Boraa duu gomni kaŋ goy futawey yaafandi,

de nga zunubey tuusandi.

2 Boraa duu gomni kaŋ Abadantaa si nga laybey kabu a se,

de mo zanbayan sii lakkaloo ra.

3 Kullihinne ay ga dangay ay zunubey ga,

ay birey gʼay tutubu, ay ga taabi zaaroo kul,

4 zama cijin nda zaari ni kaboo tiŋaa goo ay ga,

ay gaaboo bere ka tee konni waati kogay.

5 Woo maaganda se ay yadda ay zunuboo ga kʼa cebe ma ne,

ay manʼay layboo tugu,

ay nee: «Ay gʼay hooyaney har kaaray Abadantaa se.»

Ni, nʼnʼay layboo yaafa, ay zunuboo yaafandi.

6 Yala ni ganakey kul ma ni ŋaaray waati kaŋ nʼga duwandi ra!

Waati kaŋ hari beerey na nongoo kul dii, haroo si too i do.

7 Ni ti nongoo kaŋ ra ay ga tugu, nʼgʼay kaa šiitayan ra,

ni hallasiroo kaatiyanoo gʼay kuubi kʼay bere.

8 Ni nee: «Ay ga ni cawandi,

ay ga fondaa har ma ne kaŋ nʼga hima kʼa zaa,

ay ga ni hoyray, ay moɲey goo ni ga.

9 War masi tee sanda bari wala lanbaana kaŋ sii nda lakkal,

i ga aljam nda kasiji daŋ i ga kʼi gooji,

hala i masi duu ka man ni.»

10 Dooray boobo goo boro laala se,

boro kaŋ na nga naanaa daŋ Abadantaa ra,

Abadantaa borohennataraa gʼa kuubi kʼa bere.

11 Boro šerrantey, wa ɲaali nda Abadantaa, wa yafarhã!

Wa ɲaali kaatiyaŋ tee, war kul kaŋ biney ga šerre!