26
Haya kaŋ ti lakkal jaŋante
Sanda hargu konni waati,
wala ncirɲi hegay waati,
takaa din da lakkal jaŋante si hima nda beeray.
 
Takaa kaŋ nda takirya ga deeši-deeši,
takaa kaŋ nda garaasa-garaasa ga deeši,
takaa din da, dangayan bila addalil sii nda alfayda.
 
Barzu goo no bari se, aljam farka se,
gobu jisandi lakkal jaŋante dumaa se.
 
Masi tuuru lakkal jaŋante se ka sawa nda nga saamataraa,
hala ni hunday masi koy hima nda a.
Tuuru lakkal jaŋante se ka sawa nda nga saamataraa,
hala a masi koy nga boŋ dii lakkalkoyni.
 
Boro kaŋ na lakkal jaŋante donto a ma koy šenni too
ga hima nda boro kaŋ ga nga cewey dunbu,
ka nga boŋ torro.
 
Takaa kaŋ nda bongu cewey sii nda alfayda,
takaa din da, yaasay sii nda alfayda lakkal jaŋante miɲoo ra.
 
Ka beeray daŋ lakkal jaŋante ga,
ga hima nda ma tondi haw fizza ga.
 
Karji kaŋ goo harifutu haŋkaw kaboo ra
ga hima nda yaasay lakkal jaŋante miɲoo ra.
10 Boro kaŋ na lakkal jaŋante zaa goy,
nda boro kaŋ ga yaara-yaarakaw zaa goy
ga hima nda yenjekaari kaŋ ga borey kul kar.
 
11 Sanda hanši kaŋ ga yee hayaa ga kaŋ a nʼa yeeri,
nga ti lakkal jaŋante kaŋ yee nga saamataraa ga.
 
12 Nʼga dii boro kaŋ ga nga boŋ dii lakkalkoyni wala?
Tammahã goo lakkal jaŋante ga ka bisa a.
Hayaa kaŋ nda fuyyante ga hima
13 Fuyyante mma nee: «Ganjihooga goo fondaa ra,
ganjihayla goo farroo ra!»
 
14 Sanda takaa kaŋ nda ganboo ga kuubi nga guurey ga,
nga nda fuyyante ga bere-bere nga daaroo ga.
 
15 Fuyyante ga nga kaboo daŋ taasaa ra,
amma kʼa ka too nga miɲoo do gʼa farandi.
 
16 Fuyyante ga nga boŋ dii lakkalkoyni
ka bisa boro iyye kaŋ ga zaabi nda lakkal.
Yaasay tanayaŋ
17 Bisakaw kaŋ ga huru yenje ra kaŋ sʼa guna
ga hima nda boro kaŋ na hanši dii nda nga haŋawey.*26.17 Bisakaw kaŋ ga huru yenje ra kaŋ sʼa guna ga hima nda boro kaŋ na hanši dii nda nga haŋawey, Ebere šenni ra, almaganaa faa ti Boro kaŋ ga huru yenje ra kaŋ sʼa guna ga hima nda boro kaŋ na hanši kaŋ ga bisa dii nda nga haŋawey.
 
18 Hollokom laala kaŋ ga nuune,
nda biraw-izeyaŋ, nda tondiyaŋ kaŋ ga wiiya warra,
19 takaa din da ti boro kaŋ ga nga cinaa darga,
woo banda ga, a ma nee: «Ya mma hooray.»
 
20 Nda tuuri sii no, nuunaa ga buu,
nda almunafiki sii no, yenjaa ga ben.
 
21 Denji bibi kaŋ goo denji cirayyaŋ ga,
tuuri kaŋ goo nuune boŋ,
takaa din da ti boro kaŋ ga yenje laalandi.
 
22 Almunafiki šenney manʼti kala sanda ŋaayan kaanayaŋ,
i ga zunbu hala gaaham kunehere.
 
23 Mee kaana bine futu
ga hima nda labu kusu
kaŋ tarayheroo daabandi nda nzorfu kaaray žiiboo.
 
24 Boro kaŋ ga boro konnay mma konnaroo tugu nda nga šenney,
ka gar zanbayan bara binoo ra.
25 Ba nda a na šenni kaanayaŋ har, masi naanay a,
zama almuhal iyye goo binoo ra.
26 Taka kul kaŋ nda a na nga konnaroo tugu,
nga laalaroo ga kaa ka fatta margari ra.
 
27 Boro kaŋ na guusu fanši ga kaŋ a ra,
tondoo ga yee boraa ga kaŋ gʼa gunguray.
 
28 Taariharkaw mma konna borey kaŋ a gʼi motti,
deene kaana mma kate hasaraw.

*26:17 26.17 Bisakaw kaŋ ga huru yenje ra kaŋ sʼa guna ga hima nda boro kaŋ na hanši dii nda nga haŋawey, Ebere šenni ra, almaganaa faa ti Boro kaŋ ga huru yenje ra kaŋ sʼa guna ga hima nda boro kaŋ na hanši kaŋ ga bisa dii nda nga haŋawey.