11
Jerusalénhainoa joi akaibo Pedron jato onanmaa
Ja raanabaon itan Judeain iká joi akaibaonra, ninkákana iki, ja judíomabaonribi Diossen joi ninkáxon ikonhakana.
Ikaxbi Pedro jakiribi Jerusalénhain karibaketian, jatíribi joi akai judíobo jabé join iananankana iki.
Jatian yokákana iki: —¿Jaweatiki ja judíomaboiba merati kaxon min jato betan pia iki? —akin.
Jatianra peokootainxonbi jatíbi jaskara ikábo Pedron jato neskáakin yoia iki:
—Ja Jope jeman ixon orani iikinra, westíora namá keska en aká iki; en oinna iki ani chopa kakaati keská, orinbekonbi jawen chosko pabíori nexaa, naikanmeax ipakeax, ea itinainkoshaman paketai.
Jatian jawebomein ja chicho jake ixon, jakonshamanhakin en oinnara iká iki, chosko taeya meskó yoinabo, siná yoinabo, ronobo, jainoax pechia yoinabo.
Jaskákenbi ea neskáakin yoia iki: ‘Pedro, nato yoinabo retexon piwé’, akin.
Jatian en neskaa iki: ‘Jawetianbira kerás jawékibo en piosma iki, Ibó’, akin.
En jaskáa, nai bochikixon jakiribi ea neskáakin yoia iki: ‘Ja Diossen moa jakonhayona jawékibo kerasen yoinyamawe’, akin.
10 Jatian kimishaakin ea jaskáa pekáo, jatikaxbiribi moa naikan boi keyákana iki.
11 Jaskatatianbi, kimisha joni ea iká xobon nokótoshikana iki; Cesareankoxon ea benati raankana.
12 Jatian ja Diossen Shinanman ea yoia iki, jawekeskabo shinanyamai, jato betan karesti. Jatianra nato sokota joi akaiboribi ebetan bokana iki. Kaax jatikaxbi nokotax, ja jonin xobon noa jikia iki.
13 Janra noa yoia iki, jawen xobo meranoa ángel chankata meraatonin neskáakin yoiibata: ‘Jope jemanko jonibo raanwe, ja Simón akin akanai Pedro kenatankanon ixon.
14 Janra mia joi yoitiki, jatíbi ja min xobon ikáboyabi mia jaskatax kishpinti’, akin.
15 Jaskáakin en jato yoikin peoketianra, ja noki rekeni joní keskatiribi jatoki Diossen Shinan joá iki.
16 Jaskáketian ja non Ibon yoini joi en shinanna iki: ‘Ikon riki, Juanmanra onpaxenres jato bautizana iki, ikaxbi matora ja Diossen Shinanman bautizanoxiki’, iki iní.
17 Jaskara iken, ja non Ibo Jesucristo ikonhaketian noa menia keskáakinribi, ja Shinan jato Diossen menikenki ¿Tsoa iki ea, ja Diossen akai jawékibo bechitenti? —akin jato aká iki.
18 Jatian jaskáakin jato yoia ninkatax, ja Jerusalénhainoa joi akaibo, moa jawebi yoyo iamai Dios rabii neskákana iki: —¡Ja judíomaboribira Diossen ikonhamataanan jato jati nete menia iki! —ikibo.
Antioquíainoabo joi akí peokoota
19 Jatian ja Esteban retekanontianribira, ja jatíribi joi akaibo masá tenemakin peokana, jabati bokana iki: Feniciain, Chipreain, jainoax Antioquíainbo. Jainbo boxonbi, judíomabo ayamakin ja judíobobichores ja jakon joi yoikana iki.
20 Jaskákenbi Chipreainoa betan Cireneainoa jawetii joi akaibo Antioquíain bokana iki. Jain boxonra, ja non Ibo Jesúskiriti iká jakon joibo ja judíomaboribi yoikana iki.
21 Ja Ibon atipana koshi jato betan iketianra, ichaxon ja moatian jaton jakonma axébo jenetaanan, non Ibo ikonhakana iki.
22 Jatian ja Jerusalénhain iká joi akaibaon, jaskara joi ninkáxon, Bernabé Antioquíain raankana iki.
23 Nokóxon, Diossen jatoki jakonhakin shinannai onanax, ikonbiresi Bernabé raroa iki. Jatíbira jato eseanan yoia iki, ponté shinanyaxon non Ibo chibankin jeneyamakin, jan yoiai keskábo senenhaxonkanon ixon.
24 Bernabé iká iki jakon shinanya joni, Diossen Shinan naikia itan oinxomabi, ikonhaax koshia joni. Jaskara iketianra, icha non Ibo ikonhaa jonibo kaikana iki.
25 Jaskata pekáo, Bernabé Tarsoain kaa iki, Saulo benai.
26 Jatian ja Antioquíainoa meraxon ioa iki. Jain westíora baritia senen joi akaibo betan ixon, icha joni jato esea iki. Ja Antioquíainxonra jaonmea onannaibo peokin janekana iki, Cristianos akin.
27 Ja netebaonribira, Jerusalénhainoax jaweti *profetabo Antioquíain bokana iki.
28 Jatian jato xaranmea Agabo janeya jonin Diossen shinanman onanmaa, jatíbiainoa jonibo jawékiatinin ikanti jato yoia iki. Jaskáakin jan yoiabora ikoni senena iki, ja Claudio icha mai iboaa apo inontian.
29 Jaskara iketian, Antioquíainoa joi akaibaon shinankana iki, judeainoa joi akaibo, westíorabaon jaton atipana senenbo jato jawékinin akinti.
30 Ikonkon jaskáakin akana iki, Bernabé betan Saulo kaaitian koríki bomakana iki, ja judeainoa iká *ancianoboki.