Pathien Lekhabu Inthieng Chongtung Thar Romans 1

ROM

Mingei Kôma Paul Lekhamuthuon

Chongmaruoi

Paul'n Rom taka lekhamuthuon Rom khopuia koiindang va sir rang a bôka, lampui lei sinsiem ranga hi lekha, lei rilnân hi lekha hih Korinth khopui renga a miziek ani. A khintak chu ma muna Khristien omngei an lâia idôr ten mini sinthoa anni ngei sanna leh Spain rama khom se rang a sabei ani. Khristien taksônna hih Khristienngei an ringnuna anîngtin nunchana minlangsuok rang a riet lam a miziek ani. Hi lekhabu hin Paul chong chôi pumpui misîr minthârna tak lekha ani.

Rom koiindanga mingei chibai a mûka, anta rangin a chubai pe ngei ngâi tie a ril zoiin chu, Paul'n a lekhamuthuon na abipuitak hih a misîr ani: “Pathien'n mi dik a mintum nôk lam thurchisa a minlanga: ma hih abul renga among dênin taksônna sikin ani.” (1:17)

Hanchu Paul'n hih chonglupui hi a ril minsei uola, miriem murdi, Judangei le Jentailngei khom Pathien mitmua thei an intum rang anâng ani, mi murdi nunsie rachamneina nuoia om zit an ni sikin, miriem ngei hih Jisua Khrista taksôn sikin Pathien mitmua thei an intum ngâia. Masuole Paul'n Khrista leh inzomkhômna ringna thar han Pathien leh inkaina thar ahong suok ani, a ti sa. A iempungei kai chu sietna le thina sinthotheina renga Pathien Ratha'n min jôkin Pathien leh inngêina an dôn ngâia. Bung 5-8 sûnga hin Pathien balam ai khit tak le a iemngei ringnuna Pathien Ratha'n roi a nei tie hih a misîr ani. Judangei Jisua an lei hengna khom hih Pathien lei mintuo inkhat chu ani, mi murdi Jisua Khrista taka hin Pathien moroina an huom thei chitna ranga ani ti hih a chongkhârna ani, Judangei hin Jisua hih heng tit no ni ngei ti hih a iem ani. Anûktaka chu Paul'n Khristien ringnun hih kho angtaka mang rang mini, midangngei leh inzom theina ranga lungkhamna lam roi a miziek ani. Ha chonglupuingei hah Pathien sin ania ram ta rang le mitin kôma Khristienngei sintum khom ania, a sielesarietna chongrekel khom ani sa, tiin a lâk ani. Ama mimal chongbe leh Pathien kôma râisânchongrilna chongin a lekha muthuon hih a min mong ani.

Asûnga chongtângpuingei

Chongmaruoi le chonglupui 1:1-17

Sanminringna anâng 1:18—3:20

Pathien'n a sanminring lam 3:21—4:25

Khrista taka ringna thar 5:1—8:39

Pathien mintuona nuoia Israelngei 9:1—11:3

Khristienngei inruoina lam 12:1—15:13

Chongkhârna le misang chibaimûkna 15:14—16:27

1 Paul renga, Jisua Khrista tîrlâm le tîrton ranga thang, Pathien'n a Thurchi Sa ngei misîr ranga koi.

2 Ma Thurchi Sa hah tien renga Pathien'n a dêipungei mangin a lei khâma, Lekhabu Inthieng taka miziekin. 3 Mahi a Nâipasal, ei Pumapa Jisua Khrista roi ani: Miriem nina tieng chu David richisuonpâra inzir ania; 4 ânthiengna Ratha Inthieng chu, thina renga ânthoinôkna han Pathien Nâipasal ani tie sinthotheina roiinpuitak chu a minlang ani zoi. 5 Ama sika han Pathien'n tîrton ni rangin Khrista jôtna sika sintum ni pêk ani, Ramtina mingei iema le jômna tienga ruoi ngei rangin mikhâm ani. 6 Rom taka om ngei khom nangni huomsa ani, Jisua Khrista ata nirangin nangni a koi ani.

7 Masikin Rom taka om Pathien lungkham ngei le ama mi ni ranga a koi ngei nâm ranga ki miziek ani:

Pathien ei Pa le Pumapa Jisua Khrista'n, moroina le inngêina nangni pêk rese.

Râisânchongrila chubaithona

8 Amotontaka, rammuol pumpuia nin taksônna thurchi ânthang sikin nin rênga rangin Jisua Khrista jâra ka Pathien kôm râisânna chong ki mintung bak ani. 9 Chubai ko thona ngeia nangni ki riettit ngâi ti a Nâipasal Thurchi Sa misîra ku mulung murdia sin ko tho ngâi Pathien hah ni rietpuipu ani. 10 A lungdo anînchu atûn luo nangni ko hong sir phâk theina rangin Pathien kôm ke ngên tit ngâi ani. 11 Nin dik nôk uolna rangin ratha satvurna ngei nangni min chang rangin mu rang nangni ku nuom tatak ani. 12 Maha keima le nangni hih nin taksôn han inmohôk inlôm ku nuom ani, ei insan inlôm theina rangin.

13 Ka lâibungngei le sarnungei, nangni hongpan rang ko bôk tit ngâia, hannirese insûkloina a om kelen ngâi ti nin riet ku nuom ani, Jentail dang ngei lâia taksôn thar ka man anghan nin lâia khom man rangin ka sabei. 14 Mitin chunga lâkâi ke nei, Greek mingei le mi môlma ngei mivârngei le mi inmôl ngei kôma khom. 15 Ma anghan nangni Rom khopuia omngei kôma khom Thurchi Sa misîr rangin inthok chakin ko om ani.

Thurchisa sinthotheina

16 Thurchisa hih inzakpui mu-ung, tukhom a iem murdi sanminringna ranga Pathien sinthotheina ania, aphuta Judangei ta rangin masuole Jentailngei ta rang khomin ahongni. 17 Thurchisa hin taksôn sik vaia Pathien'n mi thei a minchang lam aphut renga amongna tena a juong minlang ani, Pathien lekhabu'n, “Taksôn sika thei intumpu chu ring a tih,” tia ânziek anghan.

Miriemngei sietna

18 Invân renga Pathien taksina hah miriemngei Pathien lunghâng tholoina sietna le dikloina murdi chunga ajuong minlang ani, an sietna sikin chongtak hah an kal tita. 19 Pathien'n intakna a mintuong ngeia, asikchu thurchi rietruongei chu an kôma ânlang tita Pathien'n ama rengin a min riet zoi sikin. 20 Anina mita mutheiloi a kumtuong sinthotheina le a Pathien nina hah rammuol sinphut renga a neinun sin ngeia inthârin mutheiin ânlanga. Masikin anni ngei chu jôkna rang lampui ite dôn mak ngei. 21 Pathien an riet chakin Pathien angin chôiminsâng mak ngeia ama kôm râisânchong khom ril mak ngeia; sin kâmboi mang an mindona an mulungrîl sêt tak hah ahong jîng zoia. 22 Avâr okin an inbea hannirese an inmôl ani. 23 Thitheiloi Pathien chubaimûk nêkin a thithei miriemngei le vângei sângei le iring rimilngei pathien an min chang zoia.

24 Masikin, an mulungrîl nuomlam neinun porinchengei tho rangin Pathien'n nûk a song ngeia inzakpui omtakin an om zoi ani. 25 Pathien chongtak nêkin milak an thang uola, asinpu biek nêkin a sin ngei biekna sin an thope uola, Asinpu chu kumtuongin minpâkin om rese! Amen.

26 Masika han kêng Pathien'n inzak taka an hur ha phalin nûk a song ngeia. An nupangngei hah khom nunchan insiengpui angtakin om loiin an oma. 27 An pasalngei khom nupang mang ngâi lam mâksanin, hurin an in en inlôma, pasal le pasal dikloi takin an lênga. An taksa ngeia an sietna man an man ani.

28 Pathien rietna diktak hah an mulungrîla an nei nuom loi sikin an mindonna siet tak anga om rangin Pathien'n nûk a song ngeia, an tho loi ruo khom an tho zoia. 29 Dikloina murdi'n an sipa sietnangei, insâp râtnangei, puoloina ngei, narsana ngei, inthatna ngei, insuol inkhalna ngei, inhuongna ngei le inmumâkna ngeiin an sipa, 30 an inêroa, an indema, Pathien an henga, an indoia, an inpâka, an insonga, sietna dadang athar an min suoka, an nulepangei mirit mak ngeia. 31 A sielesarietna nei mak ngeia an inkhâmna mang mak ngeia, midang lungkhamna le inriengmuna reng dôn ngâi mak ngei. 32 Ma anga tho ngei chu Pathien'n a khâm anga thiruo anni ti riet chakin, anni an tho vai niloiin midang a tho ngei khom an nuompui sa ngâi.

Romans
<
1
>

1:13 Sin 19:21

1:16 Mk 8:38

1:17 Hab 2:4

1:21 Eph 4:17,18

1:23 Bal 4:16-18