Pathien Lekhabu Inthieng Chongtung Thar Ephesi Mingei 1

EPHESI

Mingei Kôma Paul Lekhamuthuon

Chongmaruoi

Ephesi mingei kôma Paul lekhamuthuon hin amotontaka a minlang nuom chu “Pathien'n a mintuo invân le pilchunga a neinun sinngei nâm hih minchuna Khrista roineina nuoia aom let rang ani” (1:10). Jisua Khrista leh munkhat an ninna jâra miriemngei inruolna ranga hi neinun mintuona lien omtie min om theina rangin Pathien mingei kôma ngênna ani sa.

Ephesi miziek hih aphutna tieng chu a miziekpu hin inruolna hih chonglupuia mangin Pa Pathien'n a mingei a thang tie ngei, ngâidam an ni tie ngei, Nâipasal Jisua Khrista jâra an nunsienangei renga mojôk an ni tie ngei le Pathien chongkhâm hah Ratha Inthiengin khâmna a pêk tie ngei a misîr ani. A inikna chu Khrista leh munkhat an nina hah an ringnun han an minlang theina ranga aporepungei a ngênna ani.

Khrista leh inzoma Pathien mingei munkhat an ninna minlangna rangin chongmintêk tamtak mang ani. Koiindang hih takpum angin ania, Khrista chu a lu ani, aninônchu in angin ania, Khrista hah akila lung ania; aninônchu Khrista hah a lômpa angin ania, male koiindang hah a lômnu angin ani. Khrista taka Pathien lungkhamna mindonnân a mulung atôn ok sikin hi lekhamuthuon chong hih ânsâng ok ani. Khrista lungkhamna, inbôlnapêk, ngâidamna, moroina, le inthiengna vâr taka han neinuntin mu thei ani.

Asûnga chongtângpuingei

Chongmaruoi 1:1-2

Khrista le Koiindang 1:3—3:21

Khrista taka Ringna Thar 4:1—6:20

Chongkhârna 6:21-24

Chibaimûkna

1 Pathien nuomlama Khrista Jisua a tîrton Paul han,

Ephesi* taka om Pathien mingei, Khrista Jisua leh munkhata an ringnun taksônoma mang ngei.

2 Pathien ei Pa le Pumapa Jisua Khrista'n moroina le inngêina nangni pêk rese.

Khrista taka ratha satvurnangei

3 Pathien le ei Pumapa Jisua Khrista Pa kôm ei râisânchong mintung ei tih u! Khrista leh ên jômna sika han invânrama ratha satvurnangei nâm mi vura. 4 Rammuol insieng mân renga, Pathien'n Khrista jâra a makunga inthieng le minchâinaboi nirangin mi lei thangsai ani zoi.

A lungkhamna sikin 5 Pathien'n† Jisua Khrista jâra a nâingei mi minchang rangin alei mintuosai ani, maha a râisânna le a neinunkhîn ani. 6 A lungkhamna roiinpuitak hah, a nâipasal taka han neinun manboipêk mi pêk sikin Pathien chu minpâk ei tih u! 7 Khrista inbôlna thisen sikin‡ ei sietnangei ngâidamin, jôkin ei om zoi. Pathien moroina roiinpui tie hih, 8 minkhîna lientak mi pêk hi!

A vârna le a rietheina ngei nâmin 9 Pathien neinunkhîn ngei hah zoiin aoma, a lungdo inthup hah zoi ranga a lei khâm chu Khrista taka han min zoi rangin mi min riet zoi. 10 Ma a lungdo hah azora diktaka Pathien'n neinunsinngei nâm, invân le pilchunga omngei nâm minchunin Khrista han alutak ani rang. 11 Neinunngei murdi hih Pathien lungdo le a jêklam angtaka tho ania; hanchu Pathien'n aphutnataka a mintuo lam angtakin Khrista taka a mingei nirangin mi thang zoi ani. 12 Tho masikin eini Khrista lei sabei masa ngei hin Pathien roiinpuina minpâk ei tih u. 13 Sanminringna Thurchi Sa, chongtak nin riet lehan Pathien mingei nin hongni zoi. Jisua Khrista nin iema, male Pathien'n Ratha Inthieng a khâm lehan pumanina mohôr nangni nam ani. 14 Pathien'n a mingei a khâm pe ngei hah la man ei tih, ti hah ratha khâmna ania, Pathien mingei murdi zalên pharna pêk atih, ti khom mi min riet sa ani. Tho a roiinpuina minpâk ei tih u!

Paul chubaithona

15 Masikin keima khom, Pumapa Jisua nin taksôn le Pathien mingei nin lungkhamna ti ki riet renga chu, 16 Pathien kôm râisânchong ki mintung hih mong khâi mu-ung. Chubai ko thôna khom nangni ki riettit ngâi. 17 Male ei Pumapa Jisua Khrista Pathien, Pa roiinpuitak han, ama nin rietna rangin, Ratha vârna le inlârna nangni pêk rangin ke ngên ani. 18 Ama vâr nin mu theina rangin nin mulungrîlngei ân-onga, nangni a koina taka sabeina aom ngei, a mi inthieng ngei ranga a khâm satvurnangei kamâmruoi tamtak ngei le, 19 keini a iemngei kâra sinthotheina lien tie ngei hah nin riet theina rangin ke ngên ngâi ani. Hi râtna, kin chunga sin atho tit hih râtna inthieng 20 Khrista thina renga inthoinôka invânrama a chang tienga ânsung lâia a mang nanâk hah ani. 21 Khrista chu invâna roijêkpungei, rachamneipungei, sinthotheinangei, le pumangei; hi rammuol le rammuol a lahong om ranga rachamneipungei chunga riming ânchungtak a la dôn rang ani. 22 Pathien'n neinunngei murdi hih Khrista ke nuoia a dara, ma neinunngei murdi hah Pumapa ânchungtak han koiindang kôm a pêk zoi. 23 Koiindang chu Khrista takpum ani, mun nâma neinun murdi mikhippharpu kipna hah ani.§

1:1 Sin 18:19-21; 19:1

*1:1 Ephesi ti hih miziek senkhata chu dôn makngei

†1:5 4a makunga... A lungkhamna sikin; 5Pathien'naninônchu amakungah, male lungkhamna taka om rangin. Pathienin

‡1:7 thisen sikin; aninônchu Khrista thina inbôlnapêk sika hah.

1:7 Kol 1:14

1:20 Lap 110:1

1:22 Lap 8:6

1:22 Kol 1:18

§1:23 mun nâma neinun murdi mikhippharpu kipna hah; aninônchu Pathien renga kippharna asipin adônpu nanâk hah.