4
Irkoy ga alaafiya noo
1 Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Dawda zabur foo.
2 Waati kaŋ ay kaati ni ga, Irkoy, ay zaabi,
ni kaŋ gʼay noo cimi.
Ay kankamroo ra nʼnʼay feeri.
Hinna ya ne, haŋajer ay ŋaarayroo se!
3 Adamizey, war kaŋ gʼay daržaa bere kʼa tee haawi,
hala waati foo no war ga fay nda woo?
Hala waati foo no war ga fay nda haya yaada?
Hala waati foo no war ga fay nda taari haryan?
Kay-kayna
4 War ma bay kaŋ boro kaŋ ga laadir Abadantaa here,
nga no a gʼa daŋ jere ga nga boŋ se,
waati kaŋ ay kaati, Abadantaa ga haŋajer ya ne.
5 Nda war futu, war masi zunubu tee,
war daaroo ga, war ma kani ka miile,
amma war ma dangay.
Kay-kayna
6 Wa sargari kaa kaŋ ga hima,
war ma war naanaa daŋ Abadantaa ra.
7 Boro boobo ga nee: «May no mʼir daŋ gomni ra?
Abadantaa, ni ndumoo gaayoo daŋ ir ga!»
8 Nʼna ɲaali daŋ ay binoo ra
ka bisa waatoo kaŋ i goo ngi alkama boobaa
nda ngi alaneb hari boobaa game.
9 Nda ay kani, dogoo din da ay ga jirbi nda baani,
zama ni hinne, Abadantaa no mʼay gorandi alaafiya ra.