30
Agur šenney
1 Woo manʼti kala Yake izʼaroo Agur šenni cere-ceranteyaŋ.*30.1 Woo manʼti kala Yake izʼaroo Agur šenni cere-ceranteyaŋ, Ebere šenni ra, almaganaa faa ti Woo manʼti kala Masa boraa Yake izʼaroo Agur šenniyaŋ.
Aroo woo ga šenniyaŋ har Itiyel se, Itiyel nda Ukal se ka nee:
2 «Cimi no, ay ga saama ka bisa borey kul,
ay sii nda adamize lakkal.
3 Ay mana duu lakkal,
ay sii nda henanantey bayraa.
4 May ka žigi beenaa ra? May ka zunbu kate?
May ka hewoo dii nga kabe gundoo ra?
May ka hari haw nga darbaa ra?
May ka laboo kanjey kul gorandi?
Macin ti nga maaɲoo, macin ti nga izʼaroo maaɲoo?
Nʼgʼa bay wala?
5 Irkoy šenney kul ga henan,
koray no borey se kaŋ ga ngi boŋ talfi a ga.
6 Masi haya kul tonton nga šenney ga,
a masi koy citi ni ga, ma tee taariharkaw.
7 Ay ga haya hinka wiri ni ga,
masʼi wanji ya ne hala ay ga buu:
8 Ay moorandi zanba nda taari šenni,
masʼay tee talka, masʼay tee almankoyni,
ay noo de ay meehunaa,
9 ya si koy kungu ka ni yankar
ka nee: ‹May ti Abadantaa?›
Wala ya talka ka koy zay
kʼay Koyoo maaɲoo hasara.
10 Masi tam ciinay nga koyoo do,
a masi koy ni danga, masi koy zukandi.
11 Zaman foo alwaddayaŋ goo no kaŋ ga ngi baaba danga,
de i si gaara ngi ɲaa se.
12 Zaman foo alwaddayaŋ goo no kaŋ ga hongu ngi ga henan,
ka gar i mana ɲumay ka hun ngi žiiboo ra.
13 Zaman foo alwaddayaŋ goo no kaŋ ga ngi boŋ jer,
i ga boro kul guna yaada.
14 Zaman foo alwaddayaŋ goo no kaŋ hiɲey manʼti kala takubayaŋ,
warkandey manʼti kala huryawyaŋ
kaŋ ga wiiya ka talkey derandi ka hun laboo ga,
ka alfukaarey kaa borey ra.»
15 Ndolli goo nda ize woy hinka,
maaɲey ti: «Ay noo! Ay noo!»
Haya hinza goo no kaŋ si kungu,
itaaci goo no kaŋ abada i si nee: «A wasa.»
16 Alaahara, nda woy gun,
nda labu kaŋ si kungu hari,
nda nuune kaŋ waati kul a si nee: «A wasa.»
17 Boro kaŋ ga nga baaba kašikaši,
de a ga nga ɲaa šenney yala,
gooroo gaaru-gaarey ga moɲey looti,
dutal-izey gʼa ŋaa.
18 Haya hinza goo no kaŋ gʼay boŋoo haw, i gʼay kayfandi,
itaaci kaŋ ay si ngi takaa bay:
19 Dutal bisadogoo beenaa ra,
gondi bisadogoo tondi ga,
harihii bisadogoo teekoo gamoo ra,
nda aru bisadogoo ka koy woy soogo do.
20 Takaa woo ti woy zinateeri takaa:
a ga ŋaa, a ga nga miɲoo tuusu jina
a ma nee: «Ay mana haya laala kul tee!»
21 Haya hinza maaganda se laboo ga jijiri,
haya taaci goo no kaŋ a si hin kʼi muɲe:
22 baɲɲa kaŋ tee kokoy,
saama kaŋ kungu ŋaayan,
23 woy attabiya futu kaŋ hiiji,
nda koŋŋa kaŋ na nga koy woyoo tubu.
24 Haya taaci goo laboo ga kaŋ ga kacca,
amma i goo nda lakkal beeri:
25 ntandawey, i manʼti kala dumi kaŋ sii nda gaabi,
i ga ngi meehunaa soolu kʼa jisi kaydiyaa waati.
26 Tondoo-ntabawey, i manʼti kala dumi kaŋ sii nda gaabi,
amma i si ngi hugey tee kala tondey ra.
27 Ndoowey, i sii nda kokoy,
amma i si fatta kala kur-kur.
28 Ncita, boro ga hin kʼa dii nda kabe,
amma a goo kokoyey hugey ra.
29 Ihinza goo no kaŋ goo nda zankamyan henna,
itaaci goo no kaŋ goo nda dira taka henna:
30 ganjihayla kaŋ goo nda gaabi ka bisa ganjihooga kul,
a si zuru haya kul jine,
31 gorgo-aru kaŋ ga kay nga cewey ga, wala jindaaru,
nda kokoy kaŋ ga huru nga wongu-izey jine.
32 Nda ni hanse ka saama ka ni boŋ zanzaŋ,
ni miile, ni kaboo daŋ ni miɲoo ga,
33 zama nda boro na waa kankam, barkura ga fatta a ra,
nda nʼna niine kankam, kuri ga fatta a ra,
nda nʼna futay kankam, yenje ga fatta a ra.
*30:1 30.1 Woo manʼti kala Yake izʼaroo Agur šenni cere-ceranteyaŋ, Ebere šenni ra, almaganaa faa ti Woo manʼti kala Masa boraa Yake izʼaroo Agur šenniyaŋ.