1 Izirayel borey naarumaa ra ka fatta Misira gandaa ra, wongu-ize ka koy wongu-ize, Musa nda Haruna ti ngi jineborey. Nongey kaŋ ra i kay-kay ti wey. 2 Ngi fattaroo ra, Musa na nongey hantum kaŋ ra i kay-kay Abadantaa yaamaroo ga. Nongey ne kaŋ ra i kay-kay ngi naarumaa ra:

3 I tun Ramses handu jinaa ra, handu jinaa jirbi woy cindi guwantoo (15to) hane. Borcintaraa jingaroo subaa ra, Izirayel borey fatta, haya kul manʼi ganji Misira borey kul jine. 4 Ka gar Misira borey goo ma ngi borey fiji kaŋ Abadantaa nʼi kar i ra, maanaa gunde jinawey kul. Abadantaa ka nga ciitoo kaŋandi ngi koyey boŋ.

5 Izirayel borey hun Ramses ka koy goro Sukot. 6 I hun Sukot ka koy goro Etam kaŋ goo saajoo miɲoo ga. 7 I hun Etam ka kuubi ka willi ka koy Pi-Hayrot kaŋ goo Bal-Sefoŋ tenje, ka goro Migdol jine. 8 I hun Pi-Hayrot ka bisa teekoo game ka koy saajoo here. I na jirbi hinza diray tee Etam saajoo ra ka koy goro Mara. 9 I hun Mara ka koy too Elim. Hariɲaa woy cindi hinka (12) nda teenayɲaa woyye (70) goo Elim, no din ra i goro. 10 I hun Elim ka koy goro Kakaarey teekoo jere. 11 I hun Kakaarey teekoo jere ka koy goro Sin saajoo ra. 12 I hun Sin saajoo ra ka koy goro Dofka 13 I hun Dofka ka koy goro Aluš. 14 I hun Aluš ka koy goro Refidim. Jamaa mana duu haŋ hari no din. 15 I hun Refidim ka koy goro Sinay saajoo ra.

16 I hun Sinay saajoo ra ka koy goro Kiworot-Hataawa. 17 I hun Kiworot-Hataawa ka koy goro Haserot. 18 I hun Haserot ka koy goro Ritma. 19 I hun Ritma ka koy goro Rimoŋ-Peres. 20 I hun Rimoŋ-Peres ka koy goro Libna. 21 I hun Libna ka koy goro Risa. 22 I hun Risa ka koy goro Keheleta. 23 I hun Keheleta ka koy goro Šefer tondi hondoo do. 24 I hun Šefer tondi hondoo do ka koy goro Harada. 25 I hun Harada ka koy goro Makelot. 26 I hun Makelot ka koy goro Tahat. 27 I hun Tahat ka koy goro Tera. 28 I hun Tera ka koy goro Mitka. 29 I hun Mitka ka koy goro Hašmona. 30 I hun Hašmona ka koy goro Moserot. 31 I hun Moserot ka koy goro Bene-Yakaŋ. 32 I hun Bene-Yakaŋ ka koy goro Hor-Gidgad. 33 I hun Hor-Gidgad ka koy goro Yotbata. 34 I hun Yotbata ka koy goro Abirona. 35 I hun Abirona ka koy goro Esiyoŋ-Geber. 36 I hun Esiyoŋ-Geber ka koy goro Tisin saajoo ra, maanaa Kadeš. 37 I hun Kadeš ka koy goro Hor tondi hondoo do, Edom gandaa benantaa ga.

38 Sargari juwalkaa Haruna žigi Hor tondi hondoo boŋ Abadantaa yaamaroo ga. A buu no din Izirayel borey fattaroo Misira gandaa ra banda ga jiiri woytaacantoo (40to), handu guwantoo, zaari jinaa ra. 39 Haruna sii nda kala jiiri zangu nda waranka cindi hinza (123) waatoo kaŋ a buu Hor tondi hondoo boŋ.

40 Arad kokoyoo kaŋ ti Kanaŋ boro kaŋ ga goro gurma here Kanaŋ gandaa ra maa Izirayel borey kaayanoo.

41 I hun Hor tondi hondoo do ka koy goro Salmona. 42 I hun Salmona ka koy goro Punoŋ. 43 I hun Punoŋ ka koy goro Obot. 44 I hun Obot ka koy goro Iye-Abarim kaŋ goo Mowab gandaa hirroo ga. 45 I hun Iye-Abarim ka koy goro Diboŋ-Gad. 46 I hun Diboŋ-Gad ka koy goro Almoŋ-Diblatayim. 47 I hun Almoŋ-Diblatayim ka koy goro Abarim tondi hondey do Nebo tondi hondoo tenje. 48 I hun Abarim tondi hondey do ka koy goro Mowab ganganey ra, Žurdeŋ isaa jere, Žeriko tenje. 49 I koy goro Žurdeŋ isaa jere, kʼa dii Bet-Yešimot hala Abel-Šitim, Mowab ganganey ra.

50 Mowab ganganey ra kaŋ goo Žurdeŋ isaa jere, Žeriko tenje, Abadantaa šelaŋ Musa se ka nee: 51 «Šelaŋ Izirayel borey se, nee i se: ‹Waati kaŋ war na Žurdeŋ isaa deŋ ka huru Kanaŋ gandaa ra, 52 war ma gandaa borey kul gaaray war jine, war ma ngi tondi toorey kul derandi, ka assuurawey kaŋ i nʼi tee nda guuru mennante kaŋ i gʼi gana kul derandi, ka tooru ganadogey kul halaci. 53 War ma gandaa mayray, ka goro a ra, zama war se ay na gandaa woo noo a ma tee war mayray. 54 War ma alkurra kar ka gandaa kaŋ ti war tuboo zamna, alkabiila foo kul nda nga bagaa. Alkabiila beeri, war ma baa beeri kaa a se. Alkabiila kaccu, war ma baa kaccu kaa a se. Affoo kul ga duu nongoo kaŋ ga a kaŋ alkurraa ra. War ga duu baa ka sawa nda war baabey alkabiilawey. 55 Amma nda war mana gandaa borey gaaray war jine, wey kaŋ war nʼi naŋ i ra ga tee karji war moɲey ra nda naaji war carawey ra. I ga war farandi gandaa kaŋ ra war ga goro. 56 Nda woo mana tee, hayaa kaŋ ay baa yʼa tee i se, ay gʼa tee war se.›»