1 Samweli ayanka ecihakabiro c’amavurha, agadubulira Saulu okw’irhwe, amuhôbera amubwîra, erhi: «Ka Nyamubâho arhamakushîga mpu obè Mwâmi w’olubaga lwâge, Israheli? We wakaz’itwîra olubaga lwa Nyamubâho emmanja n’okulurhenza omu maboko g’abashombanyi bâlwo. Lolaga ecimanyîso Nyamubâho ayêrekinemwo oku akushizire mpu obè mwâmi w’olubaga lwâge. 2 “Buno wanantegaho, washimâna bantu babirhi hôfi h’ecûsho ca Rasheli, omu cihugo ca Benyamini, aha Selisaha, bayishikubwîra oku babwîne zirya ndogomi wajàga walonza; mpu lolà oku sho arhacibà oku lw’endogomi n’omurhima gwâge gwakangalîre erhi we orhuma, anadwîrhe aderha mpu gurhi nankacibona mugala wâni?” 3 “Kurhenga ahôla omu kushimba enjira yâwe wanahika omu rhurhondo rhwa Tabora rhukulikirîne, ahôla bantu basharhu barherema emwa Lungwè e Beteli, muguma ayisha ahuga bânahene basharhu, owundi ayisha agwêrhe birhiri bisharhu bya migati, n’owundi ayisha agwêrhe akabindi k’idivayi”. 4 “Banakulamusa banakuhè migati ibirhi nâwe wanayiyankirira omu maboko gâbo”. 5 “Enyuma ly’aho wanaja emwa Lungwè e Gibeya, halya abarhambo b’Abafilistini bakahanda. Na hano okola wajà omu lugo wanashimâna omurhwe gw’abalêbi bahona ebwa ntondo, emunda balihêra, banayishire ba shokolîrwe n’emijegereza, engoma, orhurhêra n’ennanga, wababandâna balêba”. 6 “Omûka gwa Nyakasane gwanakuja okw’irhwe, nâwe wanarhondêra okulêba, na ntyo ohinduke muntu muhyâhya”. 7 “Hano onabona ebyo bimanyîso byoshi, bikurhindakwo, aho wanajira oku oyumvîrhe kwakujamwo bulya Nyamubâho akurhuzirekwo”. 8 “Kandi wanabungulukira embere zâni e Gilgali, nâni ngaliyisha mbungulikire emunda oli nkushimâne yo, nterekêre enterekêro z’embâgwa n’ez’okushenga omurhûla. Waninda nsiku nda ngalikushimâna, gwo mango nakubwîra oku ogwâsirwe okujira”».

9 Oku Saulu anahindamula omugongo ntyâla, akola alekana na Samweli, Lungwè amuhindula omu kumuhà gundi gundi murhima, ci kwônene birya bimanyîso byoshi byagalibà olwo lusiku lwonênè. 10 Erhi bahika aha Gibeya, omurhwe gw’abalêbi gwafunûnukira kuli ye, omûka gwa Lungwè gwamurhûla kwo, naye arhondêra okulêba haguma nabo. 11 Ngasi bamuyishigi agandi mango, injo na lishinjo, erhi babona adwîrhe alêba haguma n’abandi balêbi, boshi badôsanya mpu: «Bici byayishire muli mwene Kisi? Kusiga Saulu naye akola ali omu balêbi?» 12 Muntu muguma omu lubaga lw’ahôla anacirhenga omu kanwa aderha erhi: «Îshe w’abo ye ndi?» Kurhenga ago mango hazûka omugani gw’okuderha mpu: «Kuziga Saulu naye akola abà mulêbi?» 13 Erhi ayûsa okulêba, asôkera ebwa luhêro enyanya. 14 Mwishè wa Saulu anacidôsa Saulu bône olya mwambali wâbo, erhi: «Ngahi mwâli mujire?» Saulu ashuza erhi: «Rhwàli rhujire rhwalonza endogomi, ci ene rhubà rhurhazibwîni, rhwajà emwa Samweli». 15 Oyo mwishè wa Saulu anacimubwîra erhi: «Mbwîragi nâni kurhi Samweli anamubwîzire?» 16 Saulu anacimushuza, erhi: «Anarhubwîzire bwinjàbwinjà oku endogomi zabonekîne. Ci oku biyêrekîre obwâmi, orhavuhûlaga ebi Samweli adesire.»

17 Samweli anacihamagala olubaga lwoshi embere za Nyamubâho aha Mispa. 18 Anacibwîra bene Israheli, erhi: «Nyamubâho, Lungwè w’Israheli adesire ntyâla: Niene nakûlaga Israheli omu Mîsiri, kandi nanamulikûza oku bâmi bakagimulibuza boshi. 19 Ci mwêhe mw’oyo mugayire Nyamubâho, Nyamuzinda winyu ene n’obwo ye wamuyôkolaga omu malumwa n’omu mbaka zoshi, mwagali mubwîra mpu: orhuyîmikire nîrhu omwâmi wakarhurhegeka. muyishage bunôla muciyêrekane embere za Nyamubâho. Lêro muyishage mucihebe embere za Nyakasane nk’oku amashanja ginyu ganali.» 20 Samweli akashegeza amashanja goshi ga bene Israheli, n’ishanja lya Benyamini lyagwârhwa n’ecigole. 21 Anaciyegeza ishanja lya Benyamini, mulala oku mulala, n’omulala gwa Matri gwagwârhwa; kandi Saulu mwene Kisi agwârhwa muli gwo. Bamulonza bamubula. 22 Okubundi bashubicidôsa Nyamubâho, mpu: «K’oyo muntu ananayishire hano?» Nyamubâho ashuza, erhi: «Ci yôla ocîfulisire omu birugu!» 23 Balibirha bamugogonyola halya, anaciyimanga ekarhî kw’olubaga abarhaluka boshi buli kurhenga omu birhugo ciru na kulusha. 24 Samweli abwîra olubaga, erhi: «Ka mubwîne oyu Lungwè acîshozire? Omu lubaga loshi murhali owundi oli nka ye.» Olubaga lwoshi lwanacibanda orhuhababo, mpu: «Mwâmi aganze anagandaze!» 25 Okubundi obwôla, Samweli anacibwîra olubaga olw’oyôla Mwâmi wayishibayîmamwo, ayandika galya mahashe gâge omu citabu, anacidekereza embere za Nyamubâho, okubundi Samweli abwîra olubaga oku lwanashubûkaga. 26 Saulu naye ashubira emwâge e Gibeya, ci erhi anakola alusîbwe n’abantu b’entwâli, abà Lungwè anazûsagya omurhima. 27 Ci kwônene abâli babî, bene Beliali (Shetani mumînya) bakacîduduma, mpu: «Kurhi oyûla ayishirhuyôkola?» Bamugayaguza bwenêne, ciru barhaderhaga mpu bankamurhûla kantu kalebe. Ci yêhe acîhulikirira.