Ya Hulat kanlan
Hebreo
Paunan habi
A na inungkat di ha Hulat kanlan Hebreo ya ampaniwala kan Panginoon Jesus no hinoy nag hulat. Noa, muwang tamo ya nanulat ay mihay ampaniwala kan Panginoon Jesus, ya hi Panginoon Jesus ya habaytoy impangako, ya Mesias, ya Cristo, ya Mámiligtas, ya Anak ni Apo Namalyari, ya mamaala hên ayn angga, haka mam-in biyay ya ayn angga kanlan ampaniwala kana.
Di ha hulat ay ampakhawên nan nanulat ya nakêm lan anhulatan na hên ihundo lay paniwala la, gawan main a ampaniwala ya anhumalanghang kanla hên main hadyay pamairap kanla. Hilay habaytoy ampamairap kanla ay ampaniwala ya a ya pon nilumatêng ya Mesias, ya Cristo, ya Mámiligtas, kabay kaatag ya an-êngganan la, alwan hi Panginoon Jesus.
An-ipaihip na kanla ya hi Panginoon Jesus ay Anak ni Apo Namalyari, haka hiya ay ayn kapantag ha hinon anghel, o hinon mámipamwang hên an-ipaihip kanla ni Apo Namalyari. Hi Panginoon Jesus ay inhagili ha pinakapoon pari ta hiyay nag-in mámilatan hên balang miha kan Apo Namalyari hên in-átang nay sarili na ha pamayad hên kasalanan tamo. Hiyay biniyay oman ni Apo Namalyari, haka gawan kana ay main biyay ya ayn angga ha langit ya balang ampaniwala kana.
Kabooan hên pinakalaman
Hi Apo Jesu-Cristo ay Anak ni Apo Namalyari 1:1-3
Hi Apo Jesu-Cristo ay matag-ay ha kaganawan anghel 1:4-2:18
Hi Apo Jesu-Cristo ay matag-ay kan apo Moises haka kan Josue 3:1-4:13
Hi Apo Jesu-Cristo ay matag-ay kanlan pinakapoon pari 4:14-7:28
Hi Apo Jesu-Cristo ay mámilatan hên bayoy kahundoan ya mangêd ha manan kahundoan 8:1-9:28
Ya pamiátang ni Apo Jesu-Cristo hên sarili na, ay mangêd ha kaganawan átang 10:1-39
Ya paniwala ya ayn kapantag, payo, haka panaad 11:1-12:29
Ya pamanhumonol ya ampamahigla kan Apo Namalyari 13:1-19
Inhalangin hilay hinulatan 13:20-21
Tawlin habi 13:22-25
1
Impamwang ni Apo Namalyari no hino ya, gawan kan Apo Jesu-Cristo, ya Anak na
1 Hên haton lagi, ay panay nan an-ipamwang ni Apo Namalyari ya kalabayan na kanlan ninuno tamo ha mal-at ya paraan, gawan kanlan mámipamwang na. 2 Noa, amêhên, ay impamwang nay kalabayan na kantamo gawan ha Anak na. Gawan êt ha Anak na ay dinyag nay kaganawan. Haka ya Anak na ay pinili na hên dyanan hên habayto ngan. 3 Atsi êt kanan Anak ya kapahilêw ya kahampatan haka ya panga-Diyos ni Apo Namalyari. Angkahêlêk ha Anak no ay-êmên ya ugali ni Apo Namalyari. Ya Anak ay ampamaala ha kaganawan ya atsi ha ayri man ya logal ha makapangyarihan ya utoh na. Ya Anak ay nanlinis kantamo ha kasalanan tamo, bayo nag-orong yay na ha langit ha dapit panabtab ni Apo Namalyari hên mamaala hên kalamo na.
Matag-ay ya tungkulan ni Apo Jesu-Cristo, ya Anak ni Apo Namalyari kanlan tungkulan lan anghel
4 Ya Anak ay dinyanan hên tungkulan ya matag-ay ha tungkulan lan anghel. Muwang tamoy habayto gawan “Anak” ya pamaêg kana ni Apo Namalyari, haka “anghel” bat ya pamaêg na kanlan anghel. 5 Minghan man, ay a na hinabi ni Apo Namalyari ha hinon anghel ya hinabi na ha Anak na, ya wana,
“Hika ya Anak ko,
haka amêhên impamwang ko ya hiko ya Tatang mo!”*Awit 2:7, Dyag 13:33.
A na etaman hinabi hên tungkol ha hinon anghel,
“Hikoy mag-in Tatang na,
haka hiyay mag-in Anak ko.Ӡ2 Samuel 7:14, 1 Cronica 17:13.
6 Haka hên hato, hên marani na yay nan iutoh ya kamiha-mihaan nan Anak ha luta, ay êmên di ya hinabi na hên tungkol kanan Anak,
“Dapat yan simbaên hên kaganawan anghel ko.”
7 Tungkol etaman kanlan anghel, êmên di ya hinabi na,
“Hilay anghel etaman ay pan-iutoh kon bêngat. Ha pamaghuyo la kangko ay malyari ko hilan iutoh hên nanad ha pan-iutoh koy angin o apoy.”
8 Noa, matag-ay ya tungkulan nan Anak, ta ya hinabi ni Apo Namalyari kanan Anak na, ay êmên di,
“O Diyos, ya pamamaala mo ay ayn anggaan,
haka ampamaala ka, hên main katoynungan.
9 An-ikahigla mo ya dyag ya main katoynungan,
noa, angkahêmêkan moy karawakan,
kabay hiko, ya Diyos mo, ay namili kamo,
hên dinyanan hên kahiglaan, ya igit pon ha kahiglaan hên hinon kalamo mo.”‡Awit 45:6-7.
10 Haka wana êt ni Apo Namalyari hên tungkol ha Anak na,
“Hên una, ay hika Panginoon ya nanyag hên luta haka langit.
11 Lumatêng ya allo, ay maanggaan ya habayto ngan,
noa, hika ay ayn anggaan.
Ya habayto ngan ay mag-in ayn pukat hên nanad ha gulot ya takop.
12 Itapon mo ya habayto ngan ta hagilyan mina,
hên nanad ha gulot ya takop.
Noa, hika ay a ampangoman,
haka a antumoa o matsi man.ӤAwit 102:25-27.
13 Minghan man, ay a na hinabi ni Apo Namalyari ha hinon anghel ya hinabi na ha Anak na, ya wana,
“Mikno ka ha dapit panabtab ko hên mamaala hên kalamo ko,
angga ha hambutên ko hilay kapatsi mo, ta idin ko hila ha aypan kapangyarihan mo.”*Awit 110:1.
14 No êmbayro ay hino awud ya tungkulan lan anghel? Hila ay espiritu, ya a tamo mahêlêk, ya ampaghuyo kan Apo Namalyari, ta êmên mahawpan kitamo ya miligtas.