Pathien Lekhabu Inthieng Chongtung Thar LUKE 10

Jisua'n sômsarileinik ngei a tîrna

1 Masuole chu, Pumapa'n, midang sômsarileinik* a thanga, abop abopin an sena rang khopuitina le muntina, ama motona a tîra. 2 An kôma, “Bu ât rang atama, ania a mintûp ranga sin rang mi an tôm, Masikin, a bu mintûp ranga sintho rang mi tîr rangin bu pumapa kôm ngên roi.”

3 “Se roi! Melang lâia belrite om anga han nangni ki tîr ani. 4 Sumkok mo, cholite mo, kekok mo, chôi no roi; lampuia khom tute chibai no roi. 5 In nin lûtna kipa, ‘Hi ina hin rathanngamna om rese’ ti bak roi. 6 Rathanngamna midit mi an oma anîn chu nin rathanngamna chibai hah an chunga om a tih; an om nôn chu nin chibai hah lâk kîr nôk roi. 7 Nin tungna ina han omtit ungla, nangni an pêk murdi sâk ungla, nêk roi, sinthopu chu lo pêk rang ani sikin. In tin lôrdul no roi. 8 Khopui nin lûta nangni an modôma anîn chu, nangni an pêk kai chu sâk roi. 9 Ma khuoa damloi ngei mindam ungla, an kôma, ‘Pathien Rêngram nin kôma ajuong nâi zoi’ tipe ngei roi. 10 Khopui nin lûtna nâm nangni an modôm nôn chu, lampuia jôkpai ungla, 11 nin khopuia pildi, kin kea kop tena khom nin chunga kin khôngthâk nôk vang ania, ‘Pathien Rêngram chu nin kôm ajuong nâi zoi!’ tipe ngei roi, a tia. 12 Nangni ki ril, Pathien Roijêk Nikhuo tika chu, ma khopuingei tuong rang nêkin chu, Sodom chu ajâi om uol atih!”

A Iemloi khuongei

(Mat 11:20-24)

13 “Korazin, na chungroi arik bah na! Bethsaida, khom na chung roi arik bah na! Nangnia sininkhêl itho ngei hah Tyre le Sydon khuoa tho nisenla chu, thoila puon insilin, pildi inpolin an sietnangei insîr an tih. 14 Roijêk Nîn chu nin tuong rang nêkin Tyre le Sydon chu ajâi om uol an tih. 15 Nangma Capernaum khom, nethenin invân idênin nên pâk rang mini? Dûkmuna kêng vôrpai na ni rang.”

16 Jisua'n a ruoisingei kôma, “Tutu nin chong rangâi chu ko chong rangâi ani, tutu nangni heng chu ni heng ani, tutu ni heng chu ni tîrpu heng ani,” a tia.

Sômsarileinik ngei hongkîr

17 Hanchu, † sômsarileinik ngei hah râisân takin an hong kîra, “Pumapa, ni rimingin ramkhoringei tena kin chong an jôm” an tia. 18 Jisua'n a thuon ngeia, “Soitan, invân renga kôlinlek anga juong tâk ku mu,” a tia. 19 An kôma, “Rangâi roi, murûlngei le âinuvet chunga lôn theina le râlngei roineina chunga rachamneina nangni ke pêk, itên nangni minna thei noni ngei,” a tia. 20 “Ania ramkhoringeiin nin chong an jôm sikin nan râiminsân no roia, Invâna nin riming mizieka a om sikin nan râiminsân roi” a tipe ngeia.

Jisua râisânna

(Mat 11:25-27; 13:16-17)

21 Ma zora han Jisua Ratha Inthiengin‡ a sipa, “O Pa, invân le pilchung Pumapa, mivâr, mi theithiem ngei kôma ni ip, mi inmôlngei kôma nu phuong sikin nang ki minpâk. Ani, O Pa, maha nu lungdo le na nuomlam tak ani,” a tia. 22 Ka Pa'n neinun murdi ni pêk zoi. Tutên, Pa ti loiin chu Nâipasal riet mak. Tutên Nâipasal ti loiin chu Pa khom riet mak, Nâipasalin ânphuongna ngei tiloiin chu. 23 Hanchu, Jisua ruoisingei tieng ân heia, inrûkten, “Hi ngei nin mu hih idôra mi satvur mo nin ni! 24 Dêipungei, rêngngei tamtakin nin mu ngei hih mu rang an nuoma chuh mu mak ngei, nin iriet ngei a riet an nuoma chuh riet mak ngei,” a tipe ngeia.

Samari misa Chongmintêk

25 Balam minchupu inkhat Jisua minvak rangin a honga, a kôma, “Minchupu, Kumtuong ringna ka manna rangin imo ki sin rang?” a tia. 26 Jisua'n a thuona, “Lekhabu'n imo ati? Imo no pore ngâi?” a tia. 27 Hanchu ama'n, “Pumapa na Pathien chu, nu mulung murdi'n, ni ringna murdi'n, na râtna murdi'n ni mindonna murdi'n lungkham roh. Nangma lung nên kham anghan nu bungmingei lungkham roh ati,” tiin a thuona. 28 Jisua'n a kôma, “Ni ti mindik, ha angtak han thô inla, ring ni tih,” a tia.

29 Hannisenla, Balam minchupu hah theiintum nuomin, Jisua kôma, “Tumo ku bungngei?” a tia. 30 Hanchu, Jisua'n a thuona, “Hanchu voikhat, mi inkhat Jerusalem renga Jericho'a a sea, inru ngei a tonga, an jêmpola, an tôk bita, a thi vângin an mâk raka. 31 Hanchu ha lampuia han ochai inkhat a juong sea, ha mi hah a mûn chu lam dang tieng a piela. 32 Ma ang nanâk han, Levi mi a juonga, a ena, hanchu lamsîr tieng a piela. 33 Hanchu, Samari mi inkhat han ha lampuia lônin a honga, a mûn chu lungkham a mua. 34 A kôm ava pana, a sâbengei sariek le uain a buoka, a thom pea, a sakuording chunga a minchuonga, khuol tung ina a tuonga, a donsûi zoia. 35 A nangtûka chu, sum dârnik a kelsuoa, khuol tung in enkolpu a pêka, ‘Lei donsûi inla,’ a chunga na thâm kai chu ko hong kîr nôk tika nang thuon ki tih” a tia.

36 Jisua'n, a kôma, “Inthum ngei lâia han atu tak ha mo inru ngei tongpu bungmi ani ranga ni iem?” a tia. 37 Balam minchupu han a kôma, “inriengmupu tak hah” tiin a thuona. Jisua'n, “Sênla, nang khom ha ang tak han tho roh,” a tipea.

Jisua'n Martha le Mary a pan

38 Hanchu, Jisua le a ruoisingei an khuol se nân, khuo inkhata an lûta, nupang a riming Martha a ina a modôm ngeia. 39 A juorpuinu riming chu Mary ani, ama han Pumapa ke bula insungin, a chongril a rangâia. 40 Ania, Martha chu sinthôn ânpol oka, a honga, “Pumapa, kênzirpui nûn ke theivaia sintho ranga ni mâkrak hih ni mindon pe mak che mo hi?” ni hong san rangin tipe roh! a tia. 41 Pumapa'n amanu kôma, “Martha, Martha, neinun tamtak ni mindon sika nênjêl kêng. 42 Inkhat vai kêng ai nâng, Mary hin neinun dik a thanga, a kôm renga isut nôk rang ni khâi mak,” a tipea.

LUKE
<
10
>

*10:1 sômsaileinik; ti hih miziek senkhat ngei chu sômsari tiin an dôn

10:2 Mat 9:37,38

10:3 Mat 10:16

10:4 Mat 10:7-14; Mk 6:8-11; Luk 9:3-5

10:7 1 Kor 9:14; 1 Tim 5:18

10:10 Sin 13:51

10:12 Aph 19:24-28; Mat 11:24; Mat 10:15

10:13 Isa 23:1-18; Ezek 26:1—28:26; Joel 3:4-8; Amos 1:9,10; Zak 9:2-4

10:15 Isa 14:13-15

10:16 Mat 10:40; Mk 9:37; Luk 9:48; Joh 13:20

†10:17 72; miziek senkhata chu 70 an dô (arachang 1 na en roh)

10:19 Lap 91:13

‡10:21 Ratha Inthiengin miziek senkhat ngei chu Ratha han; an tia senkhat nôk chu a ratha han tiin an dôn.

10:22 Joh 3:35; Joh 10:15

10:25 Mat 22:35-40; Mk 12:28-34

10:27 Bal 6:5; Och 19:18

10:28 Bal 18:5

10:33 2 Rich 28:15

10:38 Joh 11:1