1 Maa henna baa alman beeri,

borey ma baa ni baa wura wala nzorfu kaaray.

2 Nongoo kaŋ ra almankoyni nda talka kul ti affoo

manʼti kala i kul, Abadantaa kʼi tee.

3 Boro carma ga dii bonaa, a ga tugu,

boŋbii si dii bonaa kaŋ ga kaa, nga kokoroo ti zarabiyan.

4 Ka ni boŋ yeeti ganda nda ka hunbur Abadantaa,

manʼti kala alman, nda beeray, nda hunayan duuyan.

5 Karjiyaŋ nda kumsayyaŋ bara boro šiira fondaa ga,

boro kaŋ ga hin nga boŋ ga moorʼey.

6 Fondaa kaŋ soogaa ga hima kʼa gana cawandi a se,

ba nga žeenay ga, a sʼa naŋ.

7 Almankoyni goo nda hinay talka ga,

boraa kaŋ ga garaw zaa ti boraa kaŋ garaw a se baɲɲaa.

8 Boro kaŋ ga šerretaray jaŋay say ga ifutu hegay,

nga futuroo bundoo ga dere.

9 Boro kaŋ ga hinna ga duu albarka,

zama a ga talka noo nga ŋaahayaa ra.

10 Ɲooɲokaw gaaray, yenje ga ben,

cere kakaw nda kaynandiyan ga ben.

11 Boro kaŋ ga baa bine kaaray

ga šelaŋ nda borohennataray,

kokoyoo ga tee nga ceroo.

12 Abadantaa ga bayray faaba,

a ga zanbante šenney hasara.

13 Fuyyante mma nee: «Ganjihayla goo taraa ra,

a gʼay wii farroo ra!»

14 Woy waani miɲoo manʼti kala guusu kuku,

boro kaŋ ga Abadantaa futu ga kaŋ a ra.

15 Lakkal jaŋantetaray ga hawa zanka binoo ga,

aladabu goboo no mʼa moorandi a ga.

16 Boro kaŋ ga talka kankam ka alman tee,

de a ga almankoyni noo, ga nga boŋ talkandi.

17 Haŋa kayandi ka maa lakkalkoyney šenney se,

ni binoo feeri ay bayraa se.

18 Zama a ga boori mʼi dii ni lakkaloo ra,

i kul ma soolu ni miɲoo ra.

19 Ni, ay ga ni cawandi hõ,

hala ni naanaa ma bara Abadantaa ra.

20 Ya nka mana hoyrayyaŋ nda lakkal

šenni waranza (30) hantum ma ne,

21 ka ni bayrandi haya naanayanteyaŋ

kaŋ ti šenni cimiyaŋ,

hala ma hin ka boraa kaŋ na ni donto zaabi nda cimi wala?

22 Masi alfukaaru kom, zama a sii nda hini,

masi talka motti ciitihugoo ra,

23 zama Abadantaa ga kay ngi misoo ra,

borey kaŋ ga ngi hayey taa i kone, Abadantaa ga hundey taa.

24 Masi boro bine laala tee cere,

masi hanga boro bine futu,

25 hala masi koy doona nga attabiyawey,

a masi tee ni hundoo se kumsay.

26 Masi bara borey ra kaŋ ga kabe kar ka allaahidu zaa

kaŋ gʼi boŋ tolme garaw waani se.

27 Nda haya kul sii ma ne kʼa bana,

i ga ni daaroo kaa ni cire.

28 Farru kanje jina-jinawey kaŋ ni baabey nʼi daŋ,

masʼi kaa dogey ra.

29 Ni dii boro kaŋ ga gaabandi nga goyoo ra wala?

Nga kokoroo, kokoyyaŋ do a ga kaa ka goy,

manʼti boro yaadayaŋ do.