1 Isufi izʼaroo kaŋ ti Manase, nga alkabiilaa boro goo no kaŋ maaɲoo ti Selofad. Selofad ti Hefer izʼaroo, Hefer ti Galad izʼaroo, Galad ti Makir izʼaroo, Makir ti Manase izʼaroo. Selofad ize woyey maaɲey ti: Mahila, nda Nowa, nda Hogla, nda Milka, nda Tirsa. 2 Han foo ize woyey kaa ka kay Musa nda sargari juwalkaa Eleyazar jine, nda boŋkoyney, nda jamaa kul jine cere kubayyan hukkumoo miɲoo ga. I nee: 3 «Ir baaba buu saajoo ra, nga, a sii jamaa ra kaŋ ture Abadantaa ga Kora borey bande. Nga boŋ zunuboo kʼa wii, de mo izʼaru sii a se. 4 Macin se ir baaba maaɲoo ga hun nga alkabiilaa ra, kaŋ se a mana duu izʼaru wala? Ir noo doo ir baaba armey game.»

5 Hayaa kaŋ i nʼa ceeci, Musa koy a daŋ Abadantaa jine. 6 Abadantaa šelaŋ Musa se ka nee: 7 «Selofad ize woyey goo nda cimi, i noo doo kaŋ ga tee ngi wane ngi baaba armey game, ma ngi baaba tuboo noo i se. 8 Šelaŋ Izirayel borey se ka nee: ‹Nda aru buu bila nda a ma izʼaru naŋ, wa nga tuboo noo nga ize woyoo se. 9 Nda a sii nda ize woy, wa nga tuboo noo nga armey se. 10 Nda a sii nda arma, wa nga tuboo noo baaboo armey se. 11 Nda baaboo sii nda arma, war ma nga tuboo noo nga boro maanaa se nga alkabiilaa ra. Nga no ma tuboo zaa. A ga tee Izirayel borey se yaamar hantumante, sanda takaa kaŋ nda Abadantaa nʼa har Musa se.›»

12 Abadantaa nee Musa se: «Žigi Abarim tondi hondoo woo boŋ, ma gandaa guna kaŋ ay nʼa noo Izirayel borey se. 13 Nʼga dii a, nga banda ga, ni mo, nʼga koy ni hayragey gar alaaharaa sanda takaa kaŋ nda ni armaa Haruna koy i gar, 14 zama war wanji ay yaamaroo ga Tisin saajoo ra. Waatoo kaŋ jamaa yenje nda agay, war manʼay henanyanoo cebe i se waatoo kaŋ i ga hari wiri.» Maanaa Meriba haroo kaŋ goo Kadeš, Tisin saajoo ra.*27.14 Zamnaa 20.1–13.

15 Musa šelaŋ Abadantaa se ka nee: 16 «Abadantaa baahunantey kul hundey Koyoo, aru daŋ jamaa jine 17 kaŋ ga huru i jine ngi koyyanoo nda ngi kaayanoo ga, kaŋ gʼi ka koy, a gʼi ka yee kate, hala jamaa masi tee sanda alman kur kaŋ sii nda kurkaw.» 18 Abadantaa nee Musa se: «Žozuwe kaŋ ti Nun izʼaroo zaa, aru no kaŋ ra ay Hundoo goo, ma ni kaboo fur a ga. 19 Mʼa kayandi sargari juwalkaa Eleyazar jine nda jamaa kul jine, kʼa gorandi goyoo ra kaŋ ay nʼa talfi a ga borey kul jine. 20 Mʼa noo ni hinoo ra, hala Izirayel borey jamaa kul ma haŋajer a se. 21 A ma kay sargari juwalkaa Eleyazar jine kaŋ ga Irkoy ibaayoo ceeci a se nda alkurraa goy jinawey kaŋ ti Urim Abadantaa jine. Eleyazar yaamaroo ga, Žozuwe nda Izirayel borey jamaa kul ga koy, nga yaamaroo ga, i ga yee kate.» 22 Musa na hayaa tee kaŋ nda Abadantaa nʼa yaamar. A na Žozuwe zaa kʼa kayandi sargari juwalkaa Eleyazar jine nda jamaa kul jine. 23 Musa na nga kabey fur a boŋ kʼa gorandi goyoo ra nda takaa kaŋ nda Abadantaa nʼa har Musa se.