88
Boro kaŋ goo buuyan mee ga Irkoy ŋaarayroo
1 Dooni. Woo ti Kora izey zabur foo. Donkey boŋkoynoo ka woo don. Dooni kaŋ bande laati goo. Woo ti Hemaŋ, Ezra boraa bayti dooni foo.
2 Abadantaa, ay Hallasikaa Irkoy,
ay ga kaati cijin nda zaari ka kay ni jine ka ni cee.
3 Yala ay ŋaarayroo ma too ni do,
ni haŋaa gaaru ay kaatoo se,
4 zama ay hundoo kungu nda zarabiyaŋ,
de ay hunayanoo goo alaahara miɲoo ga.
5 I gʼay kabu borey ra kaŋ ga zunbu saaraa guusoo ra,
ay ga hima nda adamize kaŋ gaaboo ben.
6 Agay ne ka daaru bukawey game,
sanda boro kaŋ wiiyandi de a goo ma kani saaray ra,
ka hima nda borey kaŋ nʼsi hongu ey,
de ni nda ey dunbu.
7 Nʼnʼay warra guusu futaa ra kaŋ sii nda kaydoo,
nongu kubayantey nda guusu beerey ra.
8 Ni futuroo gum ay ga,
nʼgʼay taabandi nda ni bondawey.
Kay-kayna
9 Nʼna borey kaŋ ay gʼi bay moorandi agay,
nʼnʼay tee i se almuhal.
Ay daabandi, ay si hin ka fatta.
10 Zaraboo nʼay moɲoo taabandi,
ay ga ni cee zaari kul, Abadantaa,
Ay gʼay kabey šerre ni here.
11 Bukawey se nʼga kayfi tee wala?
Borey kaŋ buu ga tun ka ni saabu wala?
Kay-kayna
12 I ga ni borohennataraa har saaraa ra wala?
I ga ni laadirtaraa deede guusu futaa ra wala?
13 Kubaa ra ni kayfey ga bayrandi wala?
Dirɲeray gandaa ra ni šerretaraa ga harandi wala?
14 Agay kay, ni, Abadantaa ga, ay ga kaati ka faaba ceeci,
subbaahi, ay ŋaarayroo ga too ni jine.
15 Abadantaa, macin se ni wanji ay ga,
ka ni ndumoo bere ya ne?
16 Ay ga taabi, ay goo buuyan mee ga za ay zankataraa ga,
ay fara nda hunburay nda binehunay.
17 Ni futuroo konnoo gum ay ga,
ni hunburawey nʼay halaci.
18 I gʼay kuubi kʼay bere sanda hariyaŋ zaaroo kul,
cere bande i gʼay daabu.
19 Nʼnʼay cerey nda ay hangasiney moorandi agay,
kubaa hinne ka tee ay ceroo.