9
Izirayel borey na ngi zunubey har kaaray
1 Handu follokaa jirbi waranka cindi taacantoo (24to) ra, Izirayel borey marga ka saaku kasa nda labu daŋ ngi ga ka meehaw. 2 Izirayel borey hayroo na ngi boŋ fay nda yawey, i koy kay ka ngi zunubey nda ngi baabey laybey har kaaray. 3 Waatoo kaŋ i kaa ka kay ngi kaydogey ra, i na guuru hinza cine tee i ga Abadantaa, ngi Koyoo ašariyaa tiiraa caw. I yee ka guuru hinza cine tee i ga ngi zunubey har, i ga sujudu Abadantaa, ngi Koyoo jine.
4 Yešuwa, nda Bani, nda Kadmiyel, nda Šebaniya, nda Bunni, nda Šerebiya, nda Bani, nda Kenani žigi ka koy Lewi borey dogoo ra ka jinde jer ka kaati ka Abadantaa, ngi Koyoo cee.
Lewi borey Irkoy ŋaarayroo
5 Lewi borey Yešuwa, nda Kadmiyel, nda Bani, nda Hašabneya, nda Šebaniya, nda Šerebiya, nda Hodiya, nda Šebaniya, nda Petakiya nee:
«Wa tun ka war Koyoo Abadantaa saabu abada hala abada.
Abadantaa, ni maa daržantaa ma saabandi
kaŋ bisa saabuyan kul nda beeray kul!
6 Ni hinne ti Abadantaa.
Ni ka beenaa tee,
ka beenaa beenaa nda nga hayey kul kaŋ goo a ra,
nda laboo nda haya kul kaŋ goo a boŋ,
teekowey nda haya kul kaŋ goo i ra tee.
Ni no ka hundi daŋ wey kul ra,
haya kul kaŋ goo beenaa ra ga sujudu ma ne.
7 Ni ti Abadantaa, Irkoy kaŋ na Ibirim suuba,
kaŋ nʼa fattandi Ur koyraa kaŋ goo Kalde gandaa ra,
de nʼna maaɲoo daŋ Ibirahima.
8 Ni dii kaŋ a ga laadir,
nʼna amaana daŋ ni nda a game,
ka nga hayroo noo gandaa
kaŋ ti Kanaŋ borey, nda Heti borey, nda Amor borey,
nda Ferezi borey, nda Žebuz borey, nda Girgaši borey wane.
Hayaa kaŋ nʼnʼa har, nʼnʼa tee, zama nʼga šerre.
9 Ni dii ir hayragey zaraboo Misira,
de mo ni maa ngi wurroo Kakaarey teekoo jere.
10 Nʼna tammaasayaŋ nda kayfiyaŋ tee,
ka Firawuuna nda nga borey gande,
nda nga gandaa jamaa kul,
zama nʼga kabekunafutaa bay kaŋ i nʼa tee ir hayragey se.
Nʼna ni maaɲoo kaataray,
woo se a ga bara hala hõ.
11 Nʼna teekoo fersi ihinka Izirayel borey jine,
de i bisa teekoo game a ga kogu.
Nʼna borey kaŋ gʼi gaarandi warra hari guusey ra,
ma nee tondi kaŋ kaŋ hari guusa ra.
12 Nʼna duula kaŋ ga kay i jine kʼi gongu zaari here,
nʼna nuune kaŋ ga kay i jine cijin here ka ngi fondaa noo gaay
kaŋ i ga hima kʼa zaa.
13 Ni zunbu Sinay tondi hondoo boŋ,
ni goo beenaa ra ka šelaŋ i se,
nʼna hantum šerranteyaŋ kaŋ kayandi dunbu i se nda ašariya cimikoyniyaŋ,
nda hantumyaŋ, nda yaamar hennayaŋ.
14 Nʼnʼi bayrandi ni hunanzamzaari henanantaa,
de mo nʼna yaamaryaŋ, nda hantumyaŋ, nda ašariya daŋ i se
ni tamoo Musa bande.
15 Waatoo kaŋ i heray,
nʼnʼi noo ŋaayan kaŋ hun beenaa ra waatoo kaŋ i jaw,
nʼna hari fattandi i se tondoo ra,
ni nee i se i ma huru ka gandaa mayray
kaŋ nʼna kabe jer ka žee kaŋ nʼgʼa noo i se.
16 Amma ngi nda ir hayragey bolsay, i boŋšenday.
I mana haŋajer ni yaamarey se.
17 I wanji ka maa,
i mana hongu kayfey kaŋ nʼnʼi tee i se.
I boŋšenday, ngi tureyanoo ra
i na boŋkoyni tee ngi boŋ se ka willi ngi tamtaraa ra Misira.
Amma ni manʼti kala Koy kaŋ ga yaafa,
kaŋ ga alhormo tee, a ga tamalla,
nʼsi cahã ka futu, ni borohennataraa ga beeri,
manʼi naŋ.
18 Ba waatoo kaŋ i na guuru mennandi kʼa tee yagaw
ka nee: ‹Ni Koyoo ne,
woo kaŋ na ni fattandi Misira!›*9.18 Fattaroo 32.4–8
I hanse ka ni tooɲe.
19 Amma ni, ni hinnari beeroo ra,
manʼi fur saajoo ra.
Duulaa kaŋ ga kay mana fay nda kʼi gongu zaari here
nda nuunaa kaŋ ga kay cijin here ngi diraa ra,
ka ngi fondaa noo gaay kaŋ i ga hima kʼa zaa.
20 Nʼna ni Hundi hennaa kʼi noo fahamay,
mana ŋaahayaa kaŋ se i ga nee man ganji i se i mʼa ŋaa,
nʼnʼi noo hari waatoo kaŋ i jaw.
21 Jiiri woytaaci (40) haya kul kaŋ ga i ga too saajoo ra
nʼnʼa noo i se.
Haya kul manʼi kuma,
ngi bankaarawey mana žen,
ngi cewey mana funsu.
22 Nʼna laamayaŋ nda jamayaŋ kaŋandi kabey ra
kʼi noo labey hirrey.
I na Hešboŋ gandaa kaŋ ti kokoyoo Sihoŋ wane,
nda Bašaŋ gandaa kaŋ ti kokoyoo Og wane
daŋ ngi mayray ra.
23 Nʼna ngi hayroo goorandi sanda beenaa handarawey
kʼi daŋ gandaa ra
kaŋ ni nee ngi baabey se kaŋ i ma koy a mayray.
24 Ngi hayroo huru gandaa ra, i nʼa mayray,
nʼna gandaa gorokey, Kanaŋ borey kayna i jine,
nʼnʼi daŋ kabey ra,
ngi kokoyey nda gandaa jamawey,
hala i ma haya tee i se kaŋ i baa.
25 I na koyrayaŋ kaŋ kuubandi nda cete dii nda labu hennayaŋ,
huguyaŋ huru ngi mayraa ra kaŋ ga too nda haya henna dumi kul,
day fanšanteyaŋ, nda alaneb faari, nda zaytuɲaa,
nda tuuri boobo kaŋ izey ga ŋandi.
I ŋaa hala i kungu, i na gaaham tee,
i huna kaani ra ni borohennataray beeroo ra.
26 Amma i ture, i tun ma ne.
I na banda bere ni ašariyaa se,
i na ni annabey wii kaŋ gʼi teje i ma willi ni ga,
i hanse ka ni tooɲe.
27 Woo ga, nʼnʼi kaŋandi ngi torrokey kabey ra kaŋ nʼi šiita.
Amma ngi binemaraa waati i kaati ka ni cee,
nʼna haŋajer i se beenaa ra,
ni hinnari beeroo ra nʼnʼi noo hallasikawyaŋ
kaŋ nʼi feeri kʼi kaa ngi iberey kabey ra.
28 Waatoo kaŋ i duu hunanzamay, i yee koyne ka ifutu tee ni jine.
Woo ga, nʼnʼi naŋ ngi iberey kabey ra kaŋyaŋ na gaabi daŋ i ga.
I yee koyne ka kaati ka ni cee,
ni, nʼna haŋajer i se beenaa ra,
ni tamallayan beeroo ra cee boobo nʼnʼi feeri.
29 Nʼnʼi teje hala i ma willi kate ni ašariyaa ga,
amma i na binebeeray,
i mana haŋajer ni yaamarey se,
i na zunubu tee ni hantumey kaŋ kayandi ga,
ka gar boro kaŋ gʼi ka dira,
ga hin ka huna nda ey,
i tee turante nda hiɲešenda,
i mana haŋajer.
30 Jiiri boobo nʼnʼi suuri,
nʼna ni Hundoo ka ni annabey ka teje i ga,
amma i mana maa.
Woo ga, nʼnʼi kaŋandi gandawey jamawey kabe ra.
31 Ni tamallayan beeroo ra manʼi halaci,
manʼi fur,
zama ni manʼti kala Koy kaŋ ga hinna a ga tamalla.
32 Sohõ ir Koyoo, Irkoy beeroo, Hinikoyoo kaŋ ti hunburhaya,
ni kaŋ ga amaana too, kaŋ ga borohennataray tee,
zaraboo kaŋ duu ir, nda ir kokoyey, nda ir boŋkoyney, nda ir sargari juwalkey, nda ir annabey, nda ir baabey, nda ni jamaa kul
za Asiri kokoyey waati hala hõ,
masʼa guna sanda haya kaccu.
33 Nʼga henan hayaa kul ra kaŋ duu ir,
zama nʼga goy nda cimi,
ir, ir na goy futu tee.
34 Ir kokoyey, nda ir boŋkoyney, nda ir sargari juwalkey, nda ir baabey mana ni ašariyaa ka dira,
i mana lakkal daŋ ni seedetarawey se kaŋ nda ni teje i ga.
35 Ba kaŋ i goo ngi laamaa ra,
ba kaŋ nʼnʼi noo gomni beeri,
ganda beeri hennaa ra kaŋ nʼnʼa daŋ i jine,
i mana alhaadimay ma ne,
i mana willi ngi goy futawey se bande.
36 Hõ baɲɲayaŋ ti ir!
Gandaa kaŋ nʼnʼa noo ir baabey se
hala i ma nga tuuri-izey ŋaa, i ma daame nda nga gomnoo,
ir manʼti kala baɲɲayaŋ a ra!
37 Nga hegay beeroo manʼti kala kokoyey wane
kaŋ nʼnʼi daŋ ir boŋ ir zunubey maaganda.
Ir nda ir almaney goo i cire kʼir tee woo kaŋ kan i se,
ir goo binemarayyan beeri ra!»