8
Allahle Roh Weume A Huluinye Nekande
Allah yae ro miyaere wali himalainyeboke yo yae me baemmile nibi neme Wali Ondofolo yae mokoubokene, nda hee Yesus Wali Ondofolo bele mbainye nekate ro miyaere Allah me onoyoi, rabuhine ban Wali Ondofolole walora Allahle Roh wali nemere ikeume Kiyae Naei elae yae aei bekore kena kandere haraime nane merau Allah bele wahemakonde elaera bulaereumeboke. 3-4 Ro miyae Musale walora wali heere foloukoke hakowainyele walora wali himalainyeboke ro miyaere inyaibondere na hului ban, rabuhine ban naei kena u elae banne, nebei wali heere foloukoke are hubara haeisa eyanekoi sului. Nebeinye ro miyae beko mokoimeyatene herende aerene Allah na hina fa hoi fa ro miyae u mekai beko mokatene male u yambi u ma yae ukeunge meke. Nebei nibi yae wali himalainyeboke yo yae me baemmile nibire mokouboke. Eyae bekore kena kandere haraime elaere ehakoiboi nebeibe Allahle Roh Naei a elelere hakannele ro miyae na hului wali himalainyeboke yo yae me baemmele naeise, aei beko mokoimeyande aerene Allah yae Yesusre me nokeunge, aere me onoyoi.
Ro miyae na bekore kena katere haraimi elaere hakoyate yo, nebei u mekai bekore mokonatere u bene mo nekeyaimi. Nebeibe Allahle Roh yae weumi are hakoyate yo, Allahle Roh yae kenare kole huluinye u bene nekeyaimi. Bekore kena katere haraimi elae huluinye u bene nekaimi ro miyae Allah bele wahenaikonde, nebeibe Allahle Roh huluinye u bene nekaimi ro miyae wali hena bona u mekai nane merau rei mai hubanainyende. U mekai beko naei u bene nekaimi ro miyae Allah naei yokeijo nekate, Allahlena wali heere foloukoke huluinye ehakoiboi nane merau ehakoiboi sului. Bekore kena katere haraimi elae huluinye wali nekate ro miyae Allahre kena foise omokoiboi sului.
Nebeibe mai kena u einye Allahle Roh na hele nekendena, mayae bekore kena kaube harayembe elae huluinye wali enekei, nebeibe Allahle Roh yae wembe huluinye wali nekembe. Nane merau Wali Ondofolo yae yeumi Roh kena u einye enekei ro miyae, Wali Ondofolole holona yo ban. 10 Yesus Wali Ondofolo mai uwa einye nekendena, u mekai beko mokaube aerene mai uwa herende, nebeibe Allah yae wali himalainyeboke yo yae mare me baembe aerene mai kena u einye wali hena bona u mekai hubaunge. 11 Nane merau Allahle Roh, Yesus Wali Ondofolore nulu yo mahe yora aungunuke Kiyae, mai kena u einye nekendena, nebei Roh yae mai uwa einye nekele here bele uwa kayeero benen wali neme inyembe.
12 Nebeinye aka naei baeke naei, aei baka rannare Allahle Roh weume huluinye nekemale, u mekai bekore kena kandere haraime elae huluinye ban. 13 Mayae bekore kena kaubere harayembe elae huluinye nekembena, mayae Allah bele wahengkombe. Nebeibe Allahle Roh wembe a huluinye nekembe bekore kena kaubere harayembe elaere ehakoyeinya, mayae wali hena bona bele nekembe. 14 Allahle Roh a weumi huluinye hakainye ro miyae nanemene Allahle kelu omi, 15 rabuhine ban yebaei bubaei naei roware fe waku kainye wanen Allahlena Roh mare ikembe, mayae Allahre benen fe waku konembere omokoiboi, nebeibe Allahle kelu omire mokombokembe. Nebei Roh elae yae eyae Allahre “Ako” yae kaenanne. 16 Allahle Roh yae aei kena ure nda a mbai faeu mbai yae elele, “Mayae Allahle kelu omi.” 17 Eyae nebei ma nekemalena, nane merau Allah naei kelu omire imabondena, Allah are hetewounge Na me einya honate rambun aere emmewahendere, Wali Ondofolo bele mbainye emayaronde. Nane merau Wali Ondofolo one hengko bele yae kiteungeboke wanen mae aere kitemmebonde naeise, eyae Naeinya hului beko hubamande hele.
18 Reyae hubanale nda heena beko hubannele bele wali one hengko aere emmekelembonde bele huluise erasi. 19 Allah yae nda kani kelana mokowole rambun yoni-yoni Naei kelu omi helere yakambonde naei yabe kena roweumihike rakeyate. 20 Rabuhine ban Allah nuleuboke rambun yoni-yoni na mekai yae foi mokonatere nebeibe omokoi sului ma nekate, naei kena kate huluinye ban, nebeibe Allah mehauwae mokouboke. Allah kenare kole nebei rambun yoni-yoni nda yembonde naeise rabo elae halenayende: 21 neyae kakare inyaibonde u mekaisa hole emmimolombonde nane merau Allahle kelu omi nangkele mbainye one hengko emmikitende.
22 Aeisaei sele miyae fa honondere hiyau kole kiyae nebei fa hononde naei u buhae kolene ele kali kole wanen nda hee bele yae Allah nda kani kelana mokowole yoni-yoni nemene ele kali kate. 23 Nebei yoni-yoni mo ban, nebeibe eyae Allahle Roh ikeume mende Naei kelu omi yae one hengko bele emmekitembonde yo. Aei uwa neme yemmebonde yare kena roweumihike rakeimeyande yae, kena ei u eisa ele-ele kali-kali kande. 24 Aere hole moloumeboke heera rabo elae halewanne Allah yae nebei rambunde mokongkonde. Nebeibe ijoko yae erekande rambunde rabo elaere omokoi sului. Naendae mekai yae ro miyae mbai naei me einya rambunde namman rabo halende? 25 Nebeibe eyae ijokore ereiboi rambunde emayaronde naeise rabo elae halemalene, aei kena u na hebaen-sebaen mae rakeimeyande.
26 Aei rabo elae halaende yae aere hakoiboyeume wanen mbai Allahle Roh yae aei kena u yambire hakoiboyeume. Allahre ebeli bomande a mekai aeisaei banne, ro miyae a eleikoi sului ma ele kali yae Allahle Roh Nenaeijae aei naeise Allahre ebeli boyeungele. 27 Nane merau ro miyae naei kena einyare isaeyeuboke Allah, Naei Roh yae haraungebokere Naeisaei, rabuhine ban Allah kenare kole huluinye Yesus Naei eleukoke wekeumi ro miyae aerene Allahle Roh aere oleyele.
28 Eyae isaeyaendeboke Allah meraufe raungehike huluinye kaeneumikoke nane merau Nare kena buhaere heyainye ro miyae naei foise, nemene fomene benate rambunde Allah nangkele yae hakouboke mokoimeyele. 29 Wali Ondofolore hakonainyele ro miyaere Allah na beme fomona ro roumiboke, nane merau a hokoukoke Na aka baeke u nolo u kainye Naei Hina Fa Hoi Fa na bena Kiyaere yembonde naeise, Nare hakonainyele ro miyae Na Hina Fa Hoi Fa u mekai wanende inyaibonde. 30 Na beme fomore Allah Na Hina Fa Hoi Fa u mekai wanen inyaibondere a hokoukoke holona ro miyaere kaeneumikoke. Nebei kaeneumikoke yo mbai Allah yae wali himalainyeboke yo yae me baeumiboke. Me baeumiboke yo mbai Allah yae one hengko bele kitemmibonde hele.
31 Nebeinye, Allah haraungeboke mokowole naeise rahe a ma yae na hului elemakonde? Naendae mekai, Allah aei holone uwa engwenendena, ro wende na hului ban aei hande me wenjende? 32 Allah Naei Kelu mbai ken sele eheraweiboi enekei nebeibe aei aerene kinyeumiboke lonbe. Nebei aerene Nangkele mbainye nekemale me u mokomale naei rambun yoni-yoni bele nane merau Naei Kelu bele yemmele hele. 33 Ro miyae mbai sambai Allah yae eleukoke wekeumi holona ro miyaere a ohoroiboi, rabuhine ban Allah Nenaei yae nebei holona ro miyaere wali himalainyeboke yo yae me baewoumine. 34 Ro miyae mbai sambai aere me onoyoi sului, rabuhine ban Yesus Wali Ondofolo, herekera benen nulu yo mahe yora aunguke Allahle kendan wameran meube reufine ekenekele Kiyae, aei aerene oleyele! 35 Ikele han mae, kena beko u beko yae, weitasi kaime yae, moni mai yae, hun ban wai ban mae, wali beko nolone yae, erahan mae, rambun mbai sambai yae Yesus Wali Ondofolole kena buhae u buhae heyeumera aere kayee omoloiboi sului. 36 Allahle homofaene Ondofolo Daud aei wali ma naeise Allah nda wanen moloukoke:
“Waei holona ro miyae yae baeime aerene
maei wali na yane baei here bele mbembane nekeyande,
maere folonaimikonde domba yoni-yoni wanen mae me baeyaime.”* 8:36 Mazmur 44:22
37 Nebeibe Yesus Wali Ondofolo aere kena buhaere heumekoke Kiyaele walora nebei u mekai wa mekai beko yoni-yonira eyae andemeleufake. 38-39 Reyae na hele yae hubanale, Tuhan Yesus Wali Ondofolole walora Allah kena buhae heumekokere kayee moloiboise nda yoni-yoni yae na hului ban sele: here, wali, malaikat-malaikat, walobo yoni-yoni, nda hee baete rambun, bena ya honoifoyolene benate rambun, elae bele wake bele yoni-yoni, bumane nekate yoni-yoni, ana nekate yoni-yoni, Allah mokouboke rambun yoni-yoni nemene.
Paulus Kena Kowole Yahudi Ro Miyae Wali Ondofolore Ei Hawenainyele

*8:36 8:36 Mazmur 44:22