Pathien Lekhabu Inthieng Chongtung Thar LUKE 17

Inpalna

(Mat 18:6-7; 21:22; Mk 9:42)

1 Jisua'n a ruoisingei kôma, inpalna hih omloi thei nimak, ania inpalna min ompu chung chu ântak bah na! 2 Hi mi chînte ngei lâia inkhatlam minpal chu, a minpalpu ringa han bunôilung minlîn tuikhangliena vôrpai ni senla, ata rangin sa uol a tih.

3 Singthei roi, na lâibungin nunsie a thôn chu ngo roh, ânsîrin chu ngâidam roh. 4 nu chunga sûnkhatin voi sari saloi a thôn, voi sari kênsîr tiin, no kôm a hongin chu, na ngâidam ngêt rang ani.

Taksônna

5 Ruoisingei han a kôma, “Pumapa, kin taksônna mi min detpe uol roh,” an tia.

6 Hanchu, Pumapa han, “Ancham ru dôra hih taksônna nin neia anîn chu hi thingtheimu kung hih hong inphôi inla, tuikhangliena hong inphun roh, tîng nin ta nin he rangâi kelen atih,” tiin a thuona.

Tîrlâm sintum

7 “Hanchu, nin lâia tumakhatin, tîrlâm pil tukin mo, belri hôlin mo, nei ungla, chuon a hong tungin, ‘Bukhalâi hong ot kelen roh’ tumo a ti rang nin nia? 8 Manêkin, ‘Ku bukhalâi ni do bak inla, rovo tho inla, ka sâk ke nêk suo mâka ni ngâk roh, masuole nêk ni tih,’ tumo a ti loi ranga? 9 Suokin chong a jôm sikin tumo râisânchong a ril ngâi? 10 Ma ang tak han, nin sintum nin sin suonûk khomin, tîrlâm papai kêng ei ni, ei sintum ei sin chak kêng nin ti rang ani.”

Jisua'n miphâr sôm a mindam

11 Hanchu, Jisua'n Jerusalem a se malamin, Samaria le Galilee kâra ramria a lôna. 12 Khuo inkhat a lûtin chu miphâr sômin an intongpuia. Lâtaka an indinga, 13 an inieka, “Jisua Minchupu, inrieng mi mu roh!” an tia. 14 Jisua'n a mu ngeia an kôma, “Se ungla, ochaingei kôma vân en roi” a tipe ngeia. Lampuia chu an dam zoia.* 15 Inkhatin chu a dam zoi iti a rietin chu, rôl inringtakin, Pathien minpâk pumin a hongkîr nôka. 16 Jisua ke bula inbokin râisânchong a rila, ha mi hah Samaria mi ani. 17 Jisua'n, “A damngei hah mi sôm nin nia, adang ikuo ngei hah khonmo an om? 18 Ithomo hi ramdangmi vai himo Pathien minpâk ranga hongkîr nôk?” a tia. 19 Hanchu, a kôma, “Inthoi inla se ta roh, na taksônna hin nang a mindam ani,” a tipea.

Pathien Rêngram juongtung

(Mat 24:23-28,37-41)

20 Pharisee senkhat ngeiin Pathien Rêngram juongtung rang roi an rekela, Jisua'n, “Pathien Rêngram chu mu theiin juongtung no nih. 21 Tutên ‘En roh,’ hin kêng a om, son kêng a om ti no nih. Pathien Rêngram chu nin lâia kêng a om,”† tiin a thuona.

22 Hanchu, a ruoisingei kôma, “Miriem Nâipasal ringlâi sûn hi sûnkhat te luo nin mu nuom ni, la om a tih; ania mu khâi no tunui.” 23 Mîn nin kôma, “ ‘En roh sô soh!’ ‘En roh hi hih,’ tîng an tih, ania, a en rangin vase no roi. 24 Invâna kôl ânleka, kôlkung renga kôlmong dêna ai vâr ngâi anghan, Miriem Nâipasal juong ni lechu, nîng a tih. 25 Ania, ma mâna han tuong ok a ta, atûnlâi mingei hengpaiin om a tih.”

26 Noah zora lâia anghan Miriem Nâipasal zora khom nîng a tih. 27 Noah, rukuonga a lûta, tuilienin a that riei mâka chu mitinin an sâkin an nêka, nupang pasal omsiet an tho ngâi. 28 Lot zora anghan mi tinin an sâkin an nêkin, an rochôka, an juora, an linga, in an sin ngâia. 29 Lot'n Sodom a mâk nin chu mei leh kât invân renga a juonga, a that riei ani. 30 Ma anghan, Miriem Nâipasal juong inlâr nîn chu juong om a tih.

31 Ha nîn chu inchunga ompûn, a neinun lâk rangin chum no rese. Ha angdênin, loia om khomin a ina hongkîr no rese. 32 Lot lômnu riettit ngâi roi. 33 Tutu a ringna mojôk rang bôk kaiin machân an ta, a machân kaiin jôk an tih. 34 Nangni ki ril, ha ni jânin chu, jâlmun khata mi inik jâl an ta, inkhat tuong nîng a ta, inkhat mâk nîng a tih. 35 Nupang inikin sângsuk an ta, inkhat tuong nîng a ta, inkhat mâk nîng a tih. 36 Loia mi inik om an ta, inkhat tuong nîng a ta, inkhat mâk nîng a tih, a tia. ‡

37 Hanchu, ruoisingeiin, “Pumapa khotieng mo?” an tia. Jisua'n, “Ithi ruok omna kipa sêlkurungei intûp an tih,” a tia.

LUKE
<
17
>

17:3 Mat 18:15

17:14 Och 14:1-32

*17:14 an inthieng zoia: 5:12. en roh

†17:21 nin sûnga; nônchunin kâra, nônchuharenghan nin lâia inlang a tih.

17:26 Aph 6:5-8

17:27 Aph 7:6-24

17:28 Aph 18:20—19:25

17:31 Mat 24:17-18; Mk 13:15-16

17:32 Aph 19:26

17:33 Mat 10:39; 16:25; Mk 8:35; Luk 9:24; Joh 12:25

‡17:36 Senkhatin rachang 36 na dôn mak ngei: Mi inik loia chuonsin an ta: inkhat tuongpaiin om a ta, adang hah mâksan nîng a tihen roh, Mat 24:40.