23
1 Balam nee Balak se: «Sargari tonadoo iyye cin ya ne, ne ra, ma haw yaaru kobsi iyye nda feeji gaaru boŋ iyye soolu ya ne.» 2 Balak na hayaa tee kaŋ Balam nʼa har. Balak nda Balam na haw yaaru foo nda feeji gaaru foo kaa sargari, sargari tonadoo foo kul boŋ. 3 Balam nee Balak se: «Kay ni sargari kukurantaa jere, ay ga hibi, a ga hin ka tee Abadantaa ma kaa kʼay kubay. Ay ga hayaa har ma ne kaŋ a nʼa cebe ya ne.» A koy hondu foo boŋ. 4 Irkoy na Balam kubay, Balam nee a se: «Ay na sargari tonadoo iyyaa kayandi, ay na haw yaaru foo nda feeji gaaru foo kaa sargari, sargari tonadoo foo kul ga.» 5 Abadantaa na šenni foo daŋ Balam miɲoo ra, a nee a se: «Yee Balak do ka šelaŋ a se nda takaa woo.»
6 Balam yee Balak do, a nʼa gar a ga kay nga sargari kukurantaa jere, nga nda Mowab boŋkoyney kul. 7 Balam na nga yaasay šennoo har ka nee:
«Balak nʼay ka hun Siiri gandaa ra,
Mowab kokoyoo nʼay ka hun waynahunay tondi hondey do, a nee:
‹Kaa ka Yakuba danga ya ne,
kaa ka futu Izirayel ga.›
8 Taka foo nda ay ga boro danga kaŋ Irkoy manʼa laali?
Taka foo nda ay ga futu boro ga kaŋ Abadantaa mana futu a ga?
9 Ay goo tondey boŋ ay ga dii a,
ay goo hondey boŋ ay gʼa honnay.
Nga ne, jamaa no kaŋ gorodogoo goo jere ga,
de mo a si nga boŋ daŋ gandawey ra.
10 May no ma hin ka Yakuba kaŋ ga hima nda labuhamni kabu*23.10 Sintinoo 13.14.,
ka ba Izirayel zamna taacaa affoo hinnaa har?
Yala ya buu nda takaa kaŋ nda boro šerrantey ga buu,
yala ay kokoroo ma hima nda ngi wanoo.»
11 Balak nee Balam se: «Cin ti woo kaŋ nʼnʼa tee ya ne? Ay kate ni hala mʼay iberey danga, amma nga ne, ni nka gaara i se!» 12 Balam nʼa zaabi ka nee: «Ay si hima ka hawgay ka hayaa har kaŋ Abadantaa nʼa daŋ ay miɲoo ra wala?»
Gaarari hinkantoo kaŋ Balam nʼa tee Izirayel jamaa se
13 Balak nee a se: «Ay gʼa wiri ni ga, kaa ay bande ka koy nongu tana ra kaŋ ra nʼga dii ey, jere foo de no nʼga dii a, nʼsi dii a kul. No din ra mʼa danga ya ne.» 14 A na Balam ka koy hala nongoo kaŋ ga boro ga kay ka guna, Pisiga tondi hondoo boŋoo ga. A na sargari tonadoo iyye cin, a na haw yaaru foo nda feeji gaaru foo kaa sargari, sargari tonadoo foo kul boŋ. 15 Balam nee Balak se: «Kay ne ni sargari kukurantaa jeroo ga, agay, ay ga koy Irkoy kubay.»
16 Abadantaa kaa ka Balam kubay ka šenni daŋ miɲoo ra, a nee a se: «Yee Balak do, ma šelaŋ a se nda takaa kaŋ nda ay gʼa har ma ne.» 17 A yee Balak do, a nʼa gar a ga kay nga sargari kukurantaa jeroo ga, nga nda Mowab boŋkoyney. Balak nee a se: «Macin no Abadantaa nee?» 18 Balam na nga yaasay šennoo har ka nee:
«Balak, tun, ma maa,
haŋajer ya ne, Sipor izʼaroo.
19 Irkoy manʼti adamize kaŋ ga hin ka taari,
a manʼti boro kaŋ ga hin ka nimsi.
Haya kaŋ a nʼa har, a sʼa tee wala?
Šenni kaŋ a nʼa har, a sʼa too wala?
20 Ay yadda ka gaara,
a na albarka daŋ, ay si hin kʼa tunandi.
21 A mana dii ifutu Yakuba ra,
a mana dii imeera Izirayel ra.
Abadantaa, nga Koyoo goo a bande.
Kobiroo kaŋ ga teendi kokoy se ga teendi a do.
22 Irkoy nʼi fattandi Misira,
a ga hima nda ganjihaw hilley.
23 Kotte mana daŋandi Yakuba se,
gunandiyan mana teendi Izirayel se.†23.23 «Kotte mana daŋandi Yakuba se, gunandiyan mana teendi Izirayel se», Ebere šenni ra, almaganaa faa ti «Yakuba si kotte, gunandi sii Izirayel ra».
Nda waatoo too, takaa kaŋ Irkoy gʼa tee
ga harandi Yakuba nda Izirayel se.
24 Nga ne, jama no kaŋ ga tun sanda ganjihayla woy,
a ga kay sanda ganjihayla aru.
A si kani nda a mana hamoo kaŋ a nʼa dii ŋaa,
ka wey kaŋ a nʼi wii kuroo haŋ.»
25 Balak nee Balam se: «Nda nʼsʼa danga, adiši masi gaara a se!» 26 Balam nʼa zaabi ka nee: «Ay manʼa har ma ne kaŋ haya kul kaŋ Abadantaa nʼa har, ay gʼa tee wala?»
Gaarari hinzantoo kaŋ Balam nʼa tee Izirayel jamaa se
27 Balak nee Balam se: «Ay gʼa wiri ni ga, kaa, ay ga ni ka koy nongu tana ra, a ga hin ka tee no din ra Irkoy do a ga boori ma jamaa danga ya ne.» 28 Balak na Balam ka koy Pewor tondi hondoo boŋoo boŋ kaŋ goo saajoo se beene. 29 Balam nee Balak se: «Sargari tonadoo iyye cin ya ne, ne ra, ma haw yaaru kobsi iyye nda feeji gaaru boŋ iyye soolu ya ne.» 30 Balak na hayaa tee kaŋ Balam nʼa har. A na haw yaaru foo nda feeji gaaru foo kaa sargari, sargari tonadoo foo kul boŋ.