Ay ga ni maaɲoo jer, ay Koyoo, ni kaŋ ti kokoyoo.

Ay ga albarka daŋ ni maaɲoo se waati kul hala abada.

2 Zaari kul ay ga albarka daŋ ma ne,

ay ga ni maaɲoo saabu waati kul hala abada.

3 Abadantaa ga beeri, a ga hima nda saabuyan dumi kul,

nga beeriyanoo sii nda kaydoo.

4 Zaman ka kaa zaman i ga ni teegoyey saabu,

i ga ni teegoy albarkantey deede,

5 ka ni daržaa annuurante beeroo har.

Ay ga miile ni teegoy kayfantey ga.

6 I ga ni gaabi hunburantaa har,

ay ga ni gomni beerey deede.

7 I ga honga ni laadirtaray beeroo kʼa fee,

i ga kaati nda ɲaali ka ni šerretaraa har.

8 Abadantaa ga hinna, a ga tamalla,

a si cahã ka futu, nga borohennataraa ga beeri.

9 Abadantaa ga boori boro kul se,

nga tamallaa goo nga kabe goyey kul ga.

10 Abadantaa, ni teegoyey kul ga ni saabu,

ni ganakey ga albarka tee ma ne.

11 I ga ni laamaa daržaa har,

i ga ni gaaboo har,

12 ka ni teegoy beerey har adamizey se

nda ni laamaa daržante hennaa.

13 Ni laamaa manʼti kala laama duumante,

ni hinoo goo zamaney kul boŋ.

14 Abadantaa ga borey kul faaba kaŋ ga kaŋ,

a ga borey kul kaŋ golbi kayandi.

15 Naata ra, borey kul moɲey ga bere ni here,

ni no mʼi noo ngi ŋaahayaa nga waatoo ra.

16 Nʼga ni kaboo feeri

ka baahunantey kul kungandi nda woo kaŋ ga kan i se.

17 Abadantaa ga šerre nga fondawey kul ra,

a ga laadir nga teegoyey kul ra.

18 Abadantaa ga man borey kul kaŋ gʼa cee,

nda borey kul kaŋ gʼa cee nda cimi.

19 A ga borey kaŋ ga hunbur a almuraadey feeri,

a ga maa ngi faaba ceeci kaatiroo, a gʼi hallasi.

20 Abadantaa ga borey kul hawgay kaŋ ga bagʼa,

a ga boro laaley halaci.

21 Yala ay miɲoo ma Abadantaa saaburoo har.

Yala waati kul hala abada hundikoyni kul

ma albarka daŋ nga maa henanantaa se!