Ayuba citaaboo
Citaaboo fahamandiroo
Ayuba citaaboo, Ayuba kaŋ ti boro šerrante laadirante kissaa no a gʼa filla. Amma Irkoy yadda bone beeriyaŋ ma kaŋ a ga. Ayuba cere hinza kaa a do, i na jirbi iyye tee i mana hin ka šelaŋ a se binemarayyan maaganda. Woo banda ga, Ayuba na šennoo zaa ka šelaŋ hayaa kaŋ duu nga ga, a nimsi nda haya kaŋ se nga huru aduɲɲa ra.
Citaaboo jere beeroo kul si šelaŋ kala boyraa kaŋ huru Ayuba nda nga cere hinzaa game kaŋ ti Elifaz, nda Bildad, nda Sofar. Elifaz ga šelaŋ, Ayuba gʼa zaabi. Bildad ga šelaŋ, Ayuba gʼa zaabi. Sofar ga šelaŋ, Ayuba gʼa zaabi. I baa ngi ma Ayuba hakiikandi kaŋ boro kul si zarabi nda manʼti ifutu no a nʼa tee. I nee kaŋ Ayuba ga zarabi, zama a nka goy futu tee. Amma Ayuba ga bayrandi kaŋ nga ga henan.
Citaaboo ra, takaa kul kaŋ nda Ayuba zarabi, a torro, amma woo kul ra, Ayuba mana zunubu tee.
Woo banda ga, boro tana ga šelaŋ kaŋ se i ga nee Elihu, a gay a ga šelaŋ. A bayrandi kaŋ Irkoy ga boro foo kul bana ka sawa nda nga teegoyoo. A nee kaŋ a ga tee waati ra boro šerrante ma zarabi, zama Irkoy ga nga tamey sii, a gʼi jarraba, kʼi aladabu.
Citaaboo benantaa ra, Irkoy ga Ayuba zaabi. Irkoy na Ayuba noo cimi nga cerey ga. Irkoy nʼa noo hayey kul kaŋ dere a se cine beeriyaŋ kaŋ ti: gaaham baani, nda ize, nda alman.
1
Ayuba diray taka hennaa
1 Aru foo cindi Utus gandaa ra kaŋ maaɲoo ti Ayuba. Aroo woo manʼti kala boro kaŋ ga laadir a ga šerre, a ga hunbur Irkoy, a ga nga boŋ moorandi ifutu. 2 A goo nda izʼaru iyye nda ize woy hinza. 3 A goo nda adabba kur, alman buuna boŋ zenber iyye (7.000), nda yoo zenber hinza (3.000), nda haw hinka-hinka kobsi zangu guu (500), nda farka woy zangu guu (500), nda tam boobo. Borey kul kaŋ goo waynahunay here aroo woo goo nda beeray ka bisa i kul.
4 Izʼarey ga cere marga ka hoyandi cere do affoo-foo, i ga ngi woyme hinzaa cee i ma kaa ka ŋaa ka haŋ ngi bande. 5 Waati kaŋ hoyandey zaarey bisa, Ayuba ga nga zankey cee kate kʼi henanandi. A mma tun subbaahi biya ka sargari kukurante kaa ngi affoo kul se, zama a mma nee nga boŋ se kaŋ a ga hin ka tee kaŋ nga izey na zunubu tee ngi biney ra ka albarka tee Irkoy se. Takaa woo no Ayuba gʼa tee waati kul.
Ayuba siiyan jinaa
6 Han foo Irkoy izʼarey kaa Abadantaa do margari ra, Šaytan mo huru i ra ka kaa margaroo ra. 7 Abadantaa nee Šaytan se: «Man ra ni hun?» Šaytan na Abadantaa zaabi ka nee: «Ya nka koy laboo windi ka yaara.» 8 Abadantaa nee Šaytan se: «Ni dii ay tamoo Ayuba wala? Nga cine sii laboo ga, aru no kaŋ ga laadir a ga šerre. A ga hunbur Irkoy, a ga nga boŋ moorandi ifutu.» 9 Šaytan na Abadantaa zaabi ka nee: «Yaada se Ayuba ga hunbur Irkoy wala? 10 Manʼti ni no ka nga, nda nga hugoo borey, nda haya kul kaŋ goo maaɲoo ga kali kʼi sutura wala? Nʼna albarka daŋ nga kabe goyoo ra, nga almaney goo gandaa kul ra. 11 Ay gʼa wiri ni ga, ni kaboo too a do, ma tuku haya kul kaŋ ti nga wane ga, sohõ da a ga ni wow kaaray.» 12 Abadantaa nee Šaytan se: «Aywa, ay na ni noo hinay haya kul kaŋ ti nga wane ga, amma ni kaboo masi tuku nga hunday ga.» Woo ga, Šaytan hun Abadantaa do.
13 Han foo, kaŋ Ayuba izʼarey nda nga ize woyey goo ma ŋaa i ga alaneb hari mooro haŋ ngi armey kul ibeeroo do, 14 boro foo kate alhabar Ayuba se ka nee a se: «Hawey mma goo ma beeri, farkey goo ma kur jerey ga, 15 Šeba gandaa boroyaŋ kaa ka kaŋ i ga, i na adabbawey dii ka koy nda ey, i na tamey wii nda takuba. Agay hinne no ka yena ka kaa ka alhabaroo har ma ne.»
16 A mma goo ma šelaŋ da kaŋ boro tana kaa ka nee: «Irkoy nuune kaŋ ka hun beenaa ra, a na almaney nda tamey ton kʼi wii. Agay hinne no ka yena ka kaa ka alhabaroo har ma ne.»
17 A mma goo ma šelaŋ da kaŋ boro tana kaa ka nee: «Kalde boroyaŋ kaŋ marga ka tee kanandi hinza, i kaŋ yoowey ga kʼi kom, i na tamey wii nda takuba. Agay hinne no ka yena ka kaa ka alhabaroo har ma ne.»
18 A mma goo ma šelaŋ da kaŋ boro tana kaa ka nee: «Ni izʼarey nda ni ize woyey mma ŋaa, i ga alaneb hari mooro haŋ ngi armey kul ibeeroo do, 19 kaŋ hew beeri kaa ka hun saajoo se banda, a na hugoo kanje taacaa kar, a kaŋ soogey boŋ, i buu. Agay hinne no ka yena ka kaa ka alhabaroo har ma ne.»
20 Woo ga, Ayuba tun nga boŋ ga, a na nga burmusoo kottu, a na nga boŋoo cebu, woo banda ga, a kaŋ laboo ra ka sujudu, 21 a nee: «Gaa koonu nda ay fatta ay ɲaa gundoo ra, ay gaa koonoo nda ay ga koy. Abadantaa ka noo, Abadantaa ka taa, albarka ma bara Abadantaa maaɲoo ga!»
22 Woo kul ra, Ayuba mana zunubu tee, a mana haya laala kul har Irkoy se.