IBRANI
1
Allah Na Kelule Walora Huwele
1 Bena heena roko helen Allah Naei yenjo kayaayo walora a faeu mekai mahi-mahi yae eyae Yahudi ro miyae aei yobe naei kamahe naeise Allah uwoumi. 2 Nebeibe nda hee huba mokoikoi yane, Allah Na Kelule walora aere a ukeume. Na Kelule naeise Allah a hokoukoke Na me einya honate rambun yoni-yoni Naei me einye enaisononde Kiyae, nane merau Naei walora Allah nda kani kela bele kun wau bele mokouboke Kiyae. 3 Naei Kelu Allahle nene waewae mbai nane merau Allahle u mekai bele nekele. Rambun nemene fomene Na Kelu elae bele wake bele a elele yae hara nekeunge. Neyae Ro miyae naei beko bako faeinyemmibonde naei nibi mokoubokera Allah surgana nene waewae bele Kiyae Na meube reufine eunguweuboke. 4 Nebeinye Allah yae Naei Kelu yae roungebokene, malaikat yoni-yoni yae ehameikoi sului. 5 Rabuhine ban roko mbai Allah yae malaikat mbaise nda a wanen mae ewei mo,
“Weyae Raei Kelu.
Mana ya yae Reyae waei Ako helere yeubokale.”*1:5a Mazmur 2:7
Nane merau malaikatle naeise nda mekai yae a eleikoi,
“Reyae naei Akore ereyembonde,
Neyae Raei Kelure enjembonde.Ӡ1:5b 2 Semuel 7:14
6 Nane merau Allah Na Kelu Hina Fa Hoi Fa nda kani kelare yakaumiboke hee, Allah nda mekai yae eleukoke,
“Allahle malaikat nemene Nare ei molonainyele hele.”‡1:6 Ulangan 32:43
7 Malaikat yoni-yoni naei a nda mekai yae Allah eleukoke,
“Naei kaliare mokate malaikat yoni-yonire mokommile
alu baei yo bele i faeu belere inyaibonde.Ӥ1:7 Mazmur 104:4
8 Nebeibe Allah Na Hina Fa Hoi Fa Naei a nda mekai yae eleukoke:
“Allah,
Waei kendan wameran huba ban haei ban hononende,
na ijen mae ro miyaere me eumimokonde.
9 Weyae u mekai na ijende harayainye yore
buhae heimeyamae
nane merau me beko u bekore mokate yore
ikele yae koimeyamae.
Nebei aerene minyak*1:9a Ro mbai ondofolo ranenaijendere Yahudi ro miyae nebei ro naei yunde minyak rilewate. Oro umau heraukoyainye Buyaka era hena na mekai mbai. Waei yun ranne rileuboke yae
Allah Waei kahili wafeu nekatera Ware anuwau bumane raneujekete
nane merau rei mai sele mokowote.Ӡ1:9b Mazmur 45:6-7
10 Nane merau Allah a eleukoke,
“Weyae Tuhan na beme fomere nda kani kela bele yaku bele
Waei me yae u yae mokoubokae.
11 Nebei yoni-yoni mokowoyae
nanemene malo male wanen menayembonde beko benate,
nebeibe Weyae Tuhan mahire eyeiboi nekewende.
12 Nda kani kelana malo male wanen mae Weyae oleungekonde,
neme beungehonde hononende.
Nebeibe Weyae mahire eyeiboi
nane merau Waei ralo yakama huba ban haei ban.”‡1:12 Mazmur 102:25-27
13 Malaikat mbaise Allah yae nda wanen mae eleikoi,
“Weyae Raei meube reufina ro bele anuwaunge meinyuweibo
mende Reyae Waei yokeijo yoni-yoni beko mokoremibonde
Waei oro hensen anuwau wanen mae enaijembonde.Ӥ1:13 Mazmur 110:1
14 Nebei malaikat Allahle kaliare mokate roh yoni-yoni, nane merau wali hena bona enaiyaronde yore eise haungaimile naeise Allah ukeumi.
*1:5 1:5a Mazmur 2:7
†1:5 1:5b 2 Semuel 7:14
‡1:6 1:6 Ulangan 32:43
§1:7 1:7 Mazmur 104:4
*1:9 1:9a Ro mbai ondofolo ranenaijendere Yahudi ro miyae nebei ro naei yunde minyak rilewate. Oro umau heraukoyainye Buyaka era hena na mekai mbai.
†1:9 1:9b Mazmur 45:6-7
‡1:12 1:12 Mazmur 102:25-27
§1:13 1:13 Mazmur 110:1