106
Ba nda Izirayel borey si laadir, Irkoy ga laadir
(Sorro 1, 47–48: Taarikey 1na 16.34–36)
1 Aleluya!
Wa Abadantaa šifa, zama a ga boori,
zama nga borohennataraa si ben abada!
2 May no ma hin ka Abadantaa teegoy albarkantey deede,
ka nga saaburoo kul har?
3 Borey duu gomni kaŋ ga šerretaray dii,
kaŋyaŋ ga goy nda šerretaray waati kul!
4 Abadantaa, hongu agay
ni alhormaa ra ni jamaa se!
Ay faaba kʼay hallasi*106.4 Ay faaba kʼay hallasi, hantum fooyaŋ ga nee Ir faaba kʼir hallasi.,
5 hala ya dii borey kaŋ nʼnʼi suuba gomnoo,
ya yafarhã nda ni gandaa ɲaaloo,
ka fooma nda tuboo kaŋ ti ni wane!
6 Ir nda ir baabey duu zunubu,
ir na laybu tee, ir na goy futu tee.
7 Ir baabey mana lakkal daŋ ni teegoy kayfantey se Misira,
i mana hongu hayey kul kaŋ nʼnʼi tee ni borohennataraa ra,
i tee turante teekoo jere, Kakaarey teekoo do.
8 Amma a nʼi hallasi nga maaɲoo maaganda se,
hala nga ma nga hinoo cebe.
9 A zahã Kakaarey teekoo ga, a kogu,
a nʼi ka dira ka bisa nda hari guusey sanda saaji ra.
10 A nʼi hallasi kʼi kaa borey kaŋ ga konna ey kabey ra,
a nʼi hoobu kʼi kaa iberoo kaboo ra.
11 Haroo daaba ngi torrokey ga,
ba boro foo mana cindi i ra.
12 Woo ga, i naanay Irkoy šenney,
i don a se kʼa saabu.
13 Amma i cahã ka dirɲa nga teegoyey,
i mana batu ka dii woo kaŋ Irkoy ga baa ngi mʼa tee.
14 Saajoo ra, i na haya boobo boonay,
saaji biboo ra i na Irkoy sii.
15 A nʼi noo hayaa kaŋ i nʼa wiri,
woo banda ga, a na wirci laala kʼi kar.
16 Kaloo ra i canse Musa ga
nda Haruna ga kaŋ ti Abadantaa boro henanantaa.
17 Laboo feeri ka Dataŋ gon,
a na Abiram jamaa daabu.
18 Nuune na ngi jamaa ton,
nuune deene na boro futawey ton.
19 I na yagaw foo tee Horeb tondi hondoo ra,
i na guuru mennandi kʼa tee tooru ka sujudu a se.
20 I na ngi daržaa kaŋ ti Irkoy barmay
nda haw kaŋ ga subu ŋaa biyoo.
21 I dirɲa Irkoy, ngi Hallasikaa
kaŋ na haya beeriyaŋ tee Misira,
22 ka teegoy kayfanteyaŋ tee Šam gandaa ra,
nda teegoy hunburanteyaŋ Kakaarey teekoo jere.
23 A nee kaŋ nga gʼi halaci,
nda manʼti Musa kaŋ ti boraa kaŋ a nʼa suuba
kaŋ huru nga nda ey game
ka nga futuroo kaa ka halaciroo ganji.
24 I wanji ganda hennaa ga,
i mana naanay nga šennoo.
25 I ŋuunuŋuunu ngi hukkumey cire,
i mana haŋajer Abadantaa šennoo se.
26 A na nga kaboo zinji-zinji i ga
kʼi kaŋandi saajoo ra,
27 ka ngi hayroo kaŋandi dumey ra,
kʼi say gandawey kul ra.
28 I na Bal kaŋ ti Pewor koyoo gana
i na sargarey ŋaa kaŋ i nʼi kaa bukawey se.
29 I nʼa futandi nda ngi goyey,
bone kaŋ i boŋ.
30 Pinehas tun, a na misoo hanse,
bonaa ben.
31 Goyoo kabandi a se šerretaray,
zaman ka kaa zaman hala abada.
32 I na Irkoy futandi Meriba haroo jeroo ga,
ngi sabbu se woo kate Musa ga ifutu:
33 i ture nga hundoo ga,
woo ka kate a ma šenniyaŋ har kaŋ si harandi.
34 I mana jamawey halaci
kaŋ Abadantaa nʼi har i se.
35 I birji gandawey ra,
i na gandawey teegoyey denden.
36 I na gandawey toorey gana,
toorey tee i se kumsay.
37 I na ngi izʼarey nda ngi ize woyey
kaa sargari ziney se.
38 I na borey kaŋ ga taali sii kurey mun,
ngi izʼarey nda ngi ize woyey kurey
kaŋ i nʼi kaa sargari Kanaŋ gandaa toorey se.
Ngi kuri munyanoo na gandaa žiibandi.
39 I na ngi teegoyey ka ngi boŋ žiibandi,
i na izefututaray†106.39 Manʼti gaaham here no, laadir jaŋay no Irkoy here. tee ngi goyey maaganda.
40 Abadantaa futu nga jamaa ga,
a konna nga tuboo.
41 A nʼi kaŋandi gandawey kabey ra,
borey kaŋ ga konna ey hinoo goo i boŋ.
42 Ngi iberey nʼi torro,
i dii kaynandiyan kabey ra.
43 Cee boobo Abadantaa gʼi feeri,
amma i si hongu kala tureyan,
i tibi ngi laybey ra.
44 A dii ngi binemaraa
waatoo kaŋ a maa ngi wurroo.
45 Ngi sabbu se a hongu nga amaanaa,
a ga hanse ka boori hala nongu kaŋ ra
a tun woo kaŋ a nʼa kayandi ga.
46 A na ngi tamallaa daŋ
borey kul biney ra kaŋ koy nda ey tamtaraa ra.
47 Abadantaa, ir Koyoo, ir hallasi!
Ir marga ka hun gandawey kabey ra
hala ir ma duu ka ni maa henanantaa saabu,
ka fooma nda ni saabuyanoo.
48 Albarka ma bara Abadantaa, Izirayel Koyoo se,
za abada hala abada!
Jamaa kul ma nee: «Amin! Aleluya!»