Ezra citaaboo
Citaaboo fahamandiroo
Ezra citaaboo nda citaaboo kaŋ goo dumaa ga kaŋ ti Nehemi, cee jina, i kul manʼti kala citaabu folloku kaŋyaŋ sohõ i zamnandi ihinka. Ezra citaaboo, Ezra hunday ti nga hantumkaa. A si šelaŋ kala waatoo ga kaŋ ra Pers gandaa kokoyey hinoo goo Alyahuudey gandawey ga.
Babiloŋ borey na Žerizalem kayri kʼa say, i na Žuda gandaa kayandi. I na jamaa jere foo dii ka koy nda ey kʼi daŋ tamtaray. Woo ga, Žuda borey na jiiri boobo tee tamtaray ra Babiloŋ gandaa ra. Jiiroo kaŋ ra Pers kokoyoo Sirus na Babiloŋ dii, jiiri foo jiiroo din banda ga, a na jamaa kaŋ goo tamtaray naŋ i ma willi ngi gandaa ra.
Ezra citaaboo woo ga hin ka zamnandi kanje hinka:
Nongu jinaa ga borey willi kateyanoo har ir se nda Abadantaa hugoo cinayanoo (zamna 1na—6to).
Nongu hinkantoo ga takaa har ir se kaŋ nda Ezra kaa Žerizalem (zamna 7to—10to).
Citaaboo woo muraadoo ti kʼir cawandi kaŋ haya kul kaŋ Irkoy nʼa har, a gʼa tee. Irkoy na allaahidu zaa kaŋ nga ga yaafa nga jamaa se, kʼi willandi ngi gandaa ra, a na allaahidoo woo too. Abadantaa hugoo nafaa ga beeri, zama nga ra nga jamaa ga marga kʼa saabu kʼa ŋaaray. Haya kul kaŋ Abadantaa na nga allaahidoo zaa, a gʼa too.
1
Sirus daŋ kaŋ Abadantaa hugoo ma cinandi taaga
(Taarikey 2to 36.22–23)
1 Pers gandaa kokoyoo Sirus laamaa jiiri jinaa ra, hala Abadantaa šennoo kaŋ a nʼa har nda Žeremi miɲoo ma tabati, Abadantaa na lakkal foo daŋ Pers kokoyoo Sirus binoo ra. Woo se Sirus na šenni har kʼa hantum nga laamaa kul se, a nee: 2 «Agay Sirus, Pers kokoyoo no ka nee: ‹Abadantaa, beenaa Koyoo nʼay noo laboo kokoy laamawey kul, a daŋ kaŋ ya hugu cin taaga nga se Žerizalem, Žuda gandaa ra. 3 War ra, mayyaŋ ti borey kaŋ goo nga jamaa ra? Yala nga Koyoo ma bara a bande. Boraa ma žigi ka koy Žerizalem, Žuda ra ka Abadantaa, Izirayel Koyoo hugoo cin, Koyoo no kaŋ goo Žerizalem. 4 Borey kul kaŋ cindi, nongu kul kaŋ ra i goo ma goro yawtaray ra, nongoo din borey mʼi noo nzorfu kaaray, nda wura, nda jinayyaŋ nda adabbayaŋ, nda gomniyaŋ kaŋ i gʼi noo nda ngi boŋ Irkoy hugoo se kaŋ goo Žerizalem.›»
5 Kaŋ woo teendi, Žuda hugu boŋey, nda Benžameŋ hugu boŋey, nda sargari juwalkey nda Lewi borey, nda borey kul kaŋ Irkoy na lakkal daŋ biney ra tun ka žigi ka koy Abadantaa hugoo cin taaga kaŋ goo Žerizalem. 6 Ngi taalammey kate i se faabari, nzorfu kaaray jinayyaŋ, nda wura jinayyaŋ, nda alman, nda adabba nda gomni beeriyaŋ kaŋ sii hayey ra kaŋ i gʼi noo nda ngi boŋ.
7 Kokoyoo Sirus na Abadantaa hugoo jinawey fattandi kaŋ Nebukanezar nʼi zaa Žerizalem kʼi jisi nga koyey hugoo ra. 8 Pers gandaa kokoyoo Sirus na nga alman talfikaa Mitredat sanba a ma koy jinawey fattandi kʼi kabu kʼi noo Žuda boŋkoynoo Šešbasar se. 9 Jinawey hinnaa ne: wura taasa waranza (30), nda nzorfu kaaray taasa zenber foo (1.000), huryaw waranka cindi yagga (29), 10 nda wura tuu waranza (30), nda nzorfu kaaray tuu tana zangu taaci nda iwoy (410), nda jinay tana zenber foo (1.000). 11 Wura nda nzorfu kaaray jinawey kul hinnaa ti zenber guu nda zangu taaci (5.400)*1.11 Hinnawey kaŋ harandi sorro 9to nda 10to ra, cere ra ngi hinnaa si too woo. A ga hin ka tee hayey nka mana fillandi ka ben.. Šešbasar koy nda jinawey kul waatoo kaŋ borey kaŋ diyandi ka koy goo ma hun Babiloŋ ka willi ka koy Žerizalem.
*1:11 1.11 Hinnawey kaŋ harandi sorro 9to nda 10to ra, cere ra ngi hinnaa si too woo. A ga hin ka tee hayey nka mana fillandi ka ben.