149
Abadantaa jamaa ga kan a se
Aleluya!
 
Wa dooni taaga don Abadantaa se!
Wa nga saaburoo don nga ganakey jamaa ra!
Yala Izirayel ma ɲaali nda nga Takakaa!
Yala Siyoŋ koyraa izey
ma yafarhã nda ngi kokoyoo!
I ma maaɲoo saabu nda gaaniyaŋ,
i ma dunduŋ nda kuntiji hẽenandi a se!
Zama Abadantaa jamaa ga kan a se,
a ga hallasiroo tee taalam borey se kaŋ ga taabi.
 
Yala nga ganakey ma ɲaali darža ra,
i ma kaati nda ɲaali ngi kanidogey ra.
Yala Abadantaa saaburoo ma bara miɲey ra,
de mo takuba mee hinkakoyni kaana ma bara kabey ra,
ka ngi boŋ faasa gandawey ra,
ka jamawey noo ngi zukandoo,
ka ngi kokoyey haw nda gaala,
ka ngi boro kayantey tefer nda guuru,
ka ciitoo tee i ga kaŋ hantumandi!
Beeray beeri no Irkoy ganakey kul se.
 
Aleluya!