YESUSLE ABU AKO NAEI AHUBA
1
1-2 Onomi foka Teofilus, reyae ((Lukas)) na bere ware homofae mbaise moloukokale ikawale kiyae. Nebei einye Yesus Na me u meke mokowole bele Na a faeu meke kelewoumi bele huba raweubokera meke Allah yae surgare raneuweke iwole yane nemene yakaukokawale. Namman surgare ei yae, Na abu ako eleukoke yo na me u mokonayende naei a usaei wasaei Allahle Roh walora keleumikoke baeufoke. 3 Neyae na hele waleubokere kelemmibondere, hereke heera ya rorele u bee Na abu akore roko yae roko yae Nauwa yakaumikoke. Nebei mon mae Naei me kelee u keleene orulenaibonde nekenate ro miyae holona naei are Yesus kelewoumi. 4 Ya mbai nangkele ramanne anewate mo, Yesus nda a ukeumi, “Yerusalem yora kulun ewei ei. Nebeibe Allah are heteungekoke ((Roh)) inyembere mayae rakembe, nebei Roh mbai Reyae bere ukamale. 5 Bere Yohanes mare bu yae kongkokembe, nekemakonde ya heki ban mo, Allah mare Naei Roh yae konengkombe.”
Yesus Yo Bumare Raneuweke Iwole
6 Yesus Na abu ako bele nanembainye arileufike nekate mo, Nare hinainye, “Tuhan, nda hee yae Weyae Israel naei yo waku benen aungenundere?”
7 Nebeibe Yesus yae weumi, “Nebei Maekole isaei ya, mayae isaeyeiboi sului. Nebei ya bele hu bele Maeko Nenaeijae Nelae wake hului yae merau raungehike.” 8 Nebeibe Allahle Roh mai uwane anembombe hee mayae nemene elae rowembe. Mayae Raei mekai ma nekale naei are yakammiyembe Yerusalem yora, Yudea kani nemene, nane merau Samaria kanira embe nda kani kela na hubane haeinye ennehalengkombe. 9 Nebei ara weumikoke baeufoke mo, Na abu ako naei bene Yesus raneuweke iwolene, kanewainye mo, mangko yae meumiaheukoke.
10 Yesus kaeiboke yelene namman kanewainye bele, ro bee na malo keleumon mae hireikoke na abu ako bokone meijakaiboke. 11 Hokolo bee yae weimi, “Ae, Galilea kanina ro miyae, rahene nebeinye hebaube mai ijoko yakure mo kanaube? Nane Yesus mbai mayae ijokore eraunge surgare mai nolora raneuweke ele wanen mbai Neyae benen bukensinde mende.”
Matius Yudasle Anuwaufe Mokondere Roukate
12 Nebeisa nane yo Zaitun mokora baeiboke Yerusalem yore ewate. Nebei moko na ahau honole Yerusalemda noro bele eyewate. 13 Yerusalemde okate mo, nekewate imae bumana yowane yaeikiteke. Nebeinye arileufike ro nda niyae: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus Alfeusle kelu, Simon (Zelot yae kaenainye kiyae), Yudas Yakobusle fa kayee. 14 Miyae maengke na hiwa yo bele Maria Yesus nenake nane merau Yesus naubake wa bele nemene Allahre ebelire bonainyelere nanembainye arileisiyele bainye.
15 Ya mbai mewarileufike nekewate mo, (ro miyae Yesusre hila rabo halewainye yo rorele u mehine mbai bele (120) hului) Petrus are elendere aunguke, 16 weumi, “Aka naei baeke naei, Allahle homofaena molowate a na bangka mo na hului benate hele. Na berei Allahle Roh yae Daudle euwara Yudas yae bene nembonde Yesusre ikilenaibonde naeise a raufike. 17 Yudas aei holo mbainye orowande, neyae aengkele mbainye kaliare mokowande.”
18 Nda Yudas kelaise neuboke roi yae kani mbai rouke. Nebei anuwaunge bumara ruke hereke, na yarele kayeukoke, na kabiya nemene maibaleke. 19 Yerusalem yona ro miyae nemene nebei a naeisaei bangka mone, naei afaeu wae nebei anuwau ro bainyehoke, “Akeldama” na mekai “Ha Kani.”
20 Petrus yae weumi, “Mazmur homofaene nda a moloukoke,
‘Ninae lon, naei nekele anuwau aku ban nau ban yeubo.
Hi yae ha yae nebei anuwaunge enekeijae.’*1:20a Mazmur 69:25
“Nane merau nda a hi moloukoke,
‘Ninae lon naei angken nuwei hi yae yennuwembonde.’†1:20b Mazmur 109:8
21-22 “Nebeinye ro mbai roumale aengkele mbainye Yesus herekera waleuboke naei are humamiyendere. Nebei ro Yohanes bure kowoumi heera meke Yesus aei nolora raneuweke iwole heene, makeise-makeise Yesus orowekene aengkele homo mbainye hakoumeboke orandeke.”
23 Nebeinye arilewole yo nolora ro bee yaraikoke. Ro hi ro na ro Yusuf nane merau Barsabas yae weyainye (Yustus yae kaeneyainye), na hi ro Matias. 24-25 Nebeisa Allahre nda ebeli bainyehike, “Tuhan, ro naei miyae naei kena u ei Weyae waeisaei bangka mo. Waei abu ako mande homora Yudas naei angken nuwei nukeuboke eufereke. Nebeinye Ware bayete, Yudas na u mekai beko mokouboke huluinye ennekende anuwaufe eke a bulure mokondere nda ro bee yarandekokera ro hi eleuboke kiyae maere keleimebo.” 26 Nebeisa hokolo bee naei ro oye nihaeiboke Matiaslene ruke. Nebeinye Matiasre roukate Yesusle abu akore me bee oro nen mbai belere hakoumiboke.