1 Muli ago mango banacigwârha bâna nda balondana boshi na nnina wâbo, mwâmi alonza okubasêza omu kubashûrha eminyuli na ebikanyi by’e mpanzi mpu balye enyama y’engulube n’obwo enahanzîbwe n’amarhegeko ga Nnâmahanga. 2 Muguma muli bo anacirhenga omu kanwa, aderha oku izîno lya boshi erhi: «Bici ohûnyire na bici walonza okumanya kuli rhwe? Rhulonzize rhufè erhi kwo ahâli h’okuvuna amarhegeko ga ba Larha.» 3 Omu bukunizi bwâge, mwâmi anacirhegeka mpu emishirho y’ebyûma n’enyungu z’amîshi babidukumbuze. 4 Oku byanadukumbuka ntyâla, anacirhegeka mpu batwe olulimi lw’olya waderhaga okw’izîno lya bene wâbo, kandi mpu bagalimugogola oluhù lw’okw’irhwe, banamutwe ebirumbu omu masù ga bene wâbo na nnina. 5 Erhi abà amalêmba, mwâmi arhegeka mpu bamuyegezagye hôfi n’o­muliro anacidwîrhe ayîsa, mpu bamukalangire oku ngalingali anacidwîrhe ayîsa. Oku engalingali yakazâg’itumbûka mwo ehisimbu hinene bwenêne, nabo bene wâbo boshi na nnina wâbo bakazihânana omurhima mpu bafè n’obu­rhwàli mpu: 6 «Nyamuzinda Nnâmahanga adwîrhe abona, anarhufîrîre bwonjo nka kulya Mûsa anakudesire omu lwimbo ahamîrizemwo bwenêne oku ‘Ayish’ibabalira abarhumisi bâge’».

7 Erhi omurhanzi afà n’amalumwa ga bene agôla, owakabirhi naye bamuhira muli galya malumwa erhi babà bamâmugogola oluhù lw’okw’irhwe haguma n’e mvîri bamudôsa erhi alya ngulube lyo balekimubabaza omu birumbu by’omubiri gwâge byoshi. 8 Anacishuza omu lulimi lw’a babusi bâge, erhi: «Nanga!» Kwarhuma ababala ak’owa burhanzi. 9 Erhi akola arhengamwo omûka aderha erhi: «Eci cishahu wamârhukûlakwo omu buzîne bwa bano igulu, ci kwônene Mwâmi w’amahanga goshi ayishirhufûla arhuhè obuzîne burhahwa rhwamâfà erhi kulanga amarhegeko gâge kurhuma.»

10 Erhi oyôla afà, bababaza owa kasharhu. Owakazâgibayîrha ahûna oyo mwâna mpu alêrhe olulimi n'amaboko, naye anacibilêrha duba duba. 11 Anaciderha n’oburhwâli bwoshi, erhi: «ebi birumbu byâni nabihâbagwa n’Ow’empingu, ci nkolaga mbigayire erhi kulanga amarhegeko gâge kurhuma ndangâlîre oku emwâge nashubiyîsh’ibikûla». 12 Mwâmi yêne n’aba bâli boshi, basômerwa n’oburhwâli bw’oyôla mwâna; wakâg’igayaguza amalumwa.

13 Erhi ayûs’ifà, owa kani naye bamurhogeza muli galya malumwa. 14 E­mbêre arhengemwo omûka aderha erhi: «Iragi lyâbo abayîrhwa n'abantu nka alangâlîre Nnâmahanga n’oku baciyishifûlwa naye! Ci kuli we, orhakabona Obufûke bw’o buzîne bw’ensiku n’amango.»

15 Banaciyisha badwîrhe owa karhanu naye bamubabaza. 16 Ci anacimôlera mwâmi amasù aderha erhi: «Ciru akabà nâwe kufà wânafè, ogwêrhe obuhashe omu bantu, n’oku olonzize kw’onajira, ci orhamanyaga mpu ishanja lîrhu linakolaga lilekerirwe lwoshi na Nyamuzinda. 17 Kuli we olinde kwône, wabona kurhi obuhashe bwâge bwakujugumya we n’iburha lyâwe.»

18 Enyuma zâge banacilêrha owakalindarhu. Erhi akola ali omu kâga k’okufà aderha erhi: «Orharhebagwa: rhwêne rhucîlêrhîre okûla bulya rhwagomîre Nyamuzinda; kwo kudwîrhe ebîra by’okurhangâza byoshi. 19 Ci nâwe orhamanyaga mpu orhakahanwa, ene olonza okulwîsa Nyamuzinda.»

20 Nnina wâbo, mukazi wa kurhangâza bwenêne, anayôrha ntyôla buzira kuzunguluka irhwe, omu kubona abâna bâge boshi bahwa omu lusiku luguma, analembera kulya kwoshi bulya alangâlîre Nnâmahanga. 21 Ngasi mwâna wâge yêshi anakazimuhà omurhima omu lulimi lw’emwâbo ayunjula enkengêro nyinjà oku murhima analanga bulya burhwâli bw’omurhima gw’omukazi w’okunali. 22 Akazibabwîra, erhi: «Ntamanyaga kurhi mwayîshaga omu nda yâni arhali nie namuhâga iroho n’obuzîne, arhali nie namuhâga ebirumbu by’omubiri gwinyu. 23 Lulema w’igulu, ye walemaga ngasi bûko bwa bantu, ye wanalemaga ebintu byoshi, amugalulira yêne oku bwonjo bwâge, amugalulira iroho n’obuzîne bulya mwamâcigaya mwenene erhi kulonza okushimba amarhegeko gâge kurhuma.»

24 Antiyokusi amanya mpu nyamukazi amâmugayaguza, aclkebwa mpu nkaba omu binwa byâge muli eby’okumugayaguza. Oku olya murhorhò aciri mw’omûka, arhondêra okumuyinginga anamulaganya n’endahiro nzibu mpu omujira muny’iragi na mugale kulusha erhi ankaleka amarhegeko g’ababusi bâge, mpu anamujira mwîra wâge amuhè n’emikolo minene omu cihugo. 25 Kulya kubà olya mwâna ebyôla binwa bya mwâmi arhabihiragamo ihuzihuzi, mwâmi arhondêra okubwîra nyamukazi mpu ahè omugala amahano gamuciza. 26 Erhi abà amarhama amuyinginga, nyamukazi ayêmêra oku aha omwâna wâge amahano.

27 Anaciyêrekera emunda omugala ali anadwîrhe ashekera oyôla mwîsi, akâbwîra omugala omu lulimi lw’ababusi bâge, erhi: «Mwâna wâni ombêre obwonjo nie nakuhêkaga myêzi mwenda omu nda yâni, nie nakuyonsagya myâka isharhu, nie nakuleraga, nakulîsa nanakuhisa muli ogûla mujunja olimwo buno. 28 “Nkulahirîze mwâna wâni, olole empingu n’igulu, olole ebibà yo byoshi, omanye oku Nyamuzinda abilemire arhakolêsagya cici n’oku abantu nabo kwo banalemagwa ntyôla”. 29 “Orhayôbohaga oyôla mwîsi, ci ohêke bakulu bâwe irenge, oyêmere ofè lyo nyishikushanga; mweshi na bakulu bâwe oku bwonjo bwa Nnâmahanga”».

30 Oku nyamukazi acidwîrhe aderha ntyâla, nyamwâna anaciderha erhi: «Bici mwacilinda? Ntankayumva okwôla mwâmi antegesire; nashimba amarhegeko Mûsa asigiraga ba Larha. 31 “Nâwe we walonza kurhi wankalibuza Abayahudi n’amalumwa ga ngasi lubero, orhafume okuboko kwa Nyamuzinda”. 32 “Bulya rhwono, bubî bwa byâha bîrhu obûla bwarhuma rhwababazibwa okuli nk’oku”. 33 “N’akabà omu kurhuhana n’okurhuyigîriza, Larha Nnâmahanga ozîne alonzagya okurhuyumvîsa muli kasanzi kasungunu, kurhi akunira, ci ashubiyumvanya n’abarhumisi bâge”. 34 “Ci we ndyâlya na muntu mugalugalu omu bantu boshi, orhacibonaga orhanacivunaga okuli nka kw’isirhe okubona wajêjêrhwa n’obulangâlire bw’okuyîrha abarhumisi ba Nnâmahanga”. 35 “Bulya orhacifuma obuhane bw’Ogala-byoshi, olya oyishi ebintu byoshi”. 36 “Bene wîrhu, ene babà bamale­mbêra amalumwa ga kasanzi kasungunu konene, bunôla bakola balungîne na Nyamuzinda omu kalamo karhahwa; ci kuli we, hano Nyamuzinda akutwîra olubanja wahâbwa obuhane bunakwânîne obucîbone bwâwe”. 37 “Oku bwâni kuguma na bakulu bâni, mpanyire omubiri gwâni n’obuzîne bwâni erhi marhegeko g’ababusi bâni garhuma, nsengîre Nnâmahanga nti ababalire olubaga lwâge, anakuhise oku kuhamîriza oku yêne ye Nyamuzinda w’okuli hano ôbà wamârhang’ilibuka n’amalumwa n’ebi akurhimbakwo”. 38 “Mâshi oburhè bwa Nyamuzinda rhwanali rhukwânîne, buyûrhire muli nie na muli bakulu bâni o­bwàli bwamâfunyâza olulimi lwîrhu!”»

39 Mwâmi ayâka n’obukunizi arhegeka mpu oyôla ababazibwe kulusha abà­ bo, bulya okwôla anakazâg’imushekera kwamulumîsize bwenêne. 40 Oyôla naye afà n’ogôla murhima gwâge gucîre, acîhira lwoshi omu maboko ga Nnâmahanga. 41 Buzindazinda nyamukazi naye afà enyuma ly’abâna bâge boshi.

42 Erhali myanzi minyi eyôla oku biyêrekîre ebiryo by’abazimu n’amabî ga ngasi lubero g’Antiyokusi.