III. Okufûka kw’abafîre
15
Okufûka kwa Yezu n’okufûka kwîrhu
1 Bene wîrhu, nammukengeza erya Myanzi y’Akalembe nammubwîrizagya, mwayiyankirira, munaciyisêziremwo buzibu, 2 yo yanammuciza erhi mwankayilanga nk’oku nammubwîragayo. N’akabà arhali ntyo, erhi mwayêmîre bya busha. 3 Burhanzi, nammuhisakwo ebi nâni niene nahâbagwa: oku Kristu afirîre ebyâha bîrhu nk’oku Amandiko gadesire, 4 oku abishirwe omu nshinda, n’oku olusiku lwa kasharhu àfûsire nk’oku Amandiko gadesire; 5 n’oku àbonekîre Kefa, abul’ibonekera na balya ikumi na babiri. 6 Okuhandi àbonekera bene wîrhu magana arhanu na kulusha caligumiza, na banji muli bo ho bacibà, ci baguma bafîre. 7 Ashub’ijaho, àbonekera Yakôbo, àbonekera n’entumwa zoshi. 8 Cazînda àmbonekera nâni nka kula ankabonekera ecimomano.
9 Nêci, nie munyi omu ntumwa zoshi, ciru ntakwânîni izîno ly’entumwa, bulya nalibuzize Ekleziya ya Nyamuzinda. 10 Cikwône eri nshôkano ya Nyamuzinda yanjiraga okûla ndi, n’enshôkano anshobôzagya erhagumbaga muli nie. Ci nie nakozire kubalusha boshi! Câba nanga, arhali nie, ci enshôkano ya Nyamuzinda haguma nâni.
11 Akabà nie, erhi akabà bo, kwo rhuyigîriza ntyôla; kwo mwanayêmîre okwo. 12 N’akabà bayigîriza oku Kristu afûsire omu bafù, kurhi baguma muli mwe bankaciderhaga mpu ntà bufûke bw’abafîre? 13 Akabà ntà bufûke bw’abafîre, Kristu naye arhafûkaga! 14 N’akabà Kristu arhafûkaga, enyigîrizo zîrhu ziri busha, n’obuyêmêre bwinyu nabo buli busha. 15 Ciru nîrhu erhi rhwamâbà bahamîrizi babêshera Nyamuzinda, bulya rhwamunywerhîre nti afûsize Kristu n’obwo arhamufûlaga, akabà kwo binali abafù barhafûka. 16 Bulyâla akabà abafîre barhafûka, Kristu naye arhafûkaga. 17 N’akabà Kristu arhafûkaga, obuyêmêre bwinyu buli busha, munaciri omu byâha binyu; 18 kuziga n’abafîre muli Kristu baherêrekîre. 19 N’akabà muli obûla buzîne bw’en’igulu mwône rhulangalîre Kristu, omu bantu boshi erhi rhwe rhunali bahanya kulusha*15, 19 Bulya omukristu acîhirira eby’en’igulu mpu lyo ayish’ibona amasîma g’empingu. Akabà ntà bulangâlire rhugwêrhe bw’okuyish’ihika omu mpingu, rhuli bingolongolo rhunali bahanya!.
20 Cikwône nanga Kristu afûsire omu bafù, àshokolera abagwishîre†15, 20 Omu Mandiko matagatîfu, okugwishira kwo kufà.. 21 Bulyâla muntu wadwîrhe olufù, kwo na kwo muntu wadwîrhe okufûka kw’abafîre. 22 Nêci, nka kulya boshi bafà muli Adamu, kwo na boshi bayish’ishubiramwo omûka muli Kristu. 23 Cikwône ngasi muguma omu gâge mango: Kristu ye murhanzi-rhanzi, kandi abayish’ibà ba Kristu olusiku ayisha. 24 Okuhandi bwanabà buzinda, go mango ashubiza Nyamuzinda Îshe obwâmi, amâyûs’ishâba amâmi goshi na ngasi burhegesi na ngasi buhashe‡15, 24 Ago mâmi n’obwo burhegesi n’obuhashe ayish’ishâba go mâmi n’oburhegesi n’obuhashe bwa balya barhalonza Kristu abayimemwo.. 25 Nêci, kukwânîne ayîme kuhika ahebe abashombanyi bâge boshi ah’idako ly’amagulu gâge15, 25 Lul 110(109), 1. 26 Omushombanyi muzinda wayish’ishâbûlwa, lwo Lufù; 27 bulyâla Nyamuzinda ahizire byoshi ah’idako ly’amagulu gâge. Ci amango aderha mpu byoshi biri idako ly’amagulu gâge, rhumanye n’obwâlagale oku Olya wamuhâga ebintu byoshi arhaganjira muli byo. 28 N’amango ebintu byoshi byoshi byâbà bikola biri idako ly’amagulu gâge, naye Omugala yêne anacîhira idako ly’Olya wamuhâga byoshi, lyo Nyamuzinda ashuba byoshi muli boshi.
29 Acibâga birhali ntyo, balya babatizibwa abafù barhumire, singa bunguke buci barhôlamwo? Acibâga abafîre barhafûka ciru n’ehitya, cici cirhuma bacibatizibwa ahâli hâbo§15, 29 Nkaba; erhi omukatekumeni afaga buzira kubatizibwa, Abakorinti bakâg’imujirirako ebijiro n’ensengero ziri nka za Bubatizo, lyo barhabâla omûka gwâge okuhika mwa Nnâmahanga.? 30 Nîrhu rhwêne, cici cirhuma rhucîhira omu kaga ngasi kasanzi? 31 Ngasi lusiku erhi ndi omu lufù, bene wîrhu; n’okwo kunali nk’okûla muli irenge lyâni muli Nnawîrhu Yezu Kristu. 32 Acibâga bunya-muntu bwône bwarhumaga nalwîsa ebiryanyi e Efezi, singa bunguke buci nali nakûlamwo? Akabà abafîre barhafûka, «rhulyage rhunanywe, bulya irhondo rhwafà»15, 32 Iz 22, 13., 33 Mumanye murharhebagwa: «Okukômera ababî kunasherêze engeso nyinjà». 34 Murhenge omu balalwe nk’oku bikwânîne, murhanacihîra mukajira ebyâha; bulya muli mwe hali abarhishi Nyamuzinda*15, 34 Abakorinti baciri nka balalwe erhi ngeso zâbo z’ecipagani zirhuma.. Nkudesire nti enshonyi zimmugwârhe.
Kurhi abafîre bayish’ifûka
35 Haligi kwône owaderha, erhi: «Kurhi abafîre bâfûke wâni? Mubiri guhi bâgalukane?» 36 Eci cihwinja! Eci orhwera cirhajamwo buzîne cirhanarhanzir’ifà. 37 Na nka warhwêra, arhali omubiri gwamurhenga gw’orhwera, ci mburho yône orhwera bûmubûmu kulyâla enali, nka ngano erhi yindi mburho. 38 Nyamuzinda ye oyihà omubiri nk’oku yêne alonzize, na ngasi mburho omubiri gwâyogwâyo.
39 Emibiri yoshi erhali yo miguma: ogw’abantu gubà gwâgo, ogw’ensimba gwâgo, ogw’enyunyi gwâgo, n’ogw’enfî gwâgo. 40 Haligi emibiri y’eby’emalunga n’ey’ebya hano nshi; ci obulangale bw’ey’eby’emalunga bubà bwâgo, n’obulangale bw’ey’ebya hano nshi bwâgo. 41 Obulangale bw’izûba bubà bwâgo, n’obulangale bw’omwêzi bubà bwâgo, n’obulangale bw’enyenyêzi bwâgo. Ciru n’enyenyêzi erhalangashana kuguma n’eyindi. 42 Ntyo kwo biri n’oku bufûke bw’abafù. Omubiri gunarhwêrwe guli gwa kubola, gufûke gurhaciri gwa kubola. 43 Gurhwêrwa buzira bukuze, gufûke omu irenge; gurhwêrwa erhi ngonyi, gufûke guli muzibu. 44 Banarhwêre omubiri gw’obunya-nyama, hafûke omubiri gw’obunya-mûka.
Akabà habà omubiri gw’obunya-nyama, hanabà n’omubiri gw’obunya-mûka. 45 Ntyo kwo biyandisirwe, mpu: Omuntu murhanzi, Adamu, ajizirwe ciremwa cirimwo obuzîne; Adamu muzinda yêhe ajirwa mûka guhâna obuzîne15, 45 Murh 2, 7.. 46 Ci arhali ec’obunya-mûka co cirhag’iboneka; ec’obunya-mubiri co cirhanga: ec’obunya-mûka cikulikire. 47 Omuntu murhanzi†15, 47 Omuntu murhanzi, ye Adamu; owa kabiri, ye Yezu. omu bidaka arhengaga, anali w’en’igulu; owa kabiri yêhe arhengaga empingu. 48 Oku omuny’igulu ali ayôsire, kwo n’abany’igulu bayôrha, n’oku ow’omu mpingu ali ayôsire, kwo n’ab’omu mpingu bayôrha‡15, 48 Adamu ahîre iburha lyâge obuzîne bw’omubiri; Kristu arhuhîre obuzîne bw’empingu.. 49 Na kulyâla rhwalikwo enshusho y’omuny’igulu, kwo rhukwânîne rhujekwo n’enshusho y’ow’omu mpingu§15, 49 Bulya Kristu afûsire. kukwânîne nîrhu rhuyish’ifûka..
50 Kwo ndesire ntya, bene wîrhu: omubiri n’omukò*15, 50 Omubiri n’omukò, bwo bwôrhere bw’omuntu nka arhalimwo buzîne bwa Nnâmahanga Kristu arhudwirhîre birhankayîma omu Bwâmi bwa Nyamuzinda, n’eby’okubola birhankayîma omu birhankahash’ibola. 51 Nkolaga nammubwîra ihwe: rhweshi rhurhakafà, ci rhweshi rhwayish’ihinduka kundi kundi†15, 51 Balya bayish’ibà baciri en’igulu amango Kristu agaluka barhakafa, ci bahinduke.; 52 oku irindo liguma, omu kugohya ntya, oku izù ly’omushekera muzinda; bulya bayish’ibûha omu mushekera, n’abafîre bayish’ifûka na emibiri erhankacifà, na nîrhu rhwayish’ihinduka kundi kundi. 53 Bulya ogûla mubiri gubola, kukwânîne guyambale obuhashe bw’okurhabola, n’ogu mubiri gufà, kukwânîne guyambale obuhashe bw’okurhafà.
Lufù, okuhima kwâwe ngahi kuli
54 Ci amango ogu mubiri gubola gwabà gwamâyambala obuhashe bw’okurhabola n’ogu mubiri gufà guyambala obuhashe bw’okurhafà, ly’olu luderho lw’Amandiko lwayunjula: Olufù lwahimirwe, lwamirwa n’irenge. 55 Lufù we15, 55 Iz 25, 8; Hoz 13, 14., okuhima kwâwe ngahi kuli? Lufù we, akababo kâwe ngahi kaligi? 56 Olufù ecâha ko kababo kâlwo, n’ecâha Irhegeko bwo buzibu bwâco. 57 Ci, nêci, Nyamuzinda akonkwa, owarhuhâga okuhimana erhi Nnawîrhu Yezu Kristu orhuma! 58 Ntyo, bene wîrhu bazigirwa, musimike, murhadundaganaga, ensiku zoshi mukaz’ijà embere omu mukolo gwa Nyakasane, bulya mumanyire oku omukolo gwinyu muli Nyakasane gurhankafa busha.
*15:19 15, 19 Bulya omukristu acîhirira eby’en’igulu mpu lyo ayish’ibona amasîma g’empingu. Akabà ntà bulangâlire rhugwêrhe bw’okuyish’ihika omu mpingu, rhuli bingolongolo rhunali bahanya!
†15:20 15, 20 Omu Mandiko matagatîfu, okugwishira kwo kufà.
‡15:24 15, 24 Ago mâmi n’obwo burhegesi n’obuhashe ayish’ishâba go mâmi n’oburhegesi n’obuhashe bwa balya barhalonza Kristu abayimemwo.
15:25 15, 25 Lul 110(109), 1
§15:29 15, 29 Nkaba; erhi omukatekumeni afaga buzira kubatizibwa, Abakorinti bakâg’imujirirako ebijiro n’ensengero ziri nka za Bubatizo, lyo barhabâla omûka gwâge okuhika mwa Nnâmahanga.
15:32 15, 32 Iz 22, 13.
*15:34 15, 34 Abakorinti baciri nka balalwe erhi ngeso zâbo z’ecipagani zirhuma.
15:45 15, 45 Murh 2, 7.
†15:47 15, 47 Omuntu murhanzi, ye Adamu; owa kabiri, ye Yezu.
‡15:48 15, 48 Adamu ahîre iburha lyâge obuzîne bw’omubiri; Kristu arhuhîre obuzîne bw’empingu.
§15:49 15, 49 Bulya Kristu afûsire. kukwânîne nîrhu rhuyish’ifûka.
*15:50 15, 50 Omubiri n’omukò, bwo bwôrhere bw’omuntu nka arhalimwo buzîne bwa Nnâmahanga Kristu arhudwirhîre
†15:51 15, 51 Balya bayish’ibà baciri en’igulu amango Kristu agaluka barhakafa, ci bahinduke.
15:55 15, 55 Iz 25, 8; Hoz 13, 14.