1 Alaneb hari moora manʼti kala ɲooɲokaw,

harifutu ga hoolo,

boro kul kaŋ i gʼa suwandi si duu lakkal.

2 Ka hunbur kokoy ga hima nda hunburaa

kaŋ ganjihayla soogo booroyanoo gʼa tee,

boro kaŋ nʼa tunandi ga nga boŋ daŋ farratay ra.

3 Beeray no boro se ma mooro yenje,

lakkal jaŋante mma yenje tunandi.

4 Hargu maaganda fuyyante si beeri,

hegaa waati, a ga haya wiri, amma a si duu baffoo.

5 Hayey kaŋ adamize gʼi dabari nga binoo ra

ga hima nda hari guusuyaŋ,

lakkalkoyni ga gur a ra.

6 Boro boobo ga ngi boŋ tee boro henna,

may no ma hin ka duu boro naanayante?

7 Boro šerrante ga hanga fondo laadirante,

izey ga duu gomni dumaa ga.

8 Kokoy kaŋ ga goro nga kokoy gorodogoo ra ka ciiti

ga nga moo gunayanoo ka hayey faaru ka ifutu kul kaa i ra.

9 May no ma nee: «Ay nʼay binoo henanandi,

zunubu kul sii ay ga?»

10 Ka neeši tondi barmay wala ka neešihaya barmay,

ihinkaa kul manʼti kala almuhal Abadantaa do.

11 Zanka, nga teegoyey ga cebe

nda nga dira takaa ga kaa ka henan ka šerre.

12 Haŋa kaŋ ga maa, nda moo kaŋ ga dii,

Abadantaa ka ihinkaa kul tee.

13 Masi tee jirbi baakaw nda nʼsi baa ma talka,

naŋ ni moɲey ma hay, nʼga kungu ŋaayan ra.

14 Daykaa mma nee: «A si boori, a si boori!»

Nda a hun no a ga nga boŋ saabu.

15 Wura nda tondi hay šenda booboyaŋ goo no,

hayey kul ihennaa manʼti kala šenni henna.

16 Nga darbaa dii, zama a nka nga boŋ tolme,

boro kaŋ boro sʼa bay maaganda,

boraa kaŋ na nga boŋ tolme ma tolmaa bana.

17 Taari ŋaayan ga kan boro miɲoo ra,

amma woo banda ga, miɲoo ga too nda tondiŋaari.

18 Hoyray no ma kate dabarey ma boori,

ma huru wongu ra nda laasaabay.

19 Boro kaŋ ga almunafikitaray tee mma sirri feeri,

ni boŋ hawgay boro ga kaŋ šennoo ga baa.

20 Boro kaŋ na nga ɲaa nda nga baaba danga,

nga fitillaa ga buu kubaa ra.

21 Boro kaŋ za a šintin nga no a cahã ka duu alman,

nga kokoroo si duu albarka.

22 Masi nee: «Ay gʼay boŋ faasa.»

Ni naataa daŋ Abadantaa ra, a ga ni hallasi.

23 Neeši tondi barmayyan manʼti kala almuhal Abadantaa do,

neeši jinay laala si boori.

24 Abadantaa no ma adamize gongu,

taka foo nda adamize ga nga fondaa bay

25 Kumsay no adamize se a ma cahã ka nee:

«Woo jisandi jere ga Irkoy se»

ka miile meefur zaayan banda ga.

26 Kokoy lakkalkoyni ga boro laaley say,

a ga haddi zurandi i boŋ.

27 Adamize lakkaloo manʼti kala Abadantaa fitilla,

a ga haya kul guna hala gaaham kunehere.

28 Borohennataray nda cimi no ma kokoy hawgay,

borohennataray no ma nga kokoytaraa tabatandi.

29 Soogey gaaboo ti ngi beeraa,

boro žeeney hinbiri kaarawey ti ngi taalamoo.

30 Dori kaŋ žabari kʼa tee manʼti kala ifutu safari,

žabari ga koy hala gaaham kunehere.