22
Olulanga lwa Daudi
Daudi erhi Nyamubâho abà amamulikuza oku banzi bâge boshi na kuli Saulu anaciyimba olwimbo. Aderha erhi:
Nyakasane ye misî yâni ye lwâkiro lwâni, Nyamuzinda ye Mucunguzi wâni.
Nêci Nyamubâho y’ibuye lyâni, ncîfulikamwo, ye mpenzi yâni ye na cisiki c’obuzîne bwâni.
Mucunguzi wâni, we wandîkûzize omu ntambala.
Nayâkûza olya wajire irenge, ye Nyamubâho, nafuma abanzi bâni.
Bulya nêci emigozi y’olufù yali yamanziriringa n’emigozi y’abaminya yali yamangezamwo omusisi.
Emigozi y’omu kuzimu yali hôfi h’okunziriringa, n’emirhego y’olufù yalikola enyêrekîre.
Omu malibuko gâni nabirikira Nyakasane, emunda Nyamuzinda wâni ali, nalaka nalakûla.
Naye oku ali omu ndâro yâge ayumva izù lyâni, omulenge gwâni gwanacihika omu marhwiri gâge.
Idaho lyajuguma lyageramwo omusisi, emitungo y’amalunga yadirhimana, yamânyuka erhi kugulumira kurhuma.
Ecigî catumbûka omu mazûlu gâge, engulumira yavubuka omu kanwa kâge yayisha
yasingônola yanayisha yamokola amasèsè gadukumbusire.
10 Ayûnamya amalunga, ayandagala, erhi na ecitù c’endunduli ciri aha magulu gâge.
11 Ashonera kuli Kerubi, azurunduka n’empûsi y’ebyûbi byâge.
12 Acîhundikira endunduli nka nyumpa, kuguma n’emibumbuli y’amîshi n’ebirundo by’ebitù.
13 Omu ngulumira yali mushokolîre mwakacilashira amakala g’omuliro.
14 Nyamuzinda arhontomera emalunga, izù ly’Ow’enyanya lyashakanya omu malunga.
15 Abalasha emyampi yanacibashandabanya, abalikira omulazo gwabatulutumbya.
16 Lêro babona obululi bw’enyanja, amakondo g’igulu gabwikûka erhi Nyamubâho akankama, gabwikûka n’omuhusi gw’empûsi gwarhengaga emazulu gâge.
17 Anacilambûla okuboko kwâge kurhenga eyôla nyanya, andîkûza ankûla emuhengere.
18 Andîkûza oku mwanzi wâni wali mudârhi, andîkûza oku banzi bâni, n’obwo bo bali bazibu kundusha.
19 Bantêra omu nsiku z’amalibûko, ci Nyamubâho abà ye nyamwegemerwa wâni.
20 Ankwêbire ahantu hagali, anyôkwîre bulya amantonya.
21 Nyamubâho angalulire nk’oku obushinganyanya bwâni bwanali, ampemba nk’oku amaboko gâni ganali mêru-kwêru.
22 Bulya nashimbire enjira za Nyamubâho, ntahenyaga amabî, ntaciyegûlaga kuli Nyamubâho wâni.
23 Bulya obucîranuzi bwâge boshi bwàli embere zâni, ntajandikaga amarhegeko gâge.
24 Nanaciyôrha mwimâna emunda ali, nacîlanga oku câha.
25 Nyamubâho anshubiza nk’oku obushinganyanya bwâni bwanali, nk’oku obucêse bwâni bwanali omu masù gâge.
26 Omuntu mwinjà, nâwe onamulole kwinjà, omuntu mwimâna, nâwe onamuyêreke oku oli mwimâna.
27 Omuntu mwêru-kwêru, onamuyêreke oku oli mwêru-kwêru, ci endyâlya we oyiyeshûla.
28 We oyôkola olubaga luli omu marhabi, n’abacîbona onabayase obusù bwâwe.
29 Bulya we kamole kâni Yâgirwa Nyamubâho. Nyamubâho ye omolekera omu mwizimya ndimwo.
30 Bulya oku burhabâle bwâwe nancîrhunike oku bashombanyi bâni,
oku burhabâle bwa Nyamuzinda wâni nagagambe oku côgo cizibu.
31 Nyamubâho!… Enjira yâge ebà eshingânîne, akanwa ka Nyamuzinda omu muliro kashukirwa.
Abâ mpenzi ya ngasi boshi bacîkubagira ye.
32 Bulya ndi wundi Nyamuzinda okuleka Nyamubâho, ndi wundi ibuye Nyamwegemerwa kulusha Nyamuzinda wîrhu?
33 Nyamuzinda ye lwâkiro ncîkubagira, ye oyôkola okunali obuzîne bwâni.
34 Amagulu gâni anagajire mabidu nka ga kashafu, anarhume nashigalika oku lwimana.
35 Ye okomereza enfune zâni oku ntambala, n’amaboko gâni ganafôle omuherho gw’enshungurhi.
36 Wampîre empenzi y’obucire bwâwe, n’obutûdu bwâwe bunampêke enyanya.
37 Onagalihye ikano lyâni, na ntyo ntamango nakajuguma entege.
38 Namminike abashombanyi bâni kuhika mbashandâze, ntanagaluka ntanacibamalîra.
39 Nabamalîre, nabavungunyula, barhakaciyûlubuka, bagugumikira aha magulu gâni.
40 Onanyunjuze misî nka naj’ilwa, n’abashombanyi bâni obagombeze emunda ndi.
41 Abashombanyi bâni onarhume banyerekeza omugongo n’abashombanyi bâni onarhume nabamalîra.
42 Banalole eyi n’eyi, ntâye wabalîkûza, bagalamire Nyamubâho arhanabashuze!
43 Nambavunyungule nka katulo k’idaho, mbahinogole nka byondo by’omu njira, mbakome nka nyâlè.
44 Wandikuzize omu bugoma bw’olubaga lwâni, wananga mpu onjire mwâmi w’amashanja,
olubaga ntayishigi lukola lunkolera.
45 Abâna ba abanya-mahanga bakola banyinginga, babalagaze burhahusa amarhwîri mpu lyo bayumva eci naderha. 46 Abâna ba abanya-mahanga banashandabane, basige ebishagala byâbo bizibuzibu.
47 Aganze Nyamubâho, agishwe kabuye kâni, aj’irenge Nyamuzinda y’ibuye ly’obucire bwâni.
48 Nyamuzinda ye onyîhôlera, ye onahungumulira embaga aha magulu gâni.
49 Y’orhuma nayongoloka abashombanyi bâni, yâgirwa we orhuma nafôkanana embere z’abanzi bâni,
we ondîkûza oku muntu w’akavulindi.
50 Co carhuma nakukuza ekarhî k’amashanja, Yâgirwa Nyamubâho, n’oku izîno lyâwe naziha olulanga.
51 Àshobôzize olya ajiraga iragi linjinja, ayêrekana obwinjà bwâge emwa omushîgwa wâge, ye Daudi n’iburha lyâge ensiku zoshi.