1 Jatian Pablo betan Silas kakin, ja Anfípolis betan Apolonia winobaini kaax, Tesalónicain iká judíobo jain tsinkíti xobon nokókana iki.

2 Jatian Pablo jaskatibiribi axea ikax, jain tsinkíti xobonko jato betan jikia iki. Jain jato betan iká iki, kimisha semana tantiti netetiibi, Diossen joi yoyo axon jato jakonhakin ninkákiini.

3 Jato onantiakinbo yoia iki; ja *Cristo mawáti, itan jaskati mawata pekáobi, jakiribi jiriti. Jainxon jato yoia iki: —Ja en mato yoiai Jesúsbi riki ja Cristo —akin.

4 Jaskáakin Pablo betan Silassen jato yoiara, Diossen joi ikonhaax, jatíribi judíobo jato betan ikana iki. Jatianra ja Dios akin shinannai Griego joniboyabi, icha kikin ainbobaonribi Diossen joi ikonhakana iki.

5 Ikaxbi ja ikonhaayamai judíobaonbiribi, notsikin jato jakonmaanoxon ja jeman niresa jakonma shinanya jonibo tsinkikana iki. Jaskáax jeman saa ibotani jato rateboi boax, Jasónman xobon nokotax, jain weikana iki, ja Pablo betan Silas ja icha jonibo tsinkitainko yatanhanan bonoxon benai.

6 Ikaxbi jato nokoyamaxon, Jasón betan jatíribi joi akaibores yatanxon, jato joi benxoakinai joni koshiboiba bokana iki. Boax, neskati saa ikana iki: —¡Nato jonibo, jatíbiain jato shinan tsokasmai iitaibora, nenoribi nokókanke.

7 Jatian jabora Jasónman jawen xobon jato imake! ¡Ja jonibora, ja icha mai iboaa romamea apon eséboki yoitimakanai. Wetsa apo Jesús janeyaronki jake ikibora ikanai! —ikibo.

8 Jaskákanaitian ninkatax, ja joniboyabi jaton koshibo ratetax, sinákana iki.

9 Jatianra Jasón betanbi ja wetsa joi akaibo, jayá pikonoxon jato kopí yokákana iki.

10 Jainxon ja yamébi ja joi akaibaon, Pablo betan Silas Bereain raankana iki. Jain nokótaanan, ja judíobo jain tsinkíti xobonko jikibekona iki.

11 Jainoa judíobora, ja Tesalónicainoa judíobo bebonbires jakon shinanyabo ikana iki. Jaskarabo ixon, keenshamankin Diossen joi bixon, netetiibi Diossen kirika meranoa wishábo yoyo akana iki; Jaskarakonmein iki, ja noa yoiai joibo ixon onanshamannoxon.

12 Jaskáaxonra icha judíobaon Diossen joi ikonhakana iki. Jainxon ja Griego join yoyo ikai kikin ainboboyaxonbi benbobaonribi Diossen joi ikonhakana iki.

13 Ikaxbi Bereainxon Pablon, Diossen joi jato yoiribiai ninkataxa Tesalónicainoa judíobo jain bokana iki. Boxonra jain ikana jonibo meskóakinbo yoixon jaton shinanbo tsokásmaribakana iki.

14 Jaskákanaitian, ja joi akaibaon ishtonbires Pablo aniparo kexá iokana iki. Jatian Silas betan Timoteobiribi Bereainbi banékana iki.

15 Ja Pablora Atenas kamanres iokana iki, jain potabeirani beribakanaitian, Silas betan Timoteoki Pablon joi bomaa iki, ishton joxon oinni bekanti.

16 Jatian ja Atenas jeman nokóxon, Silas betan Timoteo manaai iikin, ja jemamea ikonma diosbo oinyaketanax, Pablo sinata iki.

17 Jaskarabo ointaanan, tsinkíti xobo meran kaxon, judíoboyabi ja Dios rabiai wetsaboribi, ja Diossen joi onantishamanhakin netetiibi jato yoia iki. Jaskáribiakin ja plazain beax tsinkíkanaboribi, onantishamanhakin jato joi yoikatitai.

18 Jatian jainribi ikana iki, jawetii ja Epicúriosbaon itan ja Estoicobaon shinan chibanaibo, jabora jato betan join iananani neskákana iki: —¿Jawe jawéki yoiikayaki, nato yoyo ikas joni jaskatai? —ikibo. Jatian wetsabobiribi ikana iki: —Jaton diosbiribi yoiira ibirakanai —ikibo. Jaskatibora yoyo ikana iki, ja Jesúskiriti iká joibo itan ja mawábo jiritikiri iká joibo Pablon jato yoiaitian.*Ja Epicúriosbaonra jato onanmakana iki; raro iti, itan non keena keskáres atikaya bebonbires jakon. Ja Estoicobaonra jato onanmaa iki, jatíbi jonibo jakonma anaketian jatonbinix koiranmeeti, Diossen imaama.

19 Jaskáxon, ja Areópago akin akanainko Pablo iokana iki, jain onan jonibores tsinkíxon joi benxoakanainko. Jainxonra neskáakin yokákana iki: —¿Minki noa onanmati atipana, jawerin nato bená joi min noa yoia?

20 Ja min noa yoiabo riki, non ninkáyosma joibo. Jaskara kopíra non onankasai, jawe yoiiki mia jaskáwana ixon —ikibo.

21 Ja Atenas jemamea jonibora jawéki ayamakinbi, bená joibores ninkáxon, ja joibores jato yoitinin keenbo ikanai, jainoax ja wetsankoniax jain jaai bekanaboribira jaskarabo ikana iki.

22 Jatian jaskákanaitian, ja Areópago akin akanainkoniax weítaanan Pablon jato yoia iki: “Mato Atenas jonibo riki en oinna, maton diosbo ayorakin shinannaibo.

23 Ja jainxon ja maton diosbo rabiaibo oinni kawantankinra, en merake, ja jaanxon Dios yoina menoxontiain, westíora wishá: ‘Westíora onankanama dios’, iki iká. Ja onanyamaxonbi maton rabiai riki, já yoikin en mato aatai.

24 Ja Diossenra jatíbi ja neno iká jawékiboyabi, nato nete jonia iki. Jara nai betan mai ibo iki, jaskara ikaxa, jonin xoboaxonaton Dios jayamake.

25 Jara tsonbi jawéki axontinin keenyamai, jabicho riki noa jan jamaa itan jatíbi jawékibo noa jan meniai.

26 Janra westíora jonimeabicho, jatíbi nato netemea jonibo aká iki, jatíbi nato mai rebestani jakanon ixon. Jainxonra jain ikantibo itan jatio basi jakantiboribi jato yoia iki.

27 Diossenra jaskaa iki, jatíxonbi já benakanon ixon, jara noo pataxbi iki. Jakopira benakin non nokoti atipanke.

28 Ja Dios kopíresa noa jake, noa koshiai, itan noa jishti itinke. Jaskara yoiira inike maton kaibo ja yoyo iti onan shinanya ikax neskati: ‘Noabora Diossen chiní rarebobo iki’, iki.

29 Jaskara ikon Diossen chiní rarebobo ixonra, ja jonibaon jatonbi shinanxon oro akana, koríki akana itan makan akanabora dios iki ixon non shinanyamai.

30 Jaskarabo moatian onanama inontianra, jonibo Diossen jaweayamakin jato oinresa iki. Ikaxbi ramatianbiribi jatíbiainoabo Diossen jato yoiai, jakonma jawékibo jenetaanan jares rabikanti.

31 Diossenbi moa yoia nete senenketianra, jatíbiainoa jonibaon aka jawékibo onantiakin jato yoixonoxiki, jawen katota westíora joni meranxon, ja iki Cristo. Jan jato jaskáati ikenra jatíbi jonibaon onankanon ixon, mawákenbi Diossen jirimaa iki”, akin.

32 Jaskáakin ja mawábo jiriti jato yoia ninkatax, jatíribi jonibo shiroreskana iki. Jatian jatíribibobiribi neskákana iki: —Wetsatian joxon ja joi min noa yoiaitian mia non ninkáxononpari —ikibo.

33 Jaskákanaitian jato jenebaini moa Pablo kaa iki.

34 Ikaxbi jatíribibaonres chibanxon, Diossen joi ikonhakana iki, ja ikonhakanabo ikana iki; Dionisio, ja iká iki, Areópagoain ipachoai. Jainoax Dámaris janeya ainbaon itan wetsabaonribi joi ikonhakana iki.