Pathien Lekhabu Inthieng Chongtung Thar 1 JOHN 1

JOHN

Renga Lekhamuthuon Inkhatna

Chongmaruoi

John renga Lekhamuthuon Inkhatna hin neinun khîn inik a dônna: a porepu ngeiin Pathien le a Nâipasal Jisua Khrista leh inlopa an lêng theina ranga mohôkna le hi inlopna siet thei ngâi minchuna dikloi renga indîn rang khom rilna ani. Hi minchuna dikloi hi ânngamna tak chu, taksa rammuol leh inmanna renga kêng asaloi hi ânzir ngâi ti iem ani. Masikin Jisua Pathien Nâipasal hih munisi diktak ni thei no nih tiin. Ha minchupungei han sanminring ti hih rammuola damsung mindona renga jôk hi ani an tia. Mapên han sanminringna ti hin omdikna le mo, aninônchu ei miriem champui lungkhamna le mo ite inmanna dôn mak ngei tiin mi an minchu ngâi.

Hi minchuna doiin a miziekpu hin ânthârtakin Jisua Khrista hih munisi diktak ani tie thurchi a misîra, male Jisua iempu ngei murdi le Pathien lungkham a mu kaiin chu an inlungkham rang ani ti hi lunghâng a tho sa ani.

Asûnga chongtângpuingei

Chongmaruoi 1:1-4

Avâr le ajîng 1:5—2:29

Pathien nâingei le Diabol nâingei 3:1-24

Chongtak le chongnôk 4:1-6

Lungkhamna sintum 4:7-21

Taksônna menena 5:1-21

Ringna chong

1 Ringna chong aphuta om hah nin kôm kin miziek ani. Kin rieta, male kin mitin kin mu ani; ani, kin mua, male kin kutin a tôn ani. 2 Hi ringna hih a juong inlanga han kin lei mua; masikin ha roi hah kin misîra, Pa kôma kumtuong ringna om hah ei lâia a juong inlang hah nangni kin ril ani. 3 Pa le a Nâipasal Jisua Khrista leh inlopin kin dôn hi mi nin zom theina rangin kin mu le kin riet hi nin kôm kin phuong ani. 4 Kin râisân akip* theina rangin hi roi hi kin miziek ani.

Pathien chu vâr ani

5 A nâipasal renga chong kin riet nin kôma kin phuong chu mahi ani: Pathien chu vâr ania, ama kôm chu ajîng reng om tet mak. 6 Hanchu, ajînga lêng titin, ama leh ênlop ei tiin chu ei chong le ei sinthôn milak ei ni rang ani. 7 Aniatachu, ama avâra a om anghan eini khom avâra ei lêngin chu inkhat le inkhat inlopkhomna ei dôn ani, a Nâipasal Jisua thisenin ei nunsie ngei murdi renga mi minsâi ngâi ani.

8 Nunsie dôn mu-ung ei tiin chu ei thethenin ênhuong ani, male chongtak ei kôm a om loi ani. 9 Aniatachu, ei sietna ngei Pathien kôm ei phuongin chu, a chonginkhâm anghan ei sietna ngei mi ngâidam a ta, ei sin dikloina murdi renga mi minsâi a tih. 10 Nunsie tho mu-ung ei tiin chu, Pathien milakin ei sina, male a chong khom ei kôm hin aom loi ani.

1 JOHN
<
1
>

1:1 Jon 1:1

1:2 Jon 1:14

*1:4 kin; miziek senkhata chu nin.