16
Nooroo kaŋ ga margandi kʼir armey faaba
1 Haya kaŋ ti nooroo kaŋ ga margandi Irkoy boro henanantey*16.1 Boro henanantey sii kala Žerizalem, Rom borey batagaa 15.25–26. se, woo kaŋ ay nʼa yaamar Galati gandaa Egilizey se, war mo ma takaa din da tee. 2 Jirbiiyye foo kul, zaari jinaa kaŋ ti alhadoo, war boro foo kul, woo kaŋ a ga hin a, a mʼa kaa nga duuraa ra kʼa daŋ jere ga nga do, i masi koy naŋ hala waati kaŋ ay kaa war do ka noorey marga. 3 Waati kaŋ ay too no din, borey kaŋ war nʼi suuba, ay gʼi sanba Žerizalem nda batagayaŋ nda war gaakasinaa. 4 Nda ay koyyanoo goo nda addalil mo, ay ga huru i jine ir ma koy.
Pol ga šelaŋ nga naarumawey ga
5 Ay ga naaru ka Masedoni gandaa kottu ka koy war do, zama ay ga bisa nda no din. 6 A ga hin ka tee ya waati tee war do, wala hunday ya jiyaa tee war do hala war mʼay faaba naarumaa nongu kul kaŋ ra ay ga koy. 7 Zama hiino ay si baa ya dii war hinne ka bisa, ay ga naata ya waati tee war bande nda ir Koyoo yadda.
8 Amma ay ga cindi ne Efez hala Pantekotoo jingaroo ga, 9 zama mee beeri feeri ya ne kaŋ ga hanse ka boori ay goyoo se, amma agʼiberey ga boobo.
10 Nda Timote kaa, war masi naŋ a ma hunbur haya kul war game, zama ir Koyoo goyoo ra a goo sanda agay. 11 Boro kul masʼa kaynandi, wʼa faaba hala a ma kaa ay do nda alaafiya, zama ay goo mʼa batu, nga nda ir armey.
12 Haya kaŋ ti ir armaa Apolos, cee booboyaŋ ay nʼa wiri a ga a ma koy war do, nga nda ir armey, amma manʼti nga anniyaa no, nga ma koy sohõ da. Za a duu fondo, a ga koy.
Hoyray kokorantey nda fooyanoo
13 Wa hanna cijin nda zaari, wa gaabandi ka cindi naanaa ra, wa bine tee, wa tee gaabikoyniyaŋ. 14 Hayey kul kaŋ ga teendi war game, i ma teendi baji ra.
15 Agʼarmey, ay ga war hoyray, war ga bay kaŋ Stefanas nda nga hugoo borey ti boro jinawey kaŋ naanay Akay gandaa ra. I hanse ka Irkoy boro henanantey faaba. 16 Borey wey mo, wa haŋajer i se, ngi nda ngi goykasinawey kul.
17 Ay ga ɲaali nda Stefanas, nda Fortinatus, nda Akayik kaayanoo, zama war dumaa ga, i yee ya ne war dogoo ra. 18 I na agay nda war biney yaynandi. Wa borey wey dumey beerandi.
19 Azi gandaa Egilizey ga war foo. Akilas, nda Priska, nda Egilizoo kaŋ ga marga ngi hugoo ra ga hanse ka war foo ir Koyoo maaɲoo ra. 20 Ir armey kul ga war foo. Wa cere foo nda summuyan henanante.
21 Agay hunday Pol kaboo ka fooyanoo hantum.
22 Boro kaŋ si baa ir Koyoo, boraa ma laali. Maranata! (maanaa «kaa, ir Koyoo!») 23 Ir Koyoo Isa anneemaa ma bara war bande.
24 Ay ga baa war kul Almasihu Isa albarkaa ra.