7
Pa̱ire Coꞌaye Neñe
(Mt 15.1-20)
Jesús quëꞌrona Fariseo pa̱i cuiꞌne cua̱ñeseꞌe yeꞌyacohuaꞌi tsio dateña, Jerusalénpi daisicohuaꞌipi. Ja̱je daisicohuaꞌipi ñajëna, Jesús yeꞌyacohuaꞌipi jë̱ña tsoamaꞌpë a̱ëꞌë. Ja̱je tsoamaꞌcohuaꞌipi a̱ijëna, ñani cueꞌcuehuë, siꞌsi jë̱ñapi a̱iñë cajë. Ja̱ohuaꞌi cato ja̱ yëꞌtaꞌa a̱o a̱imaꞌnë jë̱ña tsoajë̱ꞌë. Aipë caseꞌere yoꞌocohuaꞌi paëꞌë. Ja̱je paꞌiohuaꞌipi a̱o huero hue̱ꞌñapi coꞌini ai jë̱ña tsoacohuaꞌi pateña. Cuiꞌne jaiye yeque yoꞌocohuaꞌi pateña, i̱ohuaꞌi aipë yoꞌoye, u̱cu duruhuë̱a tsoaye, quë̱na neꞌña tsoaye, ca̱isi saihuë tsoaye, yoꞌocohuaꞌi pateña.
Ja̱je yoꞌocohuaꞌipi fariseo pa̱i cuiꞌne cua̱ñeseꞌe yeꞌyacohuaꞌipi se̱teña, Jesure ñeje:
“¿Me yoꞌojë mëꞌë yeꞌyacohuaꞌi jë̱ña tsoajë̱ꞌë ja̱ yëꞌtaꞌa a̱imaꞌnë caseꞌe yoꞌomaꞌpë, siꞌsi jë̱ñapi a̱iñeꞌni?”
Ja̱je cajëna, Jesupi capi, ja̱ohuaꞌire:
“Nuñerepa ja̱je mësaru coa cacohuaꞌi paꞌijëna, asaquë coꞌaji Maijaꞌquëre quëacaiquë Isaías ñeje caquë toyapi:
Icohuaꞌi cato yëꞌëre coa yëꞌoposeꞌe oiyë cayë.
Ja̱je paꞌiquëtaꞌare i̱ohuaꞌi joñoapi yëꞌëre oiye pa̱ñë.
I̱ohuaꞌi yëꞌëre se̱ñë cajë yoꞌoye doꞌi peoye aꞌë.
Coa pa̱iseꞌe cua̱ñeseꞌere yeꞌyajë yoꞌo doꞌire.
¿Me yoꞌojë mësaru Maijaꞌquë cua̱ñeseꞌere yoꞌomaꞌpë yequere coa pa̱i cua̱ñeseꞌere yoꞌoyeꞌni? ¿U̲cu duruhuë̱are tsoaye, quë̱na neꞌña tsoayere cuiꞌne jaiye ja̱je paꞌye yequeje̱ yoꞌoyeꞌni?”
Caëña, Jesús yequeje̱:
“Mësaru aiohuaꞌi caseꞌere yoꞌoñuꞌu cajë Maijaꞌquë cua̱ñeseꞌere ti̱rona je̱oni yoꞌoyë, mësaru. 10 Moisés cato capi: ‘Mëꞌë jaꞌcore cuiꞌne më jaꞌquëre deꞌoye oi sa̱ñope camaꞌë paꞌijë̱ꞌë. Pëca jaꞌcore cuiꞌne pëca jaꞌquëre sa̱ñope coꞌaye caquëre cato huani je̱oñe paꞌiji.’ 11 Ja̱je caseꞌe paꞌiquëtaꞌare mësaru caye paꞌiji: ‘Jaꞌquëre cuiꞌne jaꞌcore co̱caiye pa̱ñë. Siꞌaye yëꞌë paye Maijaꞌquëna i̱sihuë.’ 12 Ja̱je mësaru cani cayë, jaꞌcore cuiꞌne jaꞌquëre co̱caiye peoji, cajë. 13 Ja̱je mësaru yoꞌojë Maijaꞌquë cua̱ñeseꞌere pare je̱ocoyë, pa̱i caseꞌere yecohuaꞌina se yeꞌyajë. Ja̱je paꞌye yequeje̱ jaiye yoꞌoyë, mësaru.”
14 Ti̱jupë Jesús soini capi, pa̱ire:
“Asajë̱ꞌë, siꞌa pa̱i. Coa tayo asamaꞌpë deꞌhuajë̱ꞌë. 15 Siꞌaye ë̱mëjeꞌepi se cacaye cato pa̱ire coꞌaye ne maꞌñe aꞌë. Sa̱ꞌnahuë joyopi coꞌaye etaye aꞌë, pa̱ire coꞌaye siꞌsi neñe. 16 Ca̱joro pacohuaꞌi sëte asajë̱ꞌë.”
17 Ja̱je casi jeteyoꞌje pa̱ire je̱oni huëꞌena Jesús cacasi maca i̱ yeꞌyacohuaꞌipi ja̱ caseꞌere quëajë̱ꞌë cajë se̱teña.
18 Se̱jëna, caëña:
“¿Ja̱je paꞌito mësaruje̱ asa ti̱ꞌañe pa̱re? Mësarupi asahuë, siꞌaye ë̱mëjeꞌepi cacaseꞌe cato pa̱ire coꞌaye neñe peoji. 19 A̲o cato joyona saiye pa̱ji. Coa a̱i ë̱tatuꞌuna saiseꞌepi jeteyoꞌje eta saiji. 20 Cuiꞌne pa̱i joyopi etaye aꞌë, coꞌaye neñe. 21 Sa̱ꞌnahuë joyore cayë ja̱ropi etaji, siꞌaye coꞌaye cuasaye: yecohuaꞌini nomiohuaꞌire, ë̱mëre yoꞌoye, pa̱ire huani je̱oñe, 22 coꞌamaña i̱mañe, yecohuaꞌi coꞌamañare pa ëaye ñañe, siꞌaye coꞌayere yëye, cosojë yoꞌoye coꞌayena sëo measicohuaꞌi paꞌiye, yecohuaꞌi payere ëa ñajë pë̱iñe, yequëna coꞌa coca ca maꞌñere se quëaye, jerepa paꞌi aꞌë cuasaye, cuiꞌne yecohuaꞌi paꞌiyere cuasacaimaꞌpë coa jo̱sa yoꞌoroja̱iñe. 23 Siꞌaye iye joyo sa̱ꞌnahuëpi etaji. Ja̱pi pa̱ire siꞌsi neñe aꞌë.”
Yequë Yeja Acopi Jesure Sehuoye
(Mt 15.21-28)
24 Ja̱ropi Jesús Tiro cuiꞌne Sidón yejana sajiꞌi, huëꞌena cacani pa̱ije huesëja̱jë yëꞌëre caquë. Yoꞌoquëtaꞌare catiye peopi. 25 Ja̱ doꞌire tsoe Jesu api asaco, huati quëꞌio pëca jaꞌcopi i̱ quëꞌrona dani doꞌre jaꞌruni se̱coꞌë, huatire eto saocaijë̱ꞌë, yëꞌë mamacore paꞌicore. 26 Ja̱o cato Sirofenicia pa̱io pacoꞌë, yequë yeja aco. 27 Ja̱je cacona, Jesupi capi, i̱ote:
“Mamajëpi duꞌru a̱ijajë, coꞌaji, mamajë a̱iñere sioni joꞌya yaina i̱siye.”
28 Caquëna, i̱opi sehuoña:
“Ja̱je paꞌijë̱ꞌë, Ëjaë. Ja̱je paꞌiquëtaꞌare joꞌya yaije̱ a̱icohuaꞌi aꞌë, mamajë a̱ijë ne to̱ neꞌña mañaje.”
29 Cacona, Jesupi caëña:
“Deꞌoyerepa mëꞌë cayë, tsoe mëꞌë mamacore huati eta sajiꞌi, se̱ñaco saijë̱ꞌë, deꞌoji.”
30 Caëna, huëꞌe ti̱ꞌani ñacona, ca̱i saihuë u̱icopi mamaco tsoe huatire peocopi deꞌoye pacoña.
Jesupi Asamaꞌquëre Jujuye
31 Jesús Tiro yejapi etani Sidón yeja sa tëto sani cuiꞌne Decápolis daripë̱aje tëto sani Galilea jaira ti̱ꞌaëña. 32 Ja̱rote paꞌina, asamaꞌquëpi cuiꞌne hua̱ꞌhua̱ coca caquëni dareña. Dani pato coꞌyacaijë̱ꞌë, cajë se̱teña. 33 Se̱jëna, Jesupi pa̱i peo te̱ꞌtena sani moñopi ca̱jorona sa̱quëña. Sa̱ꞌi copi i̱ moñona tseꞌseni tse̱meñoje papiña. 34 Papiquë maꞌtëmona ñaquë ai yëꞌeni caëña:
“¡Efata!” Ja̱je cani capi, Huiꞌyojë̱ꞌë.
35 Ja̱ maca tsoe ca̱joro huiꞌyopi. Ja̱ maca deꞌoye coca caquë paquëña. 36 Ja̱je yoꞌoni capi, ja̱ohuaꞌire, yecohuaꞌire quëamaꞌpë. Ja̱je caëna, coa jerepa quëareña. 37 Quëarena, deꞌoyerepa yoꞌoquëꞌni cuasajë careña:
“Siꞌaye deꞌoye yoꞌoji. Yoꞌoquëna, asamaꞌcohuaꞌije̱ asacohuaꞌi deꞌoyë, camaꞌcohuaꞌije̱ cayë.”