tîr ngei ki tih. 4 Hanchu ke se ranga ânhoi ani vângin chu keima leh mên ruoipui thei an tih.

Paul mintuonangei

5 Macedonia rama ka chai rang anâng sikin Macedonia rama ka chai suo tika nin kôm hong ki tih. 6 Nin kôm chu asôtzan om ki tih, phalbi sûng kai khom anithei, kho-kho tieng khom apêna ke sena ranga ma san thei nin tih. 7 Atûna selampala nangni mu rang chu nuom mu-unga; Pumapa'n aphal ngâiin chu nin kôm zora sôtzan châm rangin kên sabei ani.

8 Ephesi khuo hin Pentecosni tena chu ko om rang. 9 Mahan mi doipungei tamtak om khom rese ngeia, sin roiinpuitak le sin kâmomtak ki sin theina ranga zorânchum tak aom ani.

10 Timothy hah nin lampui tieng a hong duoia anînchu, chi tet loia nin kâra aom theina rangin lamdon lei tho roi, keima angin Pumapa sin a tho ngâi sikin. 11 Tutên enkhum no rese ngeia, phûkdâitakin ko kôm a hong kîrnôk theina rangin san ngêt ungla mojôk roi; iempungei leh munkhata hong rangin ka lei sabei kêng.

12 Atûn, ei lâibungpa Apollos chungroi chu, iempu dangngei leh munkhatin nangni hongpan rangin ko mohôk tita, hannirese ama hih ma vêl hin chu hong rangin la minnuom phar* nimaka. Nikhomrese zorânchum a man tika hong atih.

Azoinataka chongbâingei

13 Intûngchienin om ungla, taksônna han inding det ungla, hâi ungla, râttakin om roi. 14 Nin sin ngei murdi hah lungkhamnân sin roi.

15 Ka lâibungngei le sarnungei, Stephanas le a inmingei chungroi hah nin rieta; anni ngei hah Achaia rama Khristien chang masatak an nia, Pathien mingei chuonsin ranga inpêk an nia, 16 ma anga mingei ruoipunina, le tumakhat khom anni leh chuonsin ngâingei le sintho ngâingei chu an chong jûi rangin nangni ke ngên ani.

17 Stephanas, Fortunatus, male Achaicus ngei; an hong hih asân ka râiasâna nin omloi khom indang loiin min donsûia 18 male nin mulungrîlngei nangni an minhar pe anghan, kei khom min minhar kêng. Ma anga mingei hih minlut rang rohoi piel an ni.

19 Asia ramhuol sûnga koiindangngei hin an chibaingei nangni an hong muthuona; Aquila le Priscilla male an ina koiindang inkhôm ngâingei hin Khristien chibaimûknangei nangni an hong muthuon. 20 Hi muna iempungei murdi khom chibaimûknangei nangni an hong muthuon.

Intum inthiengin inkhat le inkhat inchibai inlôm roi.

21 Keima ku kut lelên mahi ki miziek ani: Paul renga chibaingei hi.

22 Tukhom Pumapa lungkham mu loi ngei chu an chunga khomâksâmna om rese!

Marana tha Ei Pumapa, a juong!

23 Pumapa Jisua moroina hah nin kôm om rese.

24 Khrista Jisua sika nangni ku lungkhamna chu nin rênga nin kôm om rese.

16:1 Rom 15:25,26

16:5 Sin 19:21

16:8 Och 23:15-21; Bal 16:9-11

16:8 Sin 19:8-10

16:10 1 Kor 4:17

*16:12 ama hih la minnuom phar nimaka; aninônchu Mahi anrêngin Pathien lungdo ni let mak.

16:15 1 Kor 1:16

16:19 Sin 18:2