Fattaroo citaaboo
Citaaboo fahamandiroo
Citaaboo woo ra Irkoy nee: «Agay ti Abadantaa, ni Koyoo kaŋ na ni fattandi Misira gandaa ra, tamtaray hugoo ra.» Fattaroo sorraa woo (zamnaa 20.2) ga citaaboo maaɲoo (Fattaroo) nda hayaa kaŋ goo a ra cebe kaŋ ti: Irkoy ti nga jamaa Sawalkaa. Koyne mo sorraa woo ti yaamar woyaa (10) asaasoo. Irkoy kaŋ ti baji, woo maaganda se a na Izirayel borey feeri, a gʼa wiri i ga i ma ngi bajoo cebe nga se nda nga yaamarey diiyanoo.
Waatoo kaŋ Izirayel izey duu gorodoo Misira laboo ra (Sintinoo 45.17–20; 47.11), i tee jamaa beeri, amma kokoyoo nʼi tee baɲɲayaŋ. Irkoy manʼi naŋ takaa din, a na boro suuba i ra, Musa, kʼa tee i se gongukaw. Irkoy na kayfi beeriyaŋ tee ka Misira borey gaabi i ma Izirayel borey sawal kʼi naŋ i ma koy.
Boro kul kaŋ goo baɲɲataray, dumi kul kaŋ no, zaman kul kaŋ no, citaaboo woo gʼi faaba kʼi cebe haya kaŋ ti sawalyan cimoo, sawalyanoo kaŋ Irkoy gʼa noo hala boro nda nga Koyoo gamoo ma duu ka hanse, boro nda nga cinaa gamoo ma hanse.
1
Misira kokoyoo na Izirayel borey daŋ waazibi goyyaŋ ra
Izirayel izey kaŋ huru Yakuba bande Misira, affoo kul nda nga alaayaney, maaɲey ne: Rubeŋ, nda Simewoŋ, nda Lewi, nda Žuda, nda Isakar, nda Zabuloŋ, nda Benžameŋ, nda Dan, nda Neftali, nda Gad, nda Ašer. Borey kul kaŋ hun Yakuba ga hinnaa manʼti kala boro woyye (70). Isufi goo Misira ka ben. Woo banda ga, Isufi buu, armey kul buu, zamanoo din borey kul buu. Amma Izirayel borey duu hayyan boobo, ka gooru, ngi hinnaa tonton, i hanse ka duu gaabi. I na gandaa too. Kokoy taaga kaa ka Misira laama kaŋ si Isufi bay. Kokoyoo nee nga jamaa se: «Nga ne, Izirayel borey jamaa boobo nda ir, i gaabi nda ir. 10 Ir ma hawgay, ir ma lakkal daŋ ka taka tee kaŋ ra i masi tonton. A ga hin ka tee, nda wongu tun, i ga tee affoo ngi nda ir iberey kʼir wongu jina ka gandaa naŋ.» 11 Woo se Misira borey na boroyaŋ daŋ Izirayel jamaa jine kaŋ gʼi torro, i nʼi daŋ waazibi goyyaŋ ra. I na koyrayaŋ kaŋ ti taasu fanjidooyaŋ cin Firawuuna se, koyrawey maaɲey ti: Pitom nda Ramses. 12 Amma kaŋ i gʼi torro kul i mma tonton, i ga boobo. I konna Izirayel borey. 13 Misira borey na Izirayel borey daŋ tamtaray šenda ra. 14 I na tamtaray šendaa kʼi konnandi aduɲɲa. I ga labu goy, i ga feraw kar, i ga goy dumi kul tee faarey ra. Goyey kul kaŋ ra i nʼi daŋ manʼti kala tamtaray šenda.
Firawuuna na Izirayel borey gurzugay
15 Misira kokoyoo šelaŋ Eberewey hayandikey se, affoo maaɲoo ti Šifra, affaa maaɲoo ti Puwa. 16 A nee i se: «Nda war ga Ebere woyey hayandi, de war ga dii kaŋ izʼaru no, war mʼa wii, nda ize woy no, war mʼa naŋ a ma huna.» 17 Amma hayandikey ga hunbur Irkoy, i mana hayaa tee kaŋ Misira kokoyoo nʼa har i se. I na zankaarey naŋ i ma huna. 18 Misira kokoyoo ciya hayandikey se, a nee i se: «Cin se war na woo tee, ka zankaarey naŋ i ma huna?» 19 Hayandikey nee Firawuuna se: «Ebere woyey nda Misira woyey manʼti affoo, Ebere woyey ga sahã, hala hayandikaa ga too kate i do gar i duu ngi boŋ ka ben.»
20 Irkoy na haya henna tee hayandikey se. Jamaa mo tonton, i hanse ka duu gaabi. 21 Zama hayandikey hunbur Irkoy, a nʼi noo hayyan. 22 Firawuuna na nga jamaa kul yaamar ka nee: «Izʼaru kul kaŋ hayandi, war mʼa warra isaa ra, amma ize woy, war mʼa naŋ a ma huna.»