Bataga hinkantoo kaŋ Yehiya nʼa hantum
Citaaboo fahamandiroo
Woo ti Yehiya bataga hinkantoo kaŋ a nʼa hantum. A si nga maaɲoo cee, a mma nee de «boro beeroo». Takaa kaŋ nda a ga šelaŋ, boro ga dii kaŋ ngi jineboro no. A si šelaŋ kala «woy beeri suubantaa nda nga izey» (sorro 1na) se kaŋ maanaa ti Egilizoo nda ganakey.
Batagaa woo ra a gʼi hoyray i ma dira cimoo nda Irkoy fondaa ra. Boro kaŋ kate i se haya kaŋ manʼti Alhabar Boryaa, i ma mooru boraa. I ma baa cere.
1
Borey kaŋ se batagaa sanbandi maaɲey
nda fooyanoo kaŋ teendi i se
1 Agay kaŋ ti boro beeroo ka batagaa woo sanba woy beeri suubantaa nda nga izey se. Ay ga baa war nda cimi, manʼti agay hinne, borey kul kaŋ na cimoo bay mo ga baa war, 2 cimoo kaŋ ga duumi ir ra maaganda se, kaŋ goo ir bande hala abada.
3 Anneemaa, nda tamallaa, nda alaafiyaa goo ir bande kaŋ hun Baaba Irkoy nda Isa Almasihu do kaŋ ti Baaba Irkoy Izʼaroo cimi ra nda baji ra.
Cimi nda baji
4 Ay hanse ka ɲaali kaŋ ay gar kaŋ ni izey ra, affooyaŋ ga dira cimoo ra, sanda takaa kaŋ nda ir duu yaamar Baaba Irkoy do. 5 Aywa sohõ woy beeroo, woo kaŋ ay gʼa wiri ni ga, nga ti ir ma baa cere. Manʼti sanda yaamar taaga no ay goo ma hantum ma ne, amma woo din da no kaŋ ir duu a za sintinoo ga.* 1.5 Yehiya 13.34; 15.12, 17. 6 Hayaa kaŋ ti baji manʼti kala ir ma dira ka sawa nda nga yaamarey. Woo ti yaamaroo kaŋ war maarʼa za sintinoo ga hala war ma dira a bande.
7 Derandikaw boobo kaa aduɲɲa ra. I si yadda kaŋ Isa Almasihu kaa nda gaaham, i sʼa har. Boraa woo dumoo ti derandikaw, nga ti Almasihu iberoo. 8 Wa war boŋ hawgay war masi koy jaŋ ir goyoo albarkaa, wa war boŋ hawgay hala war ma duu sufuray timmante.
9 Boro kaŋ na Almasihu cawyanoo hoo, a mana duumi a ra, boraa mana duu Irkoy. Boro kaŋ ga duumi nga cawyanoo ra, boraa duu Baaba Irkoy, boraa duu Izʼaroo mo. 10 Boro kaŋ kaa war do a mana kate cawandiyanoo woo, war masʼa zumandi war do, war masʼa foo, 11 zama boro kaŋ nʼa foo, boraa huru a bande nga goy futawey ra.
Šenni kokorantaa
12 Haya boobo goo no kaŋ ay baa yʼa hantum war se, ya na baa yʼa tee nda kaddaasu nda dawa. Amma ay ga tammahã ya koy war do, ir ma šelaŋ mee nda mee hala ir ɲaaloo ma timme. 13 Ni woyme suubantaa izey ga ni foo.