1 Aleluya!

Ay ga Abadantaa šifa nda ay binoo kul,

boro šerrantey nda jamaa margaroo ra.

2 Abadantaa teegoyey ga beeri,

borey kaŋ se i ga kan gʼi ceeci.

3 Nga teegoyoo ga nga daržaa nda nga annuuraa cebe,

nga šerretaraa ga cindi abada.

4 A na taka tee borey ma hongu nga kayfey,

Abadantaa ga alhormo tee, a ga tamalla.

5 A na ŋaayan noo borey se kaŋ ga hunbur a,

a ga hongu nga amaanaa hala abada.

6 A na nga teegoyey ka nga hinoo cebe nga jamaa se,

kʼi noo gandawey sanda tubu.

7 Nga kabe teegoyey ga laadir i ga šerre.

Naanay goo hayey kul ga kaŋ a nʼi har,

8 waati kul, abada i si tun,

i teendi nda laadirtaray nda šerretaray.

9 A na nga jamaa feeri,

a na nga amaanaa gorandi hala abada.

Nga maaɲoo ga henan, a ga hunburandi.

10 Ka hunbur Abadantaa ti lakkal šintinoo,

boro kaŋ ga nga yaamarey dii ga duu lakkal henna.

Nga saaburoo ga bara hala abada.