Pathien Lekhabu Inthieng Chongtung Thar 2 Peter 1

PETER

Renga Lekhamuthuon Inikna

Chongmaruoi

Peter renga Lekhamuthuon Inikna hih Khristien masa ngei, mun inzartak huolsûnga om ngei ranga miziek ani. Ai khîntak chu minchupu dikloi ngei sintho le ma-anga minchuna sika inditnasaloi hong suoka om ngei indoipui hih ani. Hi intaknangei rietna thuonna manna chu mingeiin Jisua an lei mua, a minchuna lei riet ngeiin an mintung, Pathien le Pumapa Jisua Khrista rietna diktak sûr mindet tit hih ani. A miziekpu'n alieka a uor uol tak chu, Khrista juongnôk no nih ti minchuna chongngei chungroi hah ani. Khrista juongnôk rang roia ânnûna abitak chu Pathien'n, tute inmang loia, mitin an nunsienangei renga an insîr rang a nuom sika ani, a ti.

Asûnga Chongtângpuingei

Chongmaruoi 1:1-2

Khristien koina 1:3-21

Minchupu dikloi ngei 2:1-22

Azoina Khrista juongnôkna 3:1-18

1 Simon Peter renga, Jisua Khrista tîrlâm le tîrton,

Han Jisua Khrista kin Pathien le Sanminringpu dikna sika kin chang anghan iemna luttak achang ngei:

2 Pathien le ei Pumapa Jisua nin rietna han moroina le inngêina tamtak nin ta ni rese.

Pathien koina le inthangna

3 A roiinpuina le asatna chang ranga * mi koipu ei rietna sika sakhuo diktak ringnuna ei om theina ranga neinuntin ei nâng murdi Pathien sinthotheina ânthieng mi pêk zoi. 4 Ma anghan, neinunpêk roiinpui le luttak ânkhâm hah mi pêk zoi, ha neinunpêkngei sika han rammuola ôina saloi ngei renga rotpai, mi nina inthieng hah hong chang thei nin tih. 5 Masika han nin theidôr songin nin taksônna han satna bôk ungla, nin satna han rietna bôk ungla, 6 nin rietna han indîntheina bôk ungla, nin indîntheina han tuongdierna bôk ungla, nin tuongdierna han pathien angna bôk ungla, 7 nin pathien angna han lâibung inmoroina bôk ungla, nin lâibung inmoroina han inlungkhamna bôk roi. 8 Hi mi nina neinun ngei hih nin inâng ani, hi ngei hih nin dôn tam ok inchu, ei Pumapa Jisua Khrista nin rietna han nangni min râtin, malam nangni min pan a tih. 9 Aniatachu tukhom ha ngei dônloi chu a kôlrevêl vai amua, mitcho ania, a sietna muruo renga minsâi ani hah ai mingil ani.

10 Masikin ka lâibungngei le sarnungei, Pathien'n a lungdoa nangni koina le thangna hah asôia omtit rangin ningsiet uol roi, ma anghan nin thôn chu nin taksônna hah mâk tet no tunui. 11 Ma anghan, ei Pumapa le Sanminringpu Jisua Khrista ringinlon Rêngrama lût theina akipin dikna pêk nîng nin tih.

12 Masikin, hi chong ngei hih zoratin rietmintharna nangni pêk bang ki tih, nin lei rietsai piel nikhomsenla, maleh chongtak nin changa han lei phun mindet ngit lei ni ta khom ungla. 13 Ki ringkâr chu hima roi ngei hih nin riettitna hah mohôk minhar tit inlang sâng atih, tiin ki mindon ani. 14 Ei Pumapa Jisua Khrista'n ânthârlaka mi lei ril anghan, hi thithei takpum hih chomolte suoleh chu khekpai ki tih, iti hih ki riet. 15 Ki thi suoleh khomin hi roi ngei hih zora tiin nin riettit theina rang lam nangni pêk rangin ke theidôr tho ki tih.

Khrista roiinpuina rietpuipungei

16 Ei Pumapa Jisua Khrista juong nôkna roiinpui a roi nangni kin min riet hah kin rachama kin phuotot thurchi ngeia inding mak meh, kin mit lelên ânlalna kin mu ani. 17 Ama hah Pa Pathien'n inlalna leh roiinpuina a pêka, a kôma Roiinpuina Ânchungtak renga rôl ajuon ringa “Ma hih ka Nâipasal moroitak, ka râisân tatak hah ani” a ti lâia han kin om ani. 18 Ha rôl hah a kôma muol inthienga kin om lâiin invân renga ajuonga, keini lelên kin iriet ani.

19 Masikin dêipungei chongphuong hah adet uolin ei rietminthâr ani. Ama chong nin rangâia anin chu tho minsa nin ta, khuo avâra, sikhovâr hah nin mulungrîla avâr mâka chu, ajîngna châti vâr angha ani sikin. 20 Adadang nêkin Pathien lekhabua chongphuong ngei hih tutên atheiin rilminthâr thei ngâi ni mak iti riettit roi. 21 Dêipuchong chongbe hih miriem jôtna sika suok ngâi ni maka, aniatachu miriemngei hah Ratha Inthieng jêka omin Pathien renga juong suok chong hah an iril ngâi ani.

*1:3 asatna chang ranga; aninônchu ama ta chang ranga; miziek senkhata chu ama renga.

1:17 Mat 17:1-5; Mk 9:2-7; Luk 9:28-35