15
Musa nda Izirayel borey baytoo
1 Waati follokaa ra Musa nda Izirayel borey na doonoo woo don Abadantaa maaɲoo ga. I nee:
«Ay ga don Abadantaa maaɲoo ga,
zama a na nga hinoo cebe, baryoo nda kaarukaa,
a nʼi warra teekoo ra.
2 Abadantaa ti ay gaaboo, nga ti ay baytoo addaliloo.
Nga ti ay hallasiroo. Nga ti ay Koyoo, ay gʼa saabu.
Nga ti ay baaba Koyoo, ay gʼa jer.
3 Abadantaa manʼti kala wongaari.
Abadantaa ti maaɲoo.
4 A na Firawuuna wongu bari torkawey nda nga wongu-izey warra haroo ra.
Wongu-ize jalakoyni suubantey yoole Kakaarey teekoo ra.
5 Haroo bondawey nʼi daabu,
i dere hari guusawey ra ma nee tondiyaŋ.
6 Abadantaa, ni kabe hennaa na ni hinoo cebe.
Abadantaa, ni kabe hennaa ka iberoo motti.
7 Ni kokoytaraa beeriyanoo ra nʼga borey warra ganda kaŋ ture ni ga.
Nʼga ni futuyanoo nuunaa sanba kaŋ gʼi ton ma nee subu.
8 Ni hunsaroo gaaboo na haroo marga.
Bondawey kay ma nee lalaba.
Hari guusawey kay teekoo gamoo ra.
9 Iberoo nee: ‹Ay gʼi gaarandi, ay ga duu ey,
ay ga alganiimaa zamna,
ay gʼa tee woo kaŋ ay baa,
ay gʼay takubaa hoobu,
ay kaboo gʼi halaci.›*15.9 «ay kaboo gʼi halaci», Ebere šenni ra, almaganaa faa ti «ay ga kabey koonandi».
10 Nʼna ni hewoo funsu,
teekoo daabu i ga.
I sundu ma nee badila
hari beerey ra.
11 Koyey ra, may no ma hima nda ni, Abadantaa?
May no ma too ni henanyan ra?
May ka si hunbur ni?
May no ma too ni beeray ra?
May no ma too ni kayfi teeyan ra?
12 Nʼna ni kabe hennaa šerre,
laboo nʼi gon.
13 Ni arrahamaa nda nʼna ni jamaa gongu,
jamaa kaŋ nʼnʼa feeri.
Ni hinoo ra, nʼga huru i jine ka koy nda ey ni gorodoo henanantaa ra.
14 Jamawey maarʼa, i jijiri.
Hunburay duu Filisti gandaa borey.
15 Waatoo din Edom boŋkoyney zalba.
Mowab alwakiiley, jijiriyan duu ey.
Kanaŋ gandaa gorokey kul biney hasara.
16 Jitiyan nda hunburay kaŋ i boŋ.
Ni kabe gaabantaa jine i tee suk ma nee tondi,
i si hin ka šelaŋ hala waati kaŋ ni jamaa ga dira ka bisa, Abadantaa,
hala waati kaŋ ni jamaa kaŋ nʼnʼa sawal, dira ka bisa.
17 Nʼga huru i jine kʼi gorandi tondi hondoo boŋ kaŋ ti ni wane,
nongoo kaŋ ni, Abadantaa nʼa hanse a ma tee ni gorodogoo,
a ma tee ni nongu henanantaa
kaŋ ni, ir Koyoo, ni kaboo nʼa gorandi.
18 Abadantaa, nʼga laama abada hala abada.»
19 Waatoo kaŋ Firawuuna baryey, nda nga torkawey, nda nga barikaarukey huru teekoo ra, Abadantaa na teekoo haroo yee katandi kʼa gum i boŋ. Amma Izirayel borey bisa teekoo gamoo ra labu kogaa ga.
Maryama baytoo
20 Annabi Maryama kaŋ ti Haruna woymaa na tubal-izoo zaa, woyey kul fatta ka hanga a, i ga hooray nda tubal-izoo, i ga gan. 21 Maryama ga tuuru ka nee i se:
«Wa don Abadantaa maaɲoo ga,
a na nga hinoo cebe.
Baryoo nda nga kaarukaa, a nʼi warra teekoo ra.»
Mara hari hottaa
22 Musa na Izirayel ka hun Kakaarey teekoo do ka koy Šur saajoo ra. I dira jirbi hinza saajoo ra i mana duu hari. 23 I too Mara, amma i mana hin ka Mara haroo haŋ, zama a mma hottu. Woo se i na nongoo maaɲoo daŋ Mara (maanaa «hottay»). 24 Jamaa ŋuunuŋuunu Musa ga ka nee: «Macin no ir gʼa haŋ?» 25 A kaati ka Abadantaa cee, Abadantaa na bundu dumi cebe a se. Musa nʼa warra haroo ra, haroo bere ka tee haya kaŋ si hottu. No din ra a na ašariyayaŋ nda yaamaryaŋ gorandi jamaa se. No din da ra a nʼi sii. 26 A nee: «Nda nʼga haŋajer ka boori Abadantaa, ni Koyoo jindoo se, nda nʼga haya tee kaŋ ga šerre a jine, nda nʼga haŋajer nga ašariyawey, nda nʼga nga yaamarey kul dii, wircey kaŋ ay nʼi daŋ Misira borey ra, ba affoo si duu ni, zama agay ti Abadantaa kaŋ ga ni noo gaaham baani.»
27 Izirayel borey too Elim, no din ra hariɲaa woy cindi hinka (12) goo, nda teenayɲaa woyye (70). I goro no din haroo jeroo ga.