1 Boro futu ga zuru ka gar boro kul sii a bande,

boro šerrantey ga lakkalkanay sanda ganjihayla soogo.

2 Nda ganda goo tureyan ra, nga boŋkoyney ga boobo,

amma nda boŋkoyni bayraykoyni kaŋ goo nda lakkal no,

kokoray goo no.

3 Talka kaŋ ga yalaafantey kaynandi

ga hima nda ncirɲi kaŋ ga hasaraw tee ka hegay ganji.

4 Boro kaŋ ga ašariyaa naŋ mma boro futu saabu,

boro kaŋ ga ašariyaa dii mma boro futu tangam.

5 Boro laala si šerretaray bay,

Borey kaŋ ga Abadantaa ceeci ga faham haya kul se.

6 Talka kaŋ ga dira nga laadirtaraa ra

baa almankoyni kaŋ ga dira fondo šiira ra.

7 Boro kaŋ ga ašariyaa dii manʼti kala izʼaru lakkalkoyni,

boro kaŋ hanga ize futawey ga nga baaba haawandi.

8 Boro kaŋ ga nga almanoo tonton nda albaha nda arriba futu,

a sʼa marga kala boraa se kaŋ ga hinna.

9 Boro kaŋ na nga haŋaa kaa ašariyaa se nga masi maa,

boraa, ba nga Irkoy ŋaarayroo ti almuhal.

10 Boro kaŋ ga boro šerrantey daŋ fondo laala ga

ga kaŋ guusoo ra kaŋ a nʼa fanši,

laadirantey ga gomni tubu.

11 Almankoyni mma nga boŋ dii lakkalkoyni,

amma talka lakkalkoyni gʼa sii hala nga takaa ma fatta.

12 Nda boro šerrantey duu fondo, beeray beeri no,

nda boro laaley tun, borey ga tugu.

13 Boro kaŋ ga nga hooyaney tugu si koy jine,

boro kaŋ yadda i ga, a nʼi naŋ, ga duu hinnari.

14 Boraa duu gomni kaŋ waati kul a ga hunbur Irkoy,

amma boro kaŋ ga nga binoo šendandi ga kaŋ bone ra.

15 Ganjihayla kaŋ ga booro wala urs kaŋ ga baa ka sar,

takaa din da ti boro futu kaŋ ga jama talka laama.

16 Boŋkoyni kaŋ sii nda lakkal mma kate laazaaba boobo borey ga,

boro kaŋ si yadda alman futu ga, ga nga aloomuroo kukandi.

17 Boro kaŋ ga kuri alhaku goo

ga zuru hala saaraa guusoo ra, i masʼa dii.

18 Boro kaŋ ga dira fondo laadirante ra ga hallasi,

boro kaŋ ga hanga fondo šiira hinka, ga kaŋ affoo ra.

19 Boro kaŋ ga nga laboo beeri ga kungu ŋaayan ra,

boro kaŋ ga hanga haya yaadayaŋ, ga kungu talkataray ra.

20 Boro kaŋ ga laadir ga duu albarka boobo,

boro kaŋ cahã ka tee alman si tee boro kaŋ mana haya kul tee.

21 Ka borey daŋ cere jine si boori,

ŋaayan dunba se boro ga yadda ka goy futu tee.

22 Boro kaŋ ga boonay nga ma cahã ka duu alman

si bay kaŋ jaŋay ga kaŋ nga ga.

23 Boro kaŋ ga boro daŋ fondaa ra

baa boro kaŋ ga deene kaanay boro se.

24 Boro kaŋ na nga baaba wala nga ɲaa kabey koonandi

de a ga nee: «Manʼti goy futu no»,

boraa nda kayrakaw kul ti affoo.

25 Boro kaŋ si wasa haya ra ga yenje tunandi,

amma boro kaŋ na nga naanaa daŋ Abadantaa ra ga huna daame ra.

26 Boro kaŋ na nga naanaa daŋ nga boŋ ra manʼti kala lakkal jaŋante,

amma boro kaŋ ga dira nda lakkal ga hallasi.

27 Boro kaŋ ga talkey noo, haya kul sʼa kuma,

amma boro kaŋ ga nga moɲey daabu i ga, ga duu laaliyan beeri.

28 Nda boro laaley tun, borey kul ga tugu,

nda i dere, boro šerrantey ga boobo.