16
1 Waatoo kaŋ Izirayel borey koy Irkoy sundukoo zaa kate, i nʼa daŋ hukkumoo kaŋ Dawda nʼa cin a se gundoo ra. I na sargari kukuranteyaŋ nda alaafiya teendi sargariyaŋ kaa Irkoy jine. 2 Waatoo kaŋ Dawda na sargari kukurantey nda alaafiya teendi sargarey kaa ka ben, a gaara jamaa se Abadantaa maaɲoo ga. 3 Woo banda ga, a na takula foo, nda teenay gabante foo, nda alaneb-ize koga gabante foo noo Izirayel boro foo kul se, woy nda aru.
Lewi borey ga don ka Abadantaa saabu
(Zabur 105.1–15; 96; 106.1, 47–48)
4 Dawda na Lewi boroyaŋ suuba kʼi daŋ Abadantaa sundukoo goyoo ra, i ma Abadantaa, Izirayel Koyoo šifa, ka albarka tee a se, kʼa saabu. 5 Asaf ti ngi jineboraa, Zakarya goo dumaa ga, nda Yeyiyel, nda Šemiramot, nda Yehiyel, nda Matitiya, nda Eliyab, nda Benaya, nda Obed-Edom, Yeyiyel. Kuntiji karkawyaŋ nda kurbu karkawyaŋ no. Asaf ga guuruyaŋ kaŋ ga kara-kara hẽenandi. 6 Sargari juwalkey kaŋ ti Benaya, nda Yahaziyel, i na waatoo kul tee i ga laati beeri hẽenandi Irkoy amaanaa sundukoo jine. 7 Hanoo din ti cee jinaa kaŋ Dawda na Asaf nda nga armey daŋ i ma Abadantaa saabu ka nee:
8 Wa Abadantaa saabu, war ma maaɲoo cee,
wa nga teegoyey har dumey se.
9 Wa don a se, wʼa saabu dooniyaŋ ra,
wa nga goy kayfantey kul har borey se.
10 Wa fooma nda nga maa henanantaa,
borey kaŋ ga Abadantaa ceeci, biney ma ɲaali!
11 Wa Abadantaa ceeci, ka nga albarkaa ceeci,
war ma nga ndumoo ceeci waati kul!
12 Goy kayfantey kaŋ a nʼi tee, war ma hongu ey,
wa hongu kayfey kaŋ a nʼi tee,
nda hayey kaŋ a nʼi kayandi, war ma hongu ey.
13 War kaŋ hun Izirayel ga kaŋ ti nga tamoo,
Yakuba izʼarey, war kaŋ ti nga boro suubantey.
14 Nga ti Abadantaa, ir Koyoo,
nga ciitey goo laboo nongey kul ra.
15 War ma hongu nga amaanaa waati kul
nda šenni kaŋ a nʼa har zaman zenber foo (1.000) se,
16 amaanaa kaŋ a nʼa daŋ nga nda Ibirahima game,
nda žeeyanoo kaŋ a nʼa tee Isiyaka se.
17 A na amaanaa woo kayandi, kʼa tee ašariya kʼa noo Yakuba se,
kʼa tee amaana duumante kʼa noo Izirayel se.
18 A nee a se: «Ay ga kaa ka ni noo Kanaŋ gandaa,
a ma tee war tuboo, a ma tee war wane.»
19 Alwaatoo woo, war manʼti kala boro kaŋ hinnaa ga kacca,
war si boobo, war tee yaw laboo ga.
20 I ga yaara-yaara gandawey nda cere game,
ka hun ganda foo ra ka koy ganda foo ra.
21 Amma Irkoy mana naŋ boro kul mʼi zarabi,
ngi maaganda se a kašeta kokoyyaŋ ga.
22 A nee: «War masi too ay boro suubantey do de,
wey kaŋ ay nʼi yon!
War masi ifutu kul tee agay annabey se!»
23 Gandaa kul, ma don ka Abadantaa saabu!
Zaari kul ma alhabaroo har
ka nee kaŋ Abadantaa ti Hallasikaa.
24 Wa nga daržaa har dumey kul se,
wa nga goy kayfantey har gandawey kul ra.
25 Zama Abadantaa ga beeri, a ga hima nda saabuyan,
ir ga hima ka hunbur a ka bisa koyey kul.
26 Haya kaŋ se dumey jerey koyey kul manʼti kala yaada,
amma Abadantaa ka beenaa tee.
27 Beeray nda darža manʼti kala nga wane,
gaabi nda ɲaali ga duwandi nga gorodogoo ra.
28 Aduɲɲa alkabiilawey kul, wa beeray nda hini noo Abadantaa se,
wʼi noo a se.
29 Wa beeray daŋ Abadantaa maaɲoo ga,
wa kate gomniyaŋ Abadantaa jine,
wa sujudu Abadantaa se
waati kaŋ nga henanyanoo ga dii garaw.
30 Aduɲɲa laboo kul borey ma jijiri Abadantaa jine,
laboo goo dogoo ra, a si ɲuuti ka hun dogoo ra.
31 Beenaa ma ɲaali! Gandaa ma farhã
ka bayrandi dumey se ka nee: «Abadantaa ti Kokoyoo!»
32 Teekoo nda hayey kul kaŋ goo a ra dunduŋ!
Hawsaa nda hayey kul kaŋ goo a ra ma ɲaali kaati beeri tee!
33 Waatoo din hawsaa tuurey kul ga kaati nda ɲaali Abadantaa jine,
zama a mma kaa ka aduɲɲa ciiti.
34 Wa Abadantaa saabu, zama Abadantaa ga boori,
nga borohennataraa sii nda kaydoo.
35 Koyne mo war ma nee:
«Ir Hallasikaa Irkoy, ir hallasi!
Ir marga, ir kaa dumey kabey ra
hala ir ma duu ka ni maa henanantaa saabu,
ir ma fooma nda ni saabuyanoo.»
36 Albarka ma bara Abadantaa, Izirayel Koyoo se,
abada hala abada!
Waatoo din jamaa kul nee: «Amin!» I na Abadantaa saabu.
37 Woo banda ga, Dawda na Asaf nda nga armey naŋ Abadantaa amaanaa sundukoo jine, i ma cindi ka goy sundukoo jine waati kul, zaari kul goyoo kaŋ ga hima ka teendi, i gʼa tee. 38 A na Obed-Edom nda nga arma woydu cindi yaaha (68) kar i ga nda Obed-Edom kaŋ ti Yedutun izʼaroo, nga nda Hosa, ngi ti hugoo miɲoo lakkalkey.
39 Abadantaa gorodogoo kaŋ goo hodaddaa boŋ kaŋ goo Gabawoŋ, Dawda na sargari juwalkaa Sadok nda nga arma sargari juwalkaw cindey daŋ i ma koy no din, 40 hala i ma sargari kukuranteyaŋ kaa waati kul sargari kukurantey tonadogoo ra Abadantaa maaɲoo ga, cijin nda zaari, i ma hayaa kul tee kaŋ hantumandi Abadantaa ašariyaa ra kaŋ nda a na Izirayel yaamar. 41 Hemaŋ nda Yedutun goo borey din ra, ngi nda borey kaŋ suubandi ka maaɲey har, kaŋyaŋ ga cindi ka albarka daŋ Abadantaa se, zama nga borohennataraa sii nda kaydoo! 42 Hemaŋ nda Yedutun kone laati beeriyaŋ goo, nda guuruyaŋ kaŋ ga kara-kara, nda hooray jinay cindiyaŋ ga hanga saabuyan dooney bande. Yedutun izʼarey no ma hukkumoo miɲoo lakkal.
43 Woo banda ga, jamaa kul koy ngi hugey do, Dawda willi nga do, a koy gaara nga hugoo borey se.