Pathien Lekhabu Inthieng Chongtung Thar Hebrews 10

1 Juda Balam hah neinunngei atak phuozek dûr akip le taksônom nimaka; neinun sa juon lang rang rimil minenna vai kêng ani. Kumtin inbôlna ngâi deden hah kumtuongin an pêk ngâi ani. Kho angin mo Balam han ma anga inbôlna ngei sika han Pathien kôma hong mingei hah achukpharin asin thei ranga? 2 Pathien chubaimûk ngei hah an sietnangei renga a minthieng ngei tatak nisenla chu, sietnân theiloi an intum bangin inriet khâi noni ngeia, male inbôlna ngei hah inngam atih zoi. 3 Ma anghan, nikhomrese ma inbôlna han kumtin mingei an sietna a min rietsuok nôk ngei ngâi ani. 4 Sechalngei le kêlngei thisenin sietnangei hah alâk pai thei tet loi sikin.

5 Ma siktak han, Khrista'n rammuola a juong rang lâihan Pathien kôm:

“Nangman inbôlna ngei le neinunpêkngei nuom mak chea,

Keima rangin takpum mi ni minsûk pe zoi.

6 Mâichâm chunga sa pumpui hâlminvâmngei le sietnangei lâk pai ranga

inbôlna ngei hah na râiminsân tet mak che.

7 Male Keiman,

‘O Pathien, Balam lekhabua ku thurchi mizieka lei om anghan

nu lungdo sin rangin hin ko om,’ ” ki tia.

8 Motontaka ama'n, “mâichâm chunga inbôlna ngei le neinunpêkngei aninônchu sa pum hâlminvâmngei le sietnangei lâk paina ranga inbôlna ngei hah nuom khom nuom mak che, na râi khom minsân mak che a tia.” Hima inbôlna ngei murdi hih Balam dungjûiin pêk nikhomsenla ma anghin a ti ani. 9 Hanchu, “O Pathien, nu lungdo sin rangin keima hin ko om,” a tia. Masikin Pathien'n inbôlna muruo ngei hah a min hekleta, mangei ruthûla han Khrista inbôlna hi a dar zoi ani. 10 Jisua Khrista'n Pathien lungdo a sina, ama takpum ngêt hah voikhatin anrênga rangin ânpêk phar sikin ei rêngin sietna renga ênthieng zoi ani.

11 Juda ochai tinin nîngtin an sintum sinin inbôlna ngâi dedên hah voi tamtak an pêk ngâia; aniatachu ma inbôlna ngei han sietnangei lâk pai thei tet mak. 12 Nikhomrese, Khrista chu sietnangei inbôlna rangin voikhat ânpêka, maha kumtuonga omtit rang ani zoia, masuole chu Pathien kut changtieng a hon sung zoi. 13 Atûn chu Pathien'n a râlngei a kepha nuoia a dar pe mâka chu mahan a ngâk tit ani. 14 Hanchu, voikhat inbôlna leh an sietna minthienga omngei ha chu kumtuonga rangin achukpharin a sin ngei zoi.

15 Hanchu Ratha Inthieng khomin ama rietpuipu mi pêk sa. Amotona,

16 “Nikhuo hong tung ranga anni ngei leh chonginkhit ki sin rang chu

mahi ani, Pumapa'n a ti:

An mulung sûnga ka balamngei dar ka ta,

male an mulungrîla miziek ki tih.”

17 Masuole chu, “An sietnangei le an tho minchâina ngei riettit khâi no ning,” a tia. 18 Masikin ma anga ngâidamna omna taka han chu sietnangei min boina rangin neinunpêk nâng khâi no nih.

Pathien nâi ei ti u

19 Hanchu, ka lâibungngei le ka sarnungei, Jisua thina sikin Mun Inthiengtaka han phukdâiriemin ei lût thei zoi ani. 20 Ama'n puondûng (a takpum) renga lam thar le lam ring ei ta rangin mi mo-ong pe zoi. 21 Pathien insûng donsûipu ochai roiinpuitak ei dôn ani. 22 Masikin mulungrîl indîn le taksônna adiktak dônin, sie le sa rietna dikloi renga ei mulungrîlngei minthiengin le ei takpumngei tui inthieng leh minsaîin Pathien nâi ei ti u. 23 Ei sabeina phuong hih sûr mindet tit ei ti u, Pathien chu a chonginkhâma taksôn aom sikin. 24 Inkhat le inkhat inlungkhamna minlang inlômin, inkhat le inkhat insan inlômin, sin sa inthope inlôm rangin mindon pak ei ti u. 25 Mi senkhatngei an thônzong anghan ei intûp inkhom mâk no u. Manêkin Pumapa Nikhuo hah ahong nâi uolin nin mûn chu inkhat le inkhat inmohôk inlôm u-uol ei ti u.

26 Chongtak ei riet suonûkin nunsie ei la tho bangin chu nunsie ngei lâk pai nôkna rangin inbôlna om khâi no nih. 27 Manêkin, aom rang chu chi puma Roijêkna le mei inthang Pathien doi ngei kâng inmangna rang ngâkna vai kêng ani zoi! 28 Tukhom Moses Balam jômloi chu, ama theiloi nina rangin rietpuipu inik mini, inthum mini an omin chu moroina boiriekin that ani ngâia. 29 Pathien Nâipasal mumâka, Pathien chonginkhitna thisen ama minthiengna neinun itea be loia, moroina Ratha êro mi hah khodôra dûkmintongna sietuol mo tuong rangin nin minhoi? 30 “Phuba chu keiman lâk ka ta, Keiman thuon ki tih” a tipu le “Pumapa'n a mingei roijêk a tih,” ti hah ei riet sa. 31 Pathien ring kuta chul chu neinun chi omtak ani!

32 Zora vunsaia kho angin mo neinun nin chunga hong om ngei hah riettit roi. Pathien vârin nangni a êl suonûkin ma sûnngei han dûk tamtak nin tuonga, hannoma injêlna han nangni mene mak. 33 Zora khat chu mipui makunga nangni erôn an nuom nangni an loa, zora danga chu ma anga an lei mintuongei leh munkhatin nin tuonga. 34 Mi intângngei tuongna hah nin tuongpuia, male nin neinun dôn murdi nangni an sûr pe lâi khom han, kumtuonga sôi rang neinun sa uol nin la dôn ti nin rietin ma nin machânna khom hah râisântakin nin tuong ani. 35 Râisânman roiinpuitak a mintung rang sikin nin hâina hah minmang no roi. 36 Pathien lungdo nin sina, a chonginkhâmngei hah nin man theina rangin dierna nin nâng ani. 37 Pathien Lekhabu'n,

“Chomolte suole chu, a juong rangpu hah juong a tih zoi;

ama hah innu no nih.

38 Hannirese, ki midik chu iem a ta male ring a tih;

aniatachu an lâia tu mini nûktieng an tolin chu,

a chunga ka râisân no nih,” a ti anghan.

39 Eini chu nûktieng ântola ânmang rang mi nimak me. Manêkin, taksônna dôna sanminring ni rang mi kêng ei ni.

10:5 Lap 40:6-8 (LXX)

10:11 Jôk 29:38

10:12 Lap 110:1

10:16 Jer 31:33

10:17 Jer 31:34

10:22 Och 8:30; Ezek 36:25

10:27 Isa 26:11 (LXX)

10:28 Bal 17:6; 19:15

10:29 Jôk 24:8

10:30 Bal 32:35,36

10:37 Heb 2:3,4 (LXX)