1 Macin se gandawey ga zawaare?

Macin se jamawey ga miile yaadayaŋ tee?

2 Laboo kokoyey ga soolu wongu se.

Boŋkoyney ga cere marga ka tee affoo

Abadantaa ga nda nga suubantaa kaŋ yonandi ga.

3 I ga nee: «Ir ma ngi šešerey dunbu kʼi kaa ir ga,

ir ma ngi karfey kaa ir ga.»

4 Boraa kaŋ ga goro beenaa ra ga haaru,

Abadantaa gʼi fude.

5 A ga šelaŋ i se nda futay,

nga futuroo ra a gʼi jijirandi, a ga nee i se:

6 «Agay hunday no kʼay kokoyoo

gorandi Siyoŋ tondi hondu henanantaa ga.»

7 Ay ga Abadantaa yaamaroo har,

a nee ya ne: «Ay izʼaroo ti ni,

agay ka ni hay hõ.

8 Gandawey wiri ay ga, ay gʼi noo ma ne sanda tubuhaya,

ay ga ni noo nongey kul hala laboo kaydogoo ga, i ma tee ni mayraa.

9 Nʼgʼi tutubu nda guuru gobu.

Nʼgʼi kayri sanda labu kusu.»

10 Sohõ, kokoyey, wa duu lakkal!

Aduɲɲa ciitikey, wa yadda hoyray!

11 Wa goy Abadantaa se nda hunburay,

wa ɲaali ka jijiri!

12 Wa nga izʼaroo summu,

a masi koy futu war ga,

war masi dere fondaa ra.

Zama nga futuroo ga cahã sanda nuune.

Borey duu gomni kaŋ ga ngi boŋ talfi a ga.