Sargarey citaaboo
Citaaboo fahamandiroo
Sargarey citaaboo sorro jinaa gʼir cebe kaŋ cere kubayyan hukkumoo ra Irkoy ga ciya Musa se ka šelaŋ a bande. Citaaboo kul ra, Irkoy ga Musa noo ašariya boobo, nda fondoyaŋ kaŋ a mʼi noo Izirayel borey se, nda yaamar kaŋ ti: «Boro kaŋ gʼi ka goy ga huna nda ey.» (zamnaa 18.5; Rom borey batagaa 10.5). Irkoy mma baa nga ma Izirayel borey fahamandi takaa kaŋ nda i ga hin ka hayey gagay kaŋ ga ceeci ka nga nda ngi gamoo hasara, nda mo ka cere kubayyan hukkumoo tee hakiika ra cere kubay doo.
Hõ borey kaŋ ga citaaboo woo caw, ašariyawey wey ga hin ka tee i se boŋhaway. Amma a ga ganakey hongandi nongu kul kaŋ ra i goo, nda alwaati kul, kaŋ boro nda nga Koyoo gamoo ma boori manʼti kala alwaazibi nbunadam hunaroo se.
1
Sargari kukurantaa
1 Abadantaa na Musa cee cere kubayyan hukkumoo do ka šelaŋ a se ka nee: 2 «Šelaŋ Izirayel borey se, nee i se: ‹Nda boro foo war ra ga baa nga ma adabba tee sargari Abadantaa maaɲoo ga, a mʼa kaa alman beerey wala ibuuney ra.
3 Nda hayaa kaŋ a gʼa kaa manʼti kala haw-ize sargari kukurante, a ma tee aru kaŋ ga malal sii, a ma sargaroo kaa cere kubayyan hukkumoo miɲoo ga hala Abadantaa ma duu kʼa taa. 4 A ma nga kaboo fur sargari kukurantaa almanoo boŋoo ga, Abadantaa gʼa taa, ka nga zunubey tuusu. 5 A ma haw-izoo koosu Abadantaa jine. Haruna izʼarey, sargari juwalkey ma kate kuroo kʼa say-say sargari tonadogoo carawey bande kaŋ goo cere kubayyan hukkumoo miɲoo ga. 6 Boraa ma hawoo fooru kʼa dunbu-dunbu. 7 Sargari juwalkaa Haruna izʼarey ma nuune daŋ sargari tonadogoo boŋ ka tuuri kanandi nuunaa boŋ. 8 Haruna izʼarey, sargari juwalkey ma ham dunbu-dunbantey, nda boŋoo, nda maanoo kanandi tuurey boŋ nuunaa ga kaŋ goo sargari tonadogoo boŋ. 9 A ma teeley nda kobsey ɲumay nda hari, sargari juwalkaa mʼi kul dullandi sargari tonadogoo boŋ. Sargari kukurante no, sargari tonante kaŋ sunnaaraa ga kan Abadantaa se.
10 Nda nga sargaroo si hun kala alman buuney ra ka tee sargari kukurante, a ma tee feeji wala hancin, aru kaŋ ga malal sii. 11 A mʼa koosu sargari tonadogoo hawsa caraa here hukkumoo tenje Abadantaa jine. Haruna izʼarey, sargari juwalkey ma kuroo say-say sargari tonadogoo carawey bande. 12 A mʼa dunbu-dunbu, boŋoo nda maanoo goo a ra. Sargari juwalkaa mʼi kanandi tuurey boŋ nuunaa ga kaŋ goo sargari tonadogoo boŋ. 13 A ma teeley nda kobsey ɲumay nda hari. Sargari juwalkaa mʼi kul dullandi kʼi sarga sargari tonadogoo boŋ. Sargari kukurante no, sargari tonante kaŋ sunnaaraa ga kan Abadantaa se.
14 Nda nga sargaroo si hun kala cirawey ra ka tee sargari kukurante Abadantaa se, a ma tee gubaguba wala tuuzun-ize. 15 Sargari juwalkaa mʼa sarga sargari tonadogoo boŋ, a ma boŋoo kaa kʼa dullandi sargari tonadogoo boŋ, de kuroo ma doorandi sargari tonadogoo caraa ga. 16 A ma zunduroo dogu, nga nda hayey kaŋ goo a ra*1.16 «nga nda hayey kaŋ goo a ra», Ebere šenni ra, almaganaa faa ti «nga nda fitawey». kʼi warra sargari tonadogoo jeroo ga, waynahunay here, nongoo kaŋ ra i ga boosey daŋ. 17 A ma fatawey nda cere game kottu bila i ma hun cere ga. Sargari juwalkaa mʼa dullandi sargari tonadogoo tuuroo boŋ kaŋ goo nuunaa ra. Sargari kukurante no, sargari tonante kaŋ sunnaaraa ga kan Abadantaa se.›»
*1:16 1.16 «nga nda hayey kaŋ goo a ra», Ebere šenni ra, almaganaa faa ti «nga nda fitawey».