Pathien Lekhabu Inthieng Chongtung Thar Sinthongei 1

Tîrtonngei an

SINTHONGEI

Chongmaruoi

Tîrtonngei Sintho bu hi “Thurchisa” Luke bu sûizomna ranga miziek ani. Akhîn lientak chu Jisua ruoisi masa ngei han Ratha Inthieng ruoina nuoia jerusalema, Judea ram le Samari ram pumpui ngeia le kôlmongngei dêna ama Thurchi Sa an lei minzar tie misîr hi ani (1:8). Mahi Khristien hong insôn tie, Judangei lâi renga rammuol pumpui ta ranga taksôna inkhat hong changna thurchi ani. A miziekpu ngei khomin a porengei ânthâr taka an minriet nôk nuom chu Khristienngei hi Rom sorkar doina pâl ni tet mak ngei, male Khristien taksôna hi Juda sakhuo tuon mintungpu ani uol.

Tîrton Sinthongei hih buk inthumin Jisua Thurchi Sa hih adik tia phuongna le koiindangngei minding tira a ram an minzar tit târ minlangin: (1) jerusalema Khristien sintho hong inphut renga Jisua invâna a kal tena Thurchi; (2) Palistine ram muntina ahong inzar titir thurchi; (3) Mediterranean ram sûng pumpuia Rome khopui ten dênin ahong inzar uol tie thurchi ngei hah ani.

Tîrton Sinthongeia sintho kâm omtak chu Ratha Inthieng sintho hi ani. Pentecost nia jerusalema iempungei chunga sinthotheina leh juong chuma koiindang le koiindang ruoipungei zoratina ruoia a mohôk minrât titpu tia Lekhabua târ minlang hah ani. Khristien masa ngei chongbe hih thurchi misîrnangeia pom ania Tîrton Sinthongeia lei minchuong ngei hin iempungei ringnuna le koiindang inzom khômna ngei khoma hi chongbe hin ranak adôn tiin aminlang ani.

Asûnga chongtângpuingei

Rietpuipu nitheina ranga insiemna 1:1-26

a. Jisua chongpêk le chonginkhâm nûktak 1:1-14

b. Judas ruthûl thangna 1:15-26

Jerusalema rietpuipu 2:1—8:3

Judea le Samari rama rietpuipu 8:4—12:25

Paul sinthona thurchi 13:1—28:31

a. Missionary khuolse voikhatna 13:1—14:28

b. Jerusalema inkhompui 15:1-35

c. Missionary khuolse voinikna 15:36—18:22

d. Missionary khuolse voithumna 18:23—21:16

e. Jerusalem, Caesarea le Rom Paul intâng ina aom chungroi 21:17—28:31

1 Moroitak, Theophilus:

Ke lekhabu motontaka han, Jisua'n sintho aphut lâia a sintho le a minchuna chongngei hah ki mizieka 2 invân tienga tuongin aom ni tena rilnangei hah. Tuongin a om mân han, a tîrton ranga a thang miriemngei kôm han Ratha Inthieng ranakin chongpêk a pêk zoi. 3 Athi suole a ring nôk ti an riet minthâr theina rangin sûn sômminli sûng hah chu vêl tamtak an kôm ânlâra, a chongpui ngeia, Pathien Rêngram thurchi a ril ngâia. 4 Male munkhatin an intûp lehan, ma chongkhâm hih a pêk ngei ani: “Jerusalem mâk no roi, nangni ki misîr pe ngâi neinun manboipêk hah lei ngâk roi, ka Pa'n ânkhâm hah. 5 John han tuiin a Baptis ngâia, aniatachu sûn tômte suole nangni chu Ratha Inthiengin baptis chang nin tih,” a tia.

Jisua invâna tuongin aom

6 Hanchu an intûpkhôm nôka, “Pumapa atûn hin mo Israelngei Rêngram ni minding nôk rang?” tiin tîrtonngeiin an rekela.

7 Hanchu, Jisua'n an kôm, “Azorangei le anikhuo chu ka Pa'n ama rachama om ranga a dar ani, anni ngei hah nin lei riet rang nimak. 8 Hannirese, Ratha Inthieng nin chunga ajuong tika chu sinthotheina la dôn nin tih, hanchu jerusalema, Judea le Samari ram pumpui ngeia, kôlkung dênin ko chong rietpuipungei nîng nin tih,” a tia. 9 Hanchu ma chong hah a ril suole chu an mu chungchakin invân tieng tuongin a oma, an muphâk khâi loina sûmin a tuongpai zoia.

10 Ha anga invâna a se an thîr lâitakin mi inik puonchek insilin an kôm inningloiin an juon dinga. 11 “Galilee mingei, ithomo invân tieng tanga nin inding chien? Hi Jisua nin kôm renga invâna tuonga ompu hih invâna ranga lâka aom nin mu angtakin la juong kîr nôk ngêt a tih,” an tia.

Juda Iscariot ruthûl an thang

12 Hanchu, tîrtonngei hah Olive Muol renga jerusalema an kîr nôk zoia, ma muol hah Jerusalem renga kilometer inkhat dôra ala ani. 13 Hanchu Khopuilien hah an lûta an omna ngâi khâltan chunginta han an kala: anni ngei hah Peter, John, Jakob, Andrew, Philip, Thomas, Bartholomew, Matthew, Alfai nâipasal Jakob, Zelot Simon le Jakob nâipasal Judas an ni. 14 Anrêngin nupangngei hah, Jisua nû Mary le Jisua urêngngei le mulung inruol takin chubaitho rangin an intûp bang ngâi ani.

15 Sûn tômte suole chu iempungei an intûpkhôma razakhat sômnik an nia, ha ngei lâia han Peter chong rangin ândinga. 16 “Ka champuingei, Ratha Inthiengin Jisua sûrpu ranga aruoipu Judas roi David bâia alei ril chong hah atung rang piel ani. 17 Ama hah ei kôma kop ngâi mi ania, hi ei sinthona hin khom rangtum dôn ranga alei thang ani,” a tia.

18 (Ama han saloi thona sum a man lehan mun inkhat a rochôka, ha muna han a thia a von apuok khoia arîlngei aterhet ani. 19 Ha roi hah jerusalema om murdi'n an rieta, masikin ma mun hah an chongin, Akeldama an tia ma mun hah “Thisen mun,” tina ani.)

20 “Lapuibua hi anghin ânzieka,

‘A omna in lei ram senla;

asûnga tute omno rese ngei’ ti le.

‘A sina mun midangin chang rese ngei.’

Ti hih miziekin alei om.

21-22 “Masikin, a ruthûl rang thang ngêt rang anânga, ei lâia tumakhat Pumapa Jisua sintho le sêna-hongna a rietpuipu ei lâia mi, John Baptis tholâi renga Jisua invâna a kal ni tena ama hah eini leh munkhata inthoinôkna rietpuipu ni rangin,” a tia.

23 Masikin mi inik: Joseph, Barsabbas an ti (Justus khom an ti sa ngâi) le Matthias an zena. 24 Masuole chu chubai an thoa, “Pumapa, nangman miriem mulungrîl murdi rietpu hi ngei inik hih tutak hi mo na thang mi min riet roh. 25 Judas ama muna a se theina ranga hi tîrton sin a mâkrak mun thûl rangin,” an tia. 26 Hanchu taruo an sâna, an taruosân hah Matthias chunga achula, ha anghan Matthias hah tîrton sômleikhat ngei lâia telsa ani zoi.

1:1 Luk 1:1-4

1:4 Luk 24:49

1:5 Mat 3:11; Mk 1:8; Luk 3:16; Joh 1:33

1:8 Mat 28:19; Mk 16:15; Luk 24:47,48

1:9 Mk 16:19; Luk 24:50,51

1:13 Mat 10:2-4; Mk 3:16-19; Luk 6:14-16

1:18 Mat 27:3-8

1:20 Lap 69:25; Lap 109:8

1:21-22 Mat 3:16; Mk 1:9; Luk 3:21; Mk 16:19; Luk 24:51