19
Kokoyoo Ezekiyas na annabi Ezayi lakkaloo ceeci
(Ezayi 37.1–7)
1 Waatoo kaŋ kokoyoo Ezekiyas maa šennoo kaŋ i kate a, a na nga bankaarawey kottu, a na saaku kasa daŋ nga ga, a koy Abadantaa hugoo do. 2 Nga hugoo goykey jineboraa kaŋ ti Eliyakim, nda hantumkaa Šebna, nda sargari juwalkey boro beerey, a nʼi sanba Amots izʼaroo, annabi Ezayi do, i na saaku kasa daŋ ngi ga. 3 I koy nee a se kaŋ Ezekiyas nee: «Hõ manʼti kala binemarayyan, nda zukandiyan, nda kaynandiyan zaari. A ga hima nda woyyaŋ kaŋ ga baa ka hay, amma i sii nda gaabi ka ngi izey daŋ aduɲɲa ra. 4 A ga hin ka tee Abadantaa, ni Koyoo ma maa šenney kul kaŋ Asiri kokoy goykey jineboraa nʼi har kaŋ nga koyoo Asiri kokoyoo nʼa sanba ka Irkoy hunantaa wow. A ga hin ka tee Abadantaa, ni Koyoo mʼa zukandi šenney kaŋ Abadantaa, ni Koyoo maarʼey maaganda. Irkoy ŋaaray wey kaŋ cindi ir ra kaŋ mana buu se.»
5 Kokoyoo Ezekiyas borey na dontaa too Ezayi do. 6 Ezayi nee i se: «Hayaa ne kaŋ war ga koy a har war koyoo se: ‹Hayaa ne kaŋ Abadantaa nʼa har, a nee: “Masi hunbur šenney kaŋ ni maarʼey, wowey wey kaŋ Asiri kokoyoo borey nʼi har ya ne. 7 Kokoyoo ga kaa ka duu alhabar. Ay ga daŋ binoo ra a ma kayandi ka willi nga gandaa ra, no din ra, ay ga daŋ i mʼa wii nda takuba.”›»
Asiri kokoyoo yee koyne ka Žerizalem hunburandi
(Ezayi 37.8–13; Taarikey 2to 32.1–7)
8 Asiri kokoy hugoo goykey jineboraa maa kaŋ Asiri kokoyoo hun Lakiš koyraa ra ka koy Libna koyraa tangam, no din ra a koy a gar. 9 Woo banda ga, Asiri kokoyoo duu alhabar kaŋ Ecopi kokoyoo kaŋ ti Tirhaka goo ma soolu ka kaa ka nga tangam. Woo ga, a yee koyne ka dontokawyaŋ sanba Ezekiyas do ka nee: 10 «Wa nee Žuda kokoyoo Ezekiyas se: ‹Ni Koyoo kaŋ ra nʼna ni naanaa daŋ masi ni darga ka nee kaŋ Žerizalem si kaŋ Asiri kokoyoo kaboo ra. 11 Ni hunday maa hayey kaŋ Asiri kokoyey nʼi tee gandawey kul se, i nkʼi halaci sõy. De nga no nʼga hongu kaŋ nʼga hun a ra? 12 Koyey kaŋ gandawey gʼi gana kaŋ ay hayragey nʼi halaci, koyey din hin kʼi kaa kabe ra wala, Gozaŋ, nda Karaŋ, nda Resef koyrawey, nda Eden koyraa borey kaŋ goo Telasar koyraa ra? 13 Man Hamat koyraa kokoyoo, nda Arpad koyraa kokoyoo, nda Sefarbayim koyraa kokoyoo, nda Hena koyraa kokoyoo, nda Iba koyraa kokoyoo?›»
Ezekiyas Irkoy ŋaarayyanoo
(Ezayi 37.14–20)
14 Ezekiyas na batagaa taa dontokey kone, a nʼa caw, a koy Abadantaa hugoo ra. A nʼa cebe Abadantaa se. 15 A kay Abadantaa jine kʼa ŋaaray, a nee: «Abadantaa, Izirayel Koyoo kaŋ ga goro almalaykey kaŋ se i ga nee šerib boŋ, ni hinne ti laboo laamawey kul Koyoo, ni ka beenaa nda laboo tee. 16 Abadantaa, ni haŋaa gaaru, ma maa ya ne! Abadantaa, ni moɲey feeri, ma guna! Haŋajer kokoyoo Senakerib šenney se kaŋ a nʼi sanba ka Irkoy hunantaa wow. 17 Cimi no, Abadantaa, kaŋ Asiri kokoyey na jamawey nda ngi gandawey say. 18 De i na ngi koyey warra nuune ra, zama wey din manʼti koy, hayayaŋ no kaŋ kabe kʼi tee, bunduyaŋ nda tondiyaŋ no, woo se i nʼi derandi. 19 Sohõ, Abadantaa, ir Koyoo, ay gʼa wiri ni ga, mʼir hallasi Senakerib kaboo ra hala laboo kokoy laamawey kul ma bay kaŋ ni hinne, Abadantaa ti Irkoy!»
Ezayi na Abadantaa zaaboo too
(Ezayi 37.21–35)
20 Amots izʼaroo Ezayi daŋ ka nee Ezekiyas se: «Hayaa ne kaŋ Abadantaa, Izirayel Koyoo nʼa har, a nee: ‹Ay maa hayaa kaŋ nʼnʼa ŋaaray ay ga haya kaŋ ti Asiri kokoyoo Senakerib misoo. 21 Hayaa ti woo kaŋ Abadantaa nʼa har a ga, Abadantaa nee:
“Woy-izoo kaŋ ti Siyoŋ koyraa ga ni kaynandi, a ga ni fude,
woy-izoo kaŋ ti Žerizalem ga ni haaru ka nga boŋoo zinji-zinji.
22 May no ni donda? May no nʼnʼa wow?
May ga ni kaati? May no nʼnʼa guna nda dondaceray?
Agay, Izirayel Koy Henanantaa se nʼnʼi tee!
23 Nʼna ni dontokey sanba
ka agay, ni Koyoo wow.
Ni nee: ‘Agay, Senakerib, ay žigi ay bari torkaa boŋ kʼa zurandi,
ay žigi tondi hondey boŋ ka koy hala Libaŋ gandaa gundoo ra,
ka nga sedere bundu kukey nda nga sipres bundu henney dunbu.
Ay ga too nga ganjoo nongu koraa nda nga hawsa tefayantaa ra.
24 Agay, ay na dayyaŋ fanši ka ganda waani hari haŋ.
Ay ga isaa kaŋ se i ga nee Nil kaŋ goo Misira, kabey kul kogandi nda ay cewey.’ ”
25 Ni, Senakerib, nka si bay kaŋ ay na hayey wey kayandi za gayyan?
Za zaman ay nʼi hanse.
Sohõ ay kate nda ey
hala ma koyra gaabanteyaŋ kayri i ma tee saaji.
26 Ngi gorokey yalaafu,
i jijiri, i haw.
I hima nda faarey subey, subu firzi baana,
sanda ažiyoo kaŋ goo soorawey boŋ,
sanda alkama kaŋ kogu za a mana zay ka ben.
27 Ay ga ni gororoo bay,
ay ga ni fattaroo bay, ay ga ni willi kateyanoo bay,
waatoo kaŋ ni futu ay ga mo, ay ga bay.
28 Hayaa kaŋ se ni futu ay ga
ni bolsay šenney huru ay haŋawey ra,
ay gʼay korbaa daŋ ni niiney ra,
ay ga agay aljamoo daŋ ni meefendey ga,
ay ga ni willandi nda fondaa kaŋ nda ni kaa.
29 Ezekiyas, tammaasaa ne kaŋ ay gʼa noo ma ne:
jiiroo woo war ga taasoo kaŋ kaŋ ka zay nda nga boŋ ŋaa,
yeeši mo war ga taasoo kaŋ zay nda nga boŋ ŋaa.
Amma jiiri hinzantoo, wa saya, war ma hegay,
war ma alaneb faariyaŋ tee, war ma izey ŋaa.
30 Borey kaŋ cindi Žuda jamaa ra kaŋ mana buu,
i ga linji tee nda ganda here sanda tuuri,
i ga ize tee nda beene here.
31 Zama borey kaŋ cindi ga tun Žerizalem ra,
Siyoŋ tondi hondoo boŋ boroyaŋ kaŋ cindi i mana buu ga bara.
Woo ti hayaa kaŋ Abadantaa, Aduɲɲakoyoo gʼa tee nga baji beeroo ra.›»
32 Woo maaganda se hayaa ne kaŋ Abadantaa nʼa har Asiri kokoyoo ga, a nee:
«A si huru koyraa woo ra, a si biraw kar a ra,
koray sʼa gande, a si labu zuku cetaa ga kʼa tee haya kaŋ ga a ga žigi ka bisa.
33 A si willi kala nda fondaa kaŋ nda a kaa,
a si huru koyraa woo ra, agay Abadantaa ka šelaŋ.
34 Ay ga koyraa woo lakkal kʼa hallasi,
agay hunday maaganda se nda ay tamoo Dawda maaganda se.»
Irkoy na Žerizalem hallasi Senakerib kaboo ra
(Ezayi 37.36–38; Taarikey 2to 32.21–22)
35 Cijinoo woo, Abadantaa almalaykaa fatta ka aru zenber zangu nda zenber woyyaaha cindi guu (185.000) kar Asiri borey kaloo ra. Waatoo kaŋ ra i tun subbaahi biyaa ra, bukawyaŋ goo nongoo kul ra. 36 Woo ga, Asiri kokoyoo Senakerib tun ka willi ka koy goro Niniwe. 37 Han foo a goo ma sujudu nga koyoo Nisrok hugoo ra, nga izʼarey Adramelek nda Sareser nʼa wii nda takuba, i zuru ka koy Ararat gandaa ra. Nga izʼaroo Asar-Hadoŋ tee kokoy dogoo ra.