Pathien Lekhabu Inthieng Chongtung Thar 2 JOHN 1

JOHN

Renga Lekhamuthuon Inikna

Chongmaruoi

John renga lekhamuthuon inikna hi “Upa han” a nupang lungkham le a nâingei kôma a miziek ani; aomtie chu khotuol koiindang le a mingei tina nîng atih. Hi chongbe bongte hih inkhat le inkhat inlungkhama om ranga ngênna le minchupu dikloi ngei le an minchunangei renga indîn ranga rilna ani.

Asûnga chongtângpuingei

Chongmaruoi 1-3

Lungkhamna kâmomtie 4-6

Chongrin dikloi doia rilna 7-11

Chongkhârna 12,13

1 Upa renga han,

A nupang lungkham le a nâingei;* atataka nangni ku lungkham ani; keima vai ni maka, chongtak a riet ngei murdi khomin nangni an lungkham sa. 2 Chongtak ei kôma om bang, kumtuonga khom ei kôm a om bang rang sika hin.

3 Pa Pathien le Pa Nâipasal Jisua Khrista renga lungkhamna, moroina le inngêina ngei mi pêk hah chongtak le lungkhamna ei ta nirese.

Chongtak le lungkhamna

4 Pa chongpêk anghan na nâingei senkhat chongtaka an om ku mu sikin ka râisân tatak ani. 5 Male nupang lungkham no kôma chongpêk athar niloiin aphut renga ei dôn hah lungkham ênmu thei chitna rangin nangni ke ngên ani. 6 Lungkhamna ki ti omtie chong chu Pathien chongpêk jômin ei om ngêt rang ani. Chongpêk aphut renga nin rênga nin riet khom hah, inlungkhamin om roi, ti hi ani.

7 Mi huong ngâi ngei rammuol pumpuia an suok zoi, Jisua khrista munisi'n a juong inzir ti pom nuom loi mingei hah. Ha anga mingei ha chu milak le Khrista Râl an ni. 8 Masikin nin sin sai ngei hah inmang loia, râisânman a kipa nin man theina rangin asadimin inrung roi.

9 Tukhom Khrista minchuna taka om loiin a khêlin chu, Pathien dôn mak. Tukhom minchuna taka a om titin chu Pa le Nâipasal a dôn ani. 10 Masikin, tukhomin hi minchuna chong hongchôi loiin nin kôm amapa mini, amanu mini a hongin chu, nin ina mintung ngei no ungla; nin chunga “Ratha'nngamna om rese” luo tipe ngei no roi. 11 Tukhomin he hoiin an mathânin chu an neinun saloi an thona han an inchel sa ani.

Chong mongna

12 Chong tamtak nangni ril rang ko dôna, aniatachu lekha leh pentuiin miziek loiin, ei râisânna akip theina rangin nin kôm hongin mêl inmua chong rangin ka sabei ani.

13 Nu Juorpui lungkhamnu nâingeiin† chibaimûknangei nang an hong muthuon ani.

2 JOHN
<
1
>

*1:1 nupang lungkham le a nâingei; Mahih koiindang le a mingei akhînna ani. (rachâng 4, 5 khom en roh).

1:5 Joh 13:34; 15:12,17

†1:13 Nu Juorpui lungkhamnu nâingeiin: Mahih amiziekpu om koiindang mingei akhînna ani.