Pathien Lekhabu Inthieng Chongtung Thar Philimon 1

PHILIMON

Kôma Paul Lekhamuthuon

Chongmaruoi

Philimon chu Khristien inlârtak ania, Colossa koiindanga mi inkhat le suok inkhat a riming Onesimus puma ani. Hi suok hin a pu renga a rot paia, masuole kho angin mini Paul leh intângna ina aom sûngin an hong intong ani. Paul jârin, Onesimus hih Khristien a hong chang zoi ani. Philimon kôma Paul Lekhamuthuon hi Paul'n a kôm a tîr mikhîr pe nôka, a suok hih Philimon'n a lên ngêipui nôk rang le suok ngâidam sai anghan vai niloiin, Khristien lâibung anghan lamdon lei tho ranga ngêna ani.

Asûnga chongtângpuingei

Chongmaruoi 1-3

Philimon rang Minpâkna 4-7

Onesimus ranga ngêna 8-22

Chongkhârna 23-25

1 Paul, Khrista Jisua jâra mi intângpu le ei lâibungpa Timothy renga,

Kin mal le kin sinthopu champui Philimon kôm, 2 le ni insûnga koiindang intûp ngâi ngei le kin sarnu Apphia le kin râlmi champui Archippus:

3 Pathien ei Pa le Pumapa Jisua Khrista'n moroina le inngêina nangni pêk rese.

Philimon lungkhamna le taksônna

4 Lâibungpa Philimon, chubai ko tho racham ni riming dênin ka Pathien kôm râisânchong ki ril ngâi ani. 5 Pathien mingei murdi chunga lungkhamna le Pumapa Jisua han taksônna no dôn tit ke lei riet sikin. 6 Ku chubaithona tak chu iempungei anghan nangma leh kin inlopkhômna chungroi hin Khrista leh inzoma ei ringnuna satvurna murdi ei dôn ngei hih rietheina inthûk uol amintung theina rangin ani. 7 Lâibung moroitak, nu lungkhamna han râisânna lientak le mohôkna tamtak mi mintung pe ani! Pathien mingei mulungngei murdi ni mintâi ani.

Onesimus ranga ngêna

8 Masika hin Khrista han na lâibungpa anghan imo ni sintho rang ruo chong nang pêk hih ngam bâk rang khom ni ronga. 9 Aniatachu, manêkin nang ku lungkhamna sikin, keima Paul nikhom ronga, hima hih thôn Khrista Jisua palâi, male atûn hin khom ama jâra mi intângpu nikhom ronga ngêna ko dôn ani.* 10 Intângna ina ko om sûngin Khrista taka han ka nâipasal lelê; rathatienga a pa ko hongni, masikin Onesimus ruthûlin no kôm ngêna ko dôn ani. 11 Ama hih moton han chu nangma rangin mangmunboi ania, aniatachu atûn hin chu aruonin nang rang le kei rangin mangmunomtak† ani zoi.

12 Atûn hin no kôm ko hongtîr nôka ama lehin ku mulungrîl khom ahong sa ani. 13 Masikin, ama hih nu ruthûla ni san theina rangin thurchisa jâra intângna ina ko om sûngin ko kôm hin la dar rang ku nuom ani. 14 Nikhomrese, mi san rangin nang dânderit nuom mu unga; manêkin, ma ha chu nu lungdo angin no tho rangin ku nuom ani. Masikin, no jôtna boiin ite tho noning.

15 Masikin Onesimus'n nangma renga chomolte a rot hih zoratin no dôn nôk kelen theina rang sika khom ani thei. 16 Atûn hin ama hih suok papai niloiin suok nêka sa uol ok: ama hih Khrista taka han lâibung moroitak ani zoi. Keima ta rangin khodôr tak mo ani rang ni zoi! Male nangma ta rang vângin chu ala ni uol rang, aruonin suok anghan le Pumapa han lâibung anghan ani rang ani zoi!

17 Masikin no lôm anghan mi ni mindonin chu, keima lamdon mi ni lei tho rang anghan ama hih lamdon lei tho nôk roh. 18 Nu chunga a tho minchâina tete aoma, ân tângna tete aom lekhom keima ka lakâiin minsâp roh. 19 Mahin, ku kut lelên hima hih ki miziek rang: Keima, Paul'n nang thuon nôk ki tih. (Ko kôma nên tâng khet ti nang ki min rietnôkna chu ni oul mak.) 20 Masikin, ka lâibungpa, rangâihoitakin Pumapa jârin mahi ni tho pe inla; Khrista taka han lâibung anghan, mi mathâi roh! 21 Tak ko sônchêt, anghan nang ke ngên hih tho na ta, mapêna khom tho ni tih, tiin ki riet mindik sikin no kôm mahi ki miziek ani. 22 Mapên han, ku tungna rang khâltan mi lei mintuo pe roh, Pathien'n nin renga nin chubaithonangei a khôka nin kôm mi hongtîr nôk atih, tiin ka sabei sikin.

Azoina chibaimûknangei

23 Epaphras, Khrista Jisua jâra keima leh intângna ina ompu hin a chibaingei nangni a hong muthuon, 24 male ki sintho— champuingei Mark, Aristarchus, Demas, le Luke ngei khomin chibai nangni an hong muthuon sa ani.

25 Ei Pumapa Jisua Khrista moroina hah nin renga nin kôm om rese.

1:2 Kol 4:17

*1:9 Khrista Jisua palâi, le atûn hin khom ama jâra intâng ina om; aninônchu miriem tar, le Khrista Jisua jâra atûn hin intâng ina ompu.

1:10 Kol 4:9

†1:11 Greek rimingin Onesimus ti omtie chu “mangmunomtak” tina ani.

1:23 Kol 1:7; 4:12

1:24 Sin 12:12,25; 13:13; 15:37-39; 19:29; 27:2; Kol 4:10,14; 2 Tim 4:10,11