34
Abadantaa nʼay feeri
1 Woo ti Dawda zabur foo. A manʼa fay kala waatoo kaŋ a na nga boŋ tee hollokom Abimelek*34.1 Filisti borey kokoyoo woo da se i ga nee Akiš Samiyel 1na 21.11–16ra. se, Abimelek nʼa gaaray, a koy.
2 Ay ga albarka tee Abadantaa se waati kul,
nga saaburoo si fay nda ka hun ay miɲoo ra.
3 Abadantaa ti ay foomahayaa,
borey kaŋ ga taabi ma maa, i ma ɲaali!
4 Wa Abadantaa beerandi ay bande,
ir ma maaɲoo jer cere bande!
5 Ay na Abadantaa ceeci, a tuuru ya ne,
a nʼay kaa hunburawey ra.
6 Borey kaŋ moɲey goo a ga ndumey ga dii garaw,
ndumey si kukuši.
7 Nda boro kaŋ ga taabi na Abadantaa cee, a ga haŋajer a se,
a gʼa hallasi nga gurzugawey kul ra.
8 Abadantaa almalaykaa ga nga kaloo sinji
borey kaŋ ga hunbur Irkoy kuubi-ka-beraa ra kʼi lakkal,
a gʼi feeri.
9 Wa taba ka dii takaa kaŋ nda Abadantaa ga boori!
Boraa duu gomni kaŋ ga nga boŋ talfi a ga.
10 Wa hunbur Abadantaa, war, nga boro henanantey!
Zama borey kaŋ ga hunbur a, haya kul sʼi kuma.
11 Ganjihayla soogey ga hin ka jaŋay ka heray,
amma borey kaŋ ga Abadantaa ceeci, haya henna kul jaŋay sii i ga.
12 Wa kaa, ay izey, wa haŋajer ya ne!
Ay ga war dendenandi Abadantaa hunburaa.
13 May ti boraa kaŋ ga baa hunayan?
May no ma baa zaari hennayaŋ?
14 Boraa ma hin nga miɲoo,
taari masi hun deenoo ga.
15 Ma mooru ifutu ka ihenna tee,
ma alaafiya ceeci ka gaabandi a bande.
16 Abadantaa moɲey sii kala boro šerrantey ga,
a ga haŋajer ngi faaba ceeci kaatiroo se.
17 Abadantaa ndumoo ga bere ka borey kaŋ ga goy futu tee gandu,
kʼi kaa laboo ga hala boro masi yee koyne ka hongu ey.
18 Boro šerrantey ga kaati ka Abadantaa cee,
a gʼi hallasi ngi gurzugawey kul ra.
19 Abadantaa ga man borey kaŋ biney maray,
a ga borey hallasi kaŋ biney hun.
20 Haya futu boobo ga duu boro šerrante,
amma Abadantaa gʼa kaa i kul ra.
21 A ga nga birey kul lakkal,
ba affoo si kayri i ra.
22 Ifutu ga boro futu wii,
borey kaŋ ga konna boro šerrantey ga zukandi.
23 Abadantaa ga nga tamey hundey hallasi,
borey kaŋ ga ngi boŋ talfi a ga si zukandi.