Pathien Lekhabu Inthieng Chongtung Thar LUKE 6

Sabathni roia chongrekel

(Mat 12:1-8; Mk 2:23-28)

1 Jisua'n Sabath nîn loilâi a pala, a ruoisingeiin buvûi an china, an kutin an muoi minsâia, an sâka. 2 Pharisee senkhat ngeiin, “Ithomo, ei Balamin Sabathnia tho loi ranga ai ti hah, nin thoa?” tiin an rekela. 3 Jisua'n an kôma, “David le a mingeiin an vonchâm lâia an itho hah nin pore ngâi loi mini? 4 Pathien Ina a sea, Pathien ranga ipêk, Ochaingei tiloiin chu tûte sâk rang Balam niloi vâipôl a laka, a sâka, a mingei a minsâk hah?” tiin a thuona. 5 Hanchu Jisua'n, “Miriem Nâipasal hih Sabathni Pumapa ani” a tipe ngeia.

Miriem kut phalkhatthi

(Mat 12:9-14; Mk 3:1-6)

6 Hanchu, Sabathni danga chu Jisua Synagog taka a sea, a minchu ngeia, mahan mi inkhat kut changtienga phalkhatthi a oma. 7 Balam minchupungei senkhat le Pharisee senkhat ngeiin Jisua an nôn theina rang abi rokin Sabathnin a mindam le a mindam loi an enrichika. 8 Jisua'n an mindonna a rieta, damloi kôma, “Inding inla moton tieng hin hong roh,” a tia, hanchu ânthoia ânding zoia. 9 Hanchu Jisua'n an kôma, “Ei Balamin Sabathnia, asa rangin mo, dûk mintong rangin mo? mi phal. Mi ringna min jôk rangin mo, minmang rangin mo?” a tia. 10 An rêngin a en titira, hanchu, a kôma, “Nu kut phar roh” a tia*. A phara, a kut a dam pe zoia. 11 Hanchu, an taksi oka, Jisua chunga an tho thei rang lam an inkereng zoia.

Jisua'n ruoisi sômleinik a thangsuok

(Mat 10:1-4; Mk 3:13-19)

12 Ma zora han Jisua chubai tho rangin muol chunga a sea, mahan, Pathien kôm jânkhovârin chubai a thoa. 13 Hanchu khuo a hong vârin chu a ruoisingei a koibûma, an lâia mi sômleinik a thanga, Tîrton, ai be ngei chu, 14 Simon (Peter, ai phuo) le a nâipa Andrew; Jacob le John, Philip le Bartholomew, 15 Mathew le Thomas, Alpheaus nâipasal Jacob le Simon (zelot an ti) 16 Jacob nâipasal Judas le a minsûrpu, Judas Iscariot ngei anni.

Jisua a minchuna le a mindamna

(Mat 4:23-25)

17 Hanchu, Jisua le tîrtonngei hah muol chung renga an juong chuma, a ruoisi tamtak ngei leh mun inchamna an indinga, ha muna han mipui tamtak Judea ram murdi renga, Jerusalem renga, tuikhanglien pang khopuilienngei, Tyre le Sidon renga mingei an oma. 18 A chongril rangâi rang le an natna ngei mindam ranga hong anni. Ratha saloi ngeiin dûk an mintong ngei khom an honga an dama. 19 A sinthotheina a jôk sikin, mipui murdi'n ama tôn rangin an bôka, an rêngin an dam pak zoi.

Satvurnangei le ngâisietna

(Mat 5:1-12)

20 Jisua'n, a ruoisingei a ena, a tia,

“Nangni ânriengngei chu satvur nin ni,

Pathien Rêngram nin ta ani sikin.

21 Nangni atûna vonchâmngei,

chu satvur nin ni,

Nin la khop rang sikin.

Nangni atûna a chapngei,

chu satvur nin ni,

Nan lân nui rang sikin!”

22 “Miriem Nâipasal sika, mingeiin nangni an mumâka, nangni an henga, nangni an êroa, puoloingei nangni an ti tena, chu satvur nin ni. 23 Ma anghan a hong tungin chu râisânin lâm roi. Invâna, râisânman luttak nin rangin dara a om sikin. Asikchu an richibulngei khomin dêipungei chunga ma angdên han an lei tho ngâi ani.”

24 “Ania, nangni atûna ânchongngei,

nin chung ântak, nunkhohoi nin mang zoi sikin!

25 Nangni atûna akhopngei, nin chung ântak,

Nan la châm rang sikin!

Nangni atûna ânnui ngei nin chung ântak,

Inngûia nan la chap rang sikin!”

26 “Mi tinin nangni an minpâk tenan chu nin chung ântak, ha ang dêna han an richibulngei khomin dêipu dikloingei an lei manpâk ngâi ani.”

Râlngei lungkham rang roi

(Mat 5:38-48; 7:12)

27 “Ke he ariet murdi'n, nan râlngei lungkham ungla, nangni mumâk ngei satna rang tho pe ngei roi. 28 khomâk nangni sâm ngei satvur ungla, dûk nangni tho ngei chubai tho pe roi. 29 Mîn na mâi a bêna anîn chu, kângkhat tieng khom do pe sa roh, mîn na kâncholi chung a lâka anîn chu asûnga khom pêk sa roh. 30 Mîn neinun nang an zonga anîn chu pêk roh, na ta an lâk khomin zong khâi no roh. 31 Nu chunga na nuomlam an tho angin mi chunga tho roh. 32 Mi lungkham nangni mu ngei vai lungkham nin mun te, inmo satvurna nan man ranga? mi nunsiengeii luo anni lungkham amu ngei chu anni khomin an lungkham ngâi. 33 Nin chunga sin sa tho ngei vai chunga sin sa nin thoa aninte inmo satvurna nin man ranga? Mi nunsiengeiin luo ha anga han chu an tho ngâi. 34 Man nôk ranga na sabei ngei kôma vai ne pêka aninte, inmo satvurna na man ranga? Mi nunsiengeiin luo, abipui man nôkna rangin chu, mi nunsiengei kôma an pêk ngâi! 35 Ni thei no nih! Na râlngei lungkham inla, an satna rang sin pe ngei roh, ite man nôk rangin sabei loiin mintâng ngei roh. Hanchu, râisânman alien man nan ta, Ânchungtak Pathien nâingei nîng nin tih. Ama chu râisânna chang riet loi ngei le mi nunsiengei a lungkham ngâi. 36 Nin pa'n mi a lungkham angin nangni khomin lungkham roi.”

Mi chungroi jêk

(Mat 7:1-5)

37 “Midang jêk no ungla, Pathien'n nangni jêk no nih. Midang dem no ungla, Pathien'n nangni dem no nih. Mi ngâidam ungla, Pathien'n nangni ngâidam a tih. 38 Pêk ungla, hanchu, Pathien'n nangni pêng a tih, mintena sa, namdên êt, le inîkin, min liemin, nin kuta akeng theidôrin nangni pêng a tih. Mi nin minte pena nanâka han Pathien'n nangni minte pênah a tih,” a tia.

39 Jisua'n hi chongmintêk hih a rila, “Mitcho inkhatin mitcho adang ruoi thei mak; a ruoia anîn chu an ruonin khursodopa tâk an tih. 40 Minchupu nêkin ânchûpu lien uol maka, han, ânchupu khom a zoi tikin chu minchupu ang a tih. 41 Ithomo, ni mita thingbong a om mindon bak loia, na lâibungpa mita ronok a om hah ne en? 42 Inmo ni mita thingbong mu loiin, na lâibungpa kôma, ni mita ronok nang lei kêl pe rong ni ti thei ranga? Asarotholngei, Ni mita thingbong kêl bak inla, hanchu, na lâibungpa mita ronok mu minthâr thei ni tih.”

Thingkung le amara

(Mat 7:16-20; 12:33-35)

43 “Thingkung adamin mara saloi inra maka, thingkung damloiin mara sa inra ngâi mak. 44 Thingkung tin an mara chita ei riet; riling rânga theichang pot ngâi mak chea, riling ranga grape pot ngâi mak che. 45 Mi sân chu a mulung sûnga neinun sa a kelsuoa, mi nunsien chu a mulung sûnga neinun saloi a kelsuo ngâi, mulung sûnga asip hah kêng bâiin a misîrsuok ngâi.”

In sin inik ngei

(Mat 7:24-27)

46 “Ithomo ko chongbe jôm loia, Pumapa, Pumapa, mi nan ti? 47 Tukhom ko kôma honga, ko chong rangâia ko chongjôm chu imo ai ang nangni ril ki tih. 48 Ha mi hah chu a in sin lungpui chunga a lungphûm inthûk taka phun ang hah ani. Tuilienin a suka, innîk maka, adet ngita sin ani sikin. 49 Ania, tutukhom ke he rieta, ko chong jôm loi chu, lungphûm loia in sina, tuilienin asuka, achim kelena, ânphôi chit ang hah ani,” a tia.

LUKE
<
6
>

6:1 Bal 23:25

6:4 Och 24:9

6:4 1 Sam 21:1-6

*6:10 tia; Miziek senkhat ngei chu taksitakin a tia tiin an dôn.

6:22 1 Pet 4:14

6:23 2 Rich 36:16; Sin 7:52

6:31 Mat 7:12

6:39 Mat 15:14

6:40 Mat 10:24,25; Joh 13:16; 15:20

6:44 Mat 12:33

6:45 Mat 12:34